ဟဲနရံၫအဲၩရိၩ့ဆဲၭ

ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪနိၫ့ အဆၧရၩလၩ့ဖၧၩ့ မုကနံၩယီၩယအဲၪဒိၭရၩလၩ့န့အ့ၪဘၪနၥံၪနီၪမွဲဝ့ၫဒၪ ၦအဖီလံၬဆံၫ့ဎံၪထၧၫ့ဘံၪ့ယၫ အၪကၠၪအၪဘျၩ့ အမံၩ့မွဲဝ့ၫ ဟဲနရံၫအဲၩရိၩ့ဆဲၭအဂဲးအကၠီၩ့လါဆံၭနဲၪႉ ထၧၫ့ဖုဝဲထံၩၥိၭထီးလူၬၥံၪဧ့ၪႉ ဟဲနရံၫ အဲၩရိၩ့ဆဲၭယီၩ အၥၭအီၪဝ့ၫဒၪ (၂)  နံၪ့ဒံၭလီၫႉ အခါခါၥံၪဒၪခွံၬ အဝ့ၫၥံၪအကၠီၩ့ အဝ့ၫအထၧၫ့ဖုဝဲနံၫဂၩ ဒဲအခိခိနီၪဘၪအီၪအၪ့ၥၭမၧၫ့ထးဝ့ၫဒွကၪကၪဂဲၩဂဲၩနီၪလီၫႉ ဟဲနရံၫအဲၩရိၩ့ဆဲၭ အမိမိနီၪ့အဖိၪခၪၫနံၫဂၩအဂးဆၭဆၧဂီၩ့လုအၪ့လုအီၩအ့ၪအဖိၪၥံၪနီၪလီၫႉ

အကနံၩတၭ အဝ့ၫၥံၪကအၪ့အဂး ဆအလအီၪဘၪနးမံၩ့အကၠီၩ့ လၧအဝ့ၫၥံၪအၪ့ဆၧအၪ့အလးဖၧၩ့နီၪဘျုၪ့ထၪ့ထံၫကဘျုၪ့ဂီၩ့ အဝ့ၫၥံၪအဆၧအၪ့အဂး ထံၫကဘျုၪ့အီၪဝ့ၫဒၪအကၠီၩ့ စံၭခိးစံၭတၩထၪ့ဘၪယွၩနီၪလီၫႉစံၭခိၭစံၭတၩထၪ့ဘၪယွၩ ဎွ့ၩဂီၩ့လီၫ ၦၡၩလဂၩဂဲၫဒိၪထိၬအတရၫ့တၭလ့ၩဝဲထၪ့ဲရၫ့ကကၠၪ ၦၡၩလဂၩနီၪဂဲၫဆိၬန့ကၠီၩ့ၥၪလဒၩ့ဂဲၫဖ့ၪအ့ၪအဝ့ၫအဝၩၥၭဘီၩ့ ကျိၪစ့ၩအီၪဝ့ၫတၭ ကျိၪစ့ၩနီၪ ဖ့ၪကၪထဲၩ့အ့ၪဝ့ၫလန့ဘၪအကၠီၩ့ဂဲၫဖ့ၪအၪ့အ့ၪအဝ့ၫၥံၪကၠီၩ့ၥၪ ဘဲၫယီၩၥိၭနီၪလီၫႉ အဝ့ၫၥံၪကအၪ့အဂး လိၪဝ့ၫဒၪအခံၫ့ကၠီၩ့ၥၪဂဲၫထီၩ့ဘဲၫယီၩၥိၭနီၪမွဲဝ့ၫကဆါယွၩ အဆၧထံၫလၩ့ ဒီၪလၩ့အကၠီၩ့နၪၥ့ၪဝ့ၫဒၪနီၪလီၫႉ

ဟဲနရံၫအဲၩရိၩ့ဆဲၭအထၧၫ့ဖုဝဲနံၫဂၩအဂး အမိမိနီၪဖ့ၪအ့ၪအဝ့ၫၥံၪ ကအၪ့ကအီၪအဂး ဂ့ၩဂ့ၩ ဘၪဘၪယၧၫ့ယၧၫ့ဎွ့ၩဎွ့ၩလန့ဘၪလါနၫ့အဖိၪခွၫၥ့ၪဆၧၥၭဝံလၩ့ဒိၩကအီၪလၧ ယွၩလုယွၩထၫဖၧၩ့အဂးဖ့ၪထၬအ့ၪဝ့ၫဆၧၥ့ၪယၫနၪၥ့ၪနီၪလီၫႉ ဟဲနရံၫအၥၭအီၪဝ့ၫ ၉ နံၪ့ ၁၀ နံၪ့အခံၫ့နီွလံၬဆံၫ့ဎံၪထၧၫ့ဘံၫ့ယၫကဘၪဖီဝ့ၫထီးအလူၬဘဲၫၥ့ၪလဲၪနီၪ နါဂၧၫ့ဆၧအလူလၧ ၦၡၩလဂၩအီၪတၭ ကမၩကဲၪထၪ့ဝ့ၫဘဲၫယီၩၥိၭအဂးအီၪဂုးခၧၫ့ထၬအၥၭနီၪလီၫႉ လံၬဆံၫ့ဎံၪနီၪ အဝ့ၫဖီအၪထၪ့ခီၫ အၥၭဆုးလၩ့အၪထၪ့ခီၫကဲၪထၪ့ဝ့ၫဒၪဘဲၫယီၩၥိၭနီၪလီၫႉ ဟဲနရံၫအဲၩရိၩ့ဆဲၭအၥၭထီၩ့ဝ့ၫ ၁၄ နံၪ့ကကၠၪ ဖီလံၬဆံၫ့ဎံၪဂီၩ့ အဘျၩ့အီၪဝ့ၫ ၁၄ ဘျၩ့ယူၬနီၪလီၫႉ ဖီလံၬဆံၫ့ဎံၪန့ဝ့ၫဒၪ ဘဲၫယီၩၥိၭနီၪ မွဲဝ့ၫဒၪ အဝ့ၫအဆၧခိးဂဲး ခိးဘၭအီၪဝ့ၫလဲၪအဂဲးအကၠီၩ့မွဲဝ့ၫဒၪနီၪလီၫႉ

ဖိၪၥၪဂဲၫဎိၩထၪ့ၥၫ့လဂၩ လၧဖီလံဆံၫ့ဎံၪဖၧၩ့အၥၭဆုးလၩ့အီၪဝ့ၫဒၪနီၪကဲၪထၪ့အခိးအတၩဘဲၫၥ့ၪလဲၪပကဆုးခိၭနၪလါဆံၭႉ အၥၭဆုးလၩ့အီၪလၧ ဖီလံၬဆံၫ့ဎံၪဖၧၩ့အၥၭဆုးလၩ့အီၪဝ့ၫဒၪနီၪ ကဲၪထၪ့အခိးအတၩဘဲၫၥ့ၪလဲၪပကဆုးခိၭနၪလါဆံၭႉ အၥၭဆုးလၩ့အီၪလၧ ဖီလံၬဆံၫ့ဎံၪဖၧၩ့အကၠီၩ့ လၧခံၫ့ခၫဆၧၫ့ထီ အနီအိၩၦအလီၩ့လၩ့ရၩလၩ့လံၬဆံၫ့ဎံၪဆၧၥၭထိၬအပရၧၫ့ဖၧၩ့ အမံၩ့အဎိၩထုၬမွဲဝ့ၫဒၪနီၪလီၫႉ ၦၡၩလဖၪအ့ၪခိၭနၪအဝ့ၫအတရၩစွါဘဲၫ အၥၭဆုးလၩ့အီၪလၧအဝ့ၫအတရၩဖၧၩ့စဲၪ့ထၪ့အလးလန့လၧၩ့ဘၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးလူၬၥံၪဧ့ႇ ပကဘၪဖီလံၬဆံၫ့ဎံၪအဂး ခိၭစီၪဘၪလၧ ပမၩလူၬအခံၫ့လဂ့ၩနဲၪႇ အ့ၪပဖီလီၬဆံၫ့ဎံၪ ကနံၩကနံၩ (၁၅)  မံန့ စွါဘဲၫ လၩ ၈ ဘံၪ့ ကနံၪ့အထးဖၧၩ့ လံၬဆံၫ့ဎၪထၧၫ့ဘံၪ့ယၫ ပဖီဂီၩ့ဝ့ၫဒၪနီၪလီၫႉ လံၬစီၩ့အဂူၫဂၩနီၪဘဲၫဖ့ၪအ့ၪပၧၩဆၧၥ့ၪယၫနၪၥ့ၪၥိၭ လံၬဆံၫ့ဎံၪယီၩ အ့ၪပဖီနီၪဖ့ၪၥ့ၪယၫအ့ၪပၧၩ ဖ့ၪအီၪဘူၭထံးပၧၩလၧကဆါယွၩနီၪလီၫႉ ထၧၫ့ဖုဝဲထံၩၥိၭထီးလူၬၥံၪဧ့ႇ မုခိၪဒဲဂၪ့ခိၪအကဆါအဎိၩဒိထုၬကဆါယွၩနီၪ ပကအီၪဘၪ ဘူၭဘူၭထံးထံးလၧအဝ့ၫအဂး လၧပဆၧၥၭမၧၫ့မုကိၭနံၩဒ့ၭဖၧၩ့ပကဖီလံၭဆံၫ့ဎံၪလၧ ၥုၪ့ဆုးလၩ့ဖၧၩ့လါဆံၭႉ