အလဲဇၩ့ဒၩ ဂရ့ၫဟၫ့ဘဲ(လ်)

ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩ ယီၩ ယအဲၪဒိၭရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ၦအဖိၬလိၬထုၬထၪ့ ခွ့ၩဒိၭနါအဂုခိၪထုၬ စကီၭ တလၫ့ ထံၫခးဖိၪ အလဲဇၩ့ဒၩ ဂရ့ၫဟၫ့ဘဲ(လ်) အဂဲးအကၠီၩ့ နီၪလီၫႉ အထၧၫ့ဖုဝဲအီၪဝ့ၫဒၪ ၥၧၫ့ဂၩဂီၩ့ အဝ့ၫနီၪ မွဲဝ့ၫ ဖိၪခွၫ အကျၩ လဂၩနီၪလီၫႉ အဝဲခွၫဒဲ အဖုခွၫနီၪ တံၫဘံၫဆၧဆၫအကၠီၩ့ အၥၭဘၪ ၥံၫခွံၬဝ့ၫဒၪနီၪလီၫႉ

            ထၧၫ့ဖုဝဲထံၩၥိၭၥံၪဧႉႇ အလဲဇၩ့ဒၩ ဂရ့ၫဟၫ့ ဘဲ(လ်) ယီၩ ထီၩ့ဝ့ၫၥၭဘၪ့အခံၫ့ အၥၭဆုးလၩ့ အီၪဝ့ၫဒၪလၧ လုၫလါနဲၩ့ဎီၩ့ဖၧၩ့ ကမၩဖိၬလိၬယိ ဆၧလမံၩ့မံၩ့ မွဲဝ့ၫဒၪနီၪလီၫႉ လၧအဝ့ၫ အဆၧမၩ ဖိၬလိၬယိဆၧဖၧၩ့ အမိမိနီၪ ဖ့ၪဂဲးဖ့ၪဘၭအဝ့ၫႇ ဖ့ၪအ့ၪအဝ့ၫ ဆၧမၩဆၧၩ့ အီၪဝ့ၫဒၪ ဒိၪမၬဒ့ၭ နီၪလီၫႉ

            အလဲဇၩ့ဒၩ ဂရ့ၫဟၫ့ဘဲ (လ်)အၥၭအီၪဝ့ၫ (၁၆)  နံၪ့အခံၫ့နီၪ ကဲၪထၪ့ ၦအၥီၪ့လံၬ ဆရၫဖိၪ လဂၩနီၪလီၫႉ ၥီၪ့လံၬအခံၫ့ဂီၩ့ ဂဲၫထဲၩ့လၧ ဂံၪ့အခံၫ့ နုၬလၩ့မၩဆၧမၩလၧ အဖါဖါအဆၧမၩလးဖၧၩ့ နီၪလီၫႉ အဖါဖါအဆၧမၩနီၪမွဲဝ့ၫဒၪ ၦၡၩနါဂၧၫ့ဆၧလန့ဘၪ လဖၪၥံၪ ကနၪၥ့ၪအဂး ထုၬဖျီၪထၪ့ ဖ့ၪနဲၪအ့ၪဝ့ၫဒၪလၧ မိၡါအဆၧဂဲၩဝၭ ဆၧမၩလးဖၧၩ့နီၪလီၫႉ စၭထၪ့လၧ အခံၫ့အနီအိၩ အလဲဇၩ့ဒၩ ဂရ့ၫဟၫ့ ဘဲ(လ်) ယီၩ က ဘၪထုၬထၪ့ ဆၧအလူ ဘဲၫၥ့ၪလဲၪ အၥၭဆုးလၩ့ အီၪဝ့ၫဒၪယူၭနီၪလီၫႉ ဖိၬလိၬယိဝ့ၫလၧ စီၩ့ဂဲးလၫ့မ့ၪဂီၩ့ ထုၬထၪ့ယိဆၧအလူနီၪလီၫႉ

            လခဲၫ့ အဝ့ၫၥံၪအဂံၪ့နီၪ ဆၧအၪ့လဲၩထၪ့အၥၭအီၪဝ့ၫအၪမၬဒ့ၭနီၪလီၫႉ အဂံၪ့ဒီၪ့ဖၧၩ့နီၪ တံၫဘံၫဆၧဆၫ ဘၪဂါအကၠီၩ့ အဖုခွၫၥံၫဂုဂီၩ့ လခဲၫ့ အဝဲခွၫဆ့ အၥၭ ဘၪၥံၫခွံၬဝ့ၫဒၪနီၪလီၫႉ လခဲၫ့ အီၪထးအဝ့ၫၥံၪ အဂံၪ့ဒီၪ့ ဖိၪလဖၪနီၪ ၥုၭအီၪထဲၩ့အလးလၧ ကန့ၫဒၫ ထံၫခးဖၧၩ့ဂီၩ့ ဆုးမၩကဲၪထၪ့ အၥၭဆုးလၩ့အီၪ ဆၧမၩမွဲဝ့ၫ စီၩ့ဂဲး ဒဲ ၦၡၩအလူ အဆၧအီၪဆုးကျိၭလိၬၥၭ အဂဲးနီၪလီၫႉ အဝ့ၫအဖါဖါနီၪ ဘၪၥီၪ့လံၬလၧ ၦၡၩချဲၩ့လၥ့ၪဘၪ ၦၡၩနါဂၧၫ့ ဆၧ လၥ့ၪ ဘၪအလးတၭ လခဲၫ့ ဘၪနုၬလၩ့ မၩထဲၩ့ဆၧမၩလၧ အဖါဖါအဆၧမၩလးဖၧၩ့နီၪလီၫႉ အလဲဇၩ့ဒၩဂရ့ၫဟၫ့ ဘဲ (လ်) ယီၩ ကျ့ၭစၨၭမၩကဲၪ ထၪ့ ကထုၬထၪ့ ၦၡၩအလူလၧ လၫ့မ့ၪဖျူၩ လဘီၩ့ဖၧၩ့အဂးနီၪလီၫႉ ဘဲၫအဝ့ၫအဆၧကိၪ့ဆၧတဲၩ့ အီၪၥိၭ အၪ့န့ထၪ့ အလိၬၥၭလဂၩ အဆၧမၩဆၧၩ့ကကၠၪ အဝ့ၫၥံၪ အဆၧကိၪ့ဆၧတဲၩ့ နီၪ ဘၪမၩယိ ဝ့ၫကၪကၪဂဲၩဂဲၩလါနၫ့ နံၪ့ ၁၈၇၆ နံၪ့ လၩမၭ(ချ်)  ၁၀ ၥၪ့နီၪ လၧ လၫ့မ့ၪစီၩ့ဂဲး ဖျူၩလဘီၩ့ဖၧၩ့ ချဲၩ့ဒုၪ့လိၬၥၭ န့ဝ့ၫဒၪအဂုခိၪထုၬ မုနံၩမွဲဝ့ၫနီၪလီၫႉ လခဲၫ့ချဲၩ့အလး မၩယဲၩ့ထၪ့ဝ့ၫဂီၩ့ ထီၩ့ထဲၩ့နံၪ့ ၁၈၇၇ နံၪ့ လၩ ဇူၫလဲၫ့ ၉ ၥၫ့နီၪ ၥုၪ့ထၪ့ ဘဲ(လ်)ခွ့ၩဒိၭနါ ကိၫ့ပနံၫ့ န့ဝ့ၫဒၪယူၭနီၪလီၫႉ 

            အဲၪကွံၩ ဘၪထၧၫ့ဖုဝဲထံၩၥိၭထီးအလူၬၥံၪဧႉႇ ၦအဖိၬလိၬထုၬထၪ့ ခွ့ၩဒိၭနါအဂုခိၪထုၬ အလဲဇၩ့ဒၩ ဂရ့ၫဟၫ့ ဘဲ (လ်)အဂဲး မွဲဝ့ၫဒၪထၨၪယီၩလီၫနဲၪႉ ထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩ ဝ့ၫဒၪလၧ ယွၩအဆၧအဲၪ ကိၭဒံၩကိၭဂၩလါဆံၭႉ

Add new comment

4 + 8 =