အီၪပဒၩ့ထၬ ၥၭဘၪ့ဖိၪၥံၪ ၦဆံၫ့ဎံၪ အလွဲၩၡဲၭ ဂိၫဇၩဂၩအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ အီၪပဒၩ့ထၬ ၥၭဘၪ့ဖိၪၥံၪ ၦဆံၫ့ဎံၪ အလွဲၩၡဲၭ ဂိၫဇၩဂၩအဂဲး (Aloysius Gonzaga) အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧၥၭဘၪ့ဖိၪၥံၪနီၪ အဆၧမံၫမးႇ အဆၧထိစိၩ အီၪဝ့ၫနီၪ မွဲဝ့ၫဒၪ ကကဲၪဒိၪကဲၪမုအဂးႇ ကကဲၪထၪ့ မံၩ့ဎိၩၥၪဖျီၪအဂးနီၪလီၫႉ ၦၡၩအၪဒၪဆၧနီၪ ၥၭဘၪ့ဖိၪၥံၪ ကကဲၪထၪ့ ဘဲၫနီၪၥိၭအဂး အၥၭအီၪဝ့ၫဒၪနီၪလီၫႉ ဘၪမနီၪလဲၪစွါဘဲၫ ၦလၧဆၧထူၭဆၧလၧၫ့ ၡၪ့ယၬဂီၩ့ ဆၧကိၪ့ဘၪကိၪ့ၥ့ၪ လအီၪဘၪ ၦၡၩလဖၪနီၪ ဘၪထိးအီၪပဲၩထၬၥၭ အကၠီၩ့နီၪလီၫႉ

လါနၫ့ ဂၪ့ခိၪဆၧထူၭဆၧလၧၫ့လဖၪ ဒုၭဆၧၫ့ခွံၬဝ့ၫ ၥၭဘၪ့ဖိၪလဂၩ နံၪ့ ၁၅၆၈-၁၅၉၁ နံၪ့ အထးဖၧၩ့ အီၪလၧဝံး (အီတလီ) နီၪလီၫႉ အဝ့ၫယီၩ မွဲဝ့ၫဒၪ အလွိုင်းရှပ်စ် (လွီးဂျီ/လွီး) နီၪလီၫႉ အဝ့ၫ အမိမိႇ အဖဖႇ အရွ့အၥၪၥံၪနီၪ ကဲၪဒိၪကဲၪမုႇ မွဲဝ့ၫ စဎွၩအရွ့အၥၪၥံၪနီၪလီၫႉ အဝ့ၫအရွ့အၥၪၥံၪနီၪ မိဒိၭအီၪၥၭမၧၫ့ အဝ့ၫလၧ ဆၧထူၭဆၧလၧၫ့အဆၧပၧၩ့ ဆၧၥၭမၧၫ့လါနၫ့ အဝ့ၫဖျါဖျ့ၭခွံၬ ဆၧၥၭမၧၫ့အနီၪဂီၩ့ ရွံထၪ့လၧ ဆၧထူၭဆၧလၧၫ့ လအီၪဘၪ (ဂျက်ဇွစ်) ဘိၪ့ခိၪၥၫ့ခၫ အဆၧၥၭမၧၫ့နီၪလီၫႉ

(ဂျက်ဇွစ်) အခရၧၫ့ အခၪ့ထံၭခၪ့ဎၧၩ့ မွဲဝ့ၫ ဆၧကၪဆၧဂဲၩအီၪ ဆၧမၩလိၪ အဆိၫထုၬ နံၫနံၪ့အခံၫ့နီၪ အဝ့ၫအဂး ယီၫဝ့ၫဒၪနီၪလီၫႉ ဘၪမနီၪလဲၪစွါဘဲၫ အဝ့ၫအီၪလၧ အဂံၪ့ခီၩဒၪအိၩ ဂဲၫထဲၩ့အီၪၥၭမၧၫ့လၧ ဆၧဘၩဆိၪဖၪဎိၩဒိၪဖၧၩ့ႇ ဖ့ၪဆၧၫ့လၩ့ၥၭ အဆၧမၩဖၧၩ့အကၠီၩ့နီၪလီၫႉ ဆၧမၩအယီၩ ပကိၭဝ့ၫလၧ (magis)ႇ မွဲဝ့ၫ (လက်တင်း) အဆၧချဲၩ့ဂီၩ့ အခီၫပယီၫနီၪ မွဲဝ့ၫဒၪ ကဆါယွၩအဂး ပကကျ့ၭစၨၭ ဒိၪဒိၪအၪအၪလ့ၬနီၪလီၫႉ အဝ့ၫကျ့ၭစၨၭလၨၪအကၠီၩ့ ကျ့ၭစၨၭဘၪဘၪအဂး အဆရၫ ဖ့ၪအ့ၪဆၧထုၪ့ၥုၪ့ထုၪ့ၥၭနီၪလီၫႉ အဝ့ၫယီၩ အီၪၥၭမၧၫ့ အဆၧၥၭမၧၫ့လၧ အဲၪဒိၭကဆါယွၩ ၥုၪ့ၥၭထၧၫ့ဖျိၪ့ယၫဂီၩ့ အနဲၩ့အဎီၩ့ၦၡၩၥံၪဆ့ အဲၪဒိၭဝ့ၫ ဘဲၫၥိၭ အနၫ့ဆါဒၪအဝ့ၫၥိၭနီၪလီၫႉ

အဝ့ၫယီၩ အၥၭဖီၩ့ခွံၬ နံၪ့ (၂၀) အခံၫ့ ဆၧဆၫလၧ အဘၪဂါဖျဲၪ ကဲၪ့ထၪ့ဝ့ၫလၧ အနဲၩ့အဎီၩ့နီၪလီၫႉ ဆၧဆၫယီၩအကၠီၩ့ ဆၧဆၫဆါလဖၪ ဘၪထိးခွံၬၡိၭထၬၥၭလၧ ဖၧၩ့ၥၭမုနီၪလီၫႉ အဝ့ၫယီၩ လၧအမိၡါ နၧၫ့အုၪနၧၫ့အုၭႇ ၥၭလိၪၥၭလံၭအီၪ ဆၧဆၫဆါလဖၪ ကဘၪဖီၪ့ဝ့ၫအဂး ဂၭဎ့ၭထၪ့ၥၭနီၪလီၫႉ လါနၫ့ အၪ့န့ထၪ့ဆၧကိၪ့လၧ ၦဖ့ၪဂဲးဖ့ၪဘၭ နးၥၭလဂၩ ၦဆံၫ့ဎံၪ (ရောဘတ် ဘက်လမင်း) အီၪကကၠၪ ဒုၭဆၧၫ့ခွံၬ အဝ့ၫအလိၪလဖၪဂီၩ့ ယိထွ့ၫမၩဆၧၩ့ထဲၩ့ ဆၧဆၫဆါၥံၪ အၪအၪလ့ၬနီၪလီၫႉ ဆၧဆၫယီၩ ဘၪဂါဖျဲၪ ၥ့ၪယၫဝ့ၫလါနၫ့ လၧဆၧအဲၪဆၧကွံၩဒဲ ဆၧၥုၪ့ဒုၩၥၭဒုၩဖၧၩ့ ယိထွ့ၫမၩဆၧၩ့ ဆၧဆၫဆါၥံၪအကၠီၩ့ အနၫ့ဆါနးဆ့ ဆၧဆၫဘၪဂါဂီၩ့ အၥၭအီၪ ၂၃နံၪ့အခံၫ့ ၥံၪဝ့ၫဒၪနီၪလီၫႉ ကၭၥလ့ၬဆၧအီၪကီၪ့ယီၩ မၩနဲၪ့ထၬအဝ့ၫလၧ အီၪပဒၩ့ထၬ ၥၭဘၪ့ဖိၪ ၦဆံၫ့ဎံၪအကၠီၩ့ ၦဆံၫ့ဎံၪ (အလွိုင်းရှပ်စ် ဂွန်ဇဂါး) အဂဲး ယရၩလၩ့န့အ့ၪဘၪနၥံၪထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭအဖၫ့ခိၪလါဆံၭႉ