ဟီလံၩဝုၭ (စ်) ဆၧဂၩ့ဒီၩ့ခွၫ ၡံၫယၫ

လၧဎြံၬအဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉႇ မံၩ့ဎိၩၥၪဖျီၪမုၪခွၫလၧအအီၪအနိၫ့ အဆၧရၩ လၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ၦအဘၪဒိၪဆၧဂၩ့ဒီၩ့လၧ ၦဆံၫ့ဎံၪ ပၫဒရဲၫပံၫအိၫ အလး ဆၧဂၩ့ဒီၩ့ခွၫ ၡံၫယၫလၫ ဘံၫအိၭ အဂဲးအကၠီၩ့နီၪလီၫႉ ၡံၫယၫယီၩ အၥၭအီၪဝ့ၫ (၃၆)  နံၪ့ယူၭလါနၫ့ အီၪက့ၪ ထၬအဆၧဆူနဲၩလၧ ဆၧဘိၪ့ ဆၧဘၩအဖၫ့ခိၪနးမံၩ့အ့ၬနီၪလီၫႉ ကဘၪဒိၪဆၧဂၩ့မၧၫ့လၧ ကၫပူၩခၠ့ၩ အဲၩ့ၥဲၭ ၦဆံၫ့ဎံၪ ပၫဒရဲၫပံၫအိၫ အဂဲး ဘၪထိးကိၭအၥၭကကၠၪ  အဝ့ၫထိးဆၧၫ့ဝ့ၫဒၪ ဂ့ၩဂ့ၩဘၪဘၪနီၪလီၫႉ အဝ့ၫအမံၩ့ ၡံၫယၫ အခီၩ ပယီၫနီၪ  မွဲဝ့ၫ ယွၩဖ့ၪလၫ့ထၬ လၬဆီၪ့ဂီၩ့ ဟ့ၫဘရဲ အဆၧချဲၩ့ မွဲဝ့ၫဒၪနီၪလီၫႉ အမိမိနီၪ မွဲဝ့ၫ ဂျူၩဆၨၩဖိၪလဂၩဂီၩ့ အဖါဖါနီၪ မွဲဝ့ၫ ဎြံၬဆၧ ဘိၪ့ဆၧဘၩဖိၪလဂၩနီၪလီၫႉ

            လဒိၪဒံၭ ဘၪဆၧဂၩ့မၧၫ့လၧ ၦဆံၫ့ဎံၪ ပၫဒရဲၫ ပံၫအိၫအဂဲးအခံၫ့ဒံၭၥဲၪအိၩ ဘၪဒၪခီၩ့လၧ ဆၧကၪဆၧဂဲၩ အီၪဝ့ၫဎိၩဒိၪဒ့ၭ နီၪလီၫႉ ကမိမၩၥံၫခွံၬအၥၭဂီၩ့ ဒုၪချဲၩ့လၧ အမိမိဆ့ အီၪဝ့ၫဒၪနီၪလီၫႉ ကဘၪဒိၪဆၧဂၩ့မၧၫ့ အဆၧမၩဆ့ လမိမၩလၧၩ့ ဘၪဝ့ၫအကၠီၩ့ ထုၬလီၩဖျီၪထၪ့ အီၪဝ့ၫဒၪနီၪလီၫႉ  ၡံၫယၫယီၩ ဘၪအီၪၥၭမၧၫ့ဝ့ၫဒၪလၧ ဆၧခံၭကျၩဖၧၩ့အခံၫ့ အၪ့န့ထၪ့ဆၧချဲၩ့လၩ့ဎိၭလၧ ၦဖ့ၪဂဲးဖ့ၪ ဘၭနးၥၭအဂဲး လဂၩအီၪကကၠၪ ၦဖ့ၪဂဲးဖ့ၪ ဘၭနးၥၭ ယီၩ အၪ့စၪ့ ဘၪအဝ့ၫ နကဘၪဒိၪ ဆၧဂၩ့မၧၫ့ ၦဆံၫ့ဎံၪ ပၫဒရဲၫပံၫအိၫအဂဲး နၥ့ၪယၫထၬ အီၪဧၪႉ အ့ၪနကဒိၪ အဝ့ၫအဂဲး ဆၧဂၩ့မၧၫ့စွါဘဲၫ အဝ့ၫအဂဲးအဖး နကဘၪၥ့ၪယၫထၬလိၪဝ့ၫအကၠီၩ့ လီၩဖျီၪထၪ့ဝ့ၫ ဘဲၫယီၩၥိၭကကၠၪ ၡံၫယၫလဂၩ ကၥ့ၪယၫ ၦဆံၫ့ဎံၪ ပၫဒရဲၫပံၫအိၫအဂဲးအဂး ကျ့ၭစၨၭဝ့ၫဒၪနီၪလီၫႉ

            ၦဆံၫ့ဎံၪ ပၫဒရဲၫပံၫအိၫအဂဲး ကၥ့ၪယၫဘၪဝ့ၫအဂး ၡံၫယၫလဂၩ ဘၪလ့ၩအီၪလၧ ၦကကဲၪထၪ့ ဘိၪ့ခိၪ ၥၫ့ခၫ ကၫပူၩခၠ့ၩ အဲၩ့ၥဲၭၥံၪ အီၪအလးနီၪလီၫႉ အလးထနီ ၡံၫယၫလဂၩ ဘိၪ့ခိၪၥၫ့ခၫႇ မံၭထၭမုၪႇ မံၭထၭခွၫၥံၪ အဆၧမၩဆၧၩ့အကၠီၩ့ အီၪက့ၪထၬအဆၧဆူနဲၩလၧ ဎြံၬကၭၥလ့ၬ ဆၧ ဘိၪ့ဆၧ ဘၩဖၧၩ့နီၪလီၫႉ  ဆၧဂၩ့ဒီၩ့ခွၫၡံၫယၫ ယီၩ ကဘၪဒိၪဆၧဂၩ့မၧၫ့အဂး ဘၪဖီလံၬဆံၫ့ဎံၪ ဆၧၥၭထိၬ အပရၧၫ့ အီၪဝ့ၫဒၪနီၪလီၫႉ ကဒိၪဆၧဂၩ့မၧၫ့ အဂး ဘၪဖီလံၬဆံၫ့ဎံၪယီၩ အဝ့ၫအဂး မွဲဝ့ၫအဂုခိၪထုၬ လံၬဆံၫ့ဎံၪဆၧဖီ မွဲဝ့ၫဒၪနီၪလီၫႉ  လၧဖီလံၬဆံၫ့ဎံၪဖၧၩ့ အဝ့ၫၥ့ၪ ယၫဘၪ ကဆါယွၩ အဆၧယၫ့ၥုၪ့ယၫ့ၥၭကကၠၪ  အဝ့ၫယိၭထၬဆၧအဎၧၫ့ ႇ အဆၧကၪဆၧဂဲၩၥံၪလဖၪ ကဘၪခွံၬ ၡိၬခွံၬလိၪဝ့ၫဒၪအကၠီၩ့  အဆၧၥ့ၪယၫန့ထၪ့ဂီၩ့ ဒုၪချဲၩ့လၧ အမိမိလအီၪလၧၩ့ ဘၪ အီၪက့ၪထၬထဲၩ့ ၥုၪ့ၥၭအဆၧလၩ့ ဎိၭလၧ အမိမိနီၪလီၫႉ လၧအဂုခိၪ လအဲၪဒိၭ ဘၪ ကၭၥလ့ၬ အဆၧဘိၪ့ဆၧဘၩဂဲး ဆၧဂၩ့ဒီၩ့ခွၫ ၡံၫယၫလဂၩ ကဘၪဒိၪ ၦဆံၫ့ဎံၪ ပၫဒရဲၫပံၫအိၫအဂဲးအဂး ဖီထၪ့လံၬ ဆံၫ့ဎံၪဂီၩ့ကကၠၪ အၥၭအဝံစၧၩ့လၩ့အီၪထဲၩ့ဝ့ၫဒၪလၧ  ကၭၥလ့ၬ ဆၧ ဘိၪ့ဆၧ ဘၩဖၧၩ့ယူၭနီၪလီၫႉ လခဲၫ့ ဖီထၪ့ထဲၩ့ ၥီၩမၭ  (စ်) မၫတိၫ့ အလံၬစီၩ့ၥံၪႇ ၦဆံၫ့ဎံၪ အီၩဂုၭစတ့ၩ့ ကွ့ၭထုၬဖျီၪထၪ့ထၬ  ဆၧလီၩလၩ့ ဆၧဒဲၩ ဘၭအဂဲး အလံၬစီၩ့ၥံၪဂီၩ့ အဝ့ၫအနးၥၭ ဆၧလ့ၩထၪ့လ့ၩထီၫ ကအီၪအဂး အၪ့န့ထၪ့ထဲၩ့ အဂဲးအ ဘၭလၧ လံၬစီၩ့ဖၧၩ့ၥံၪနီၪအကၠီၩ့ ၡံၫယၫ ထုၬလီၩဖျီၪထၪ့ထၬ အီၪဝ့ၫဒၪနီၪလီၫႉ

            အဲၪကွံၩ ဘၪထၧၫ့ဖုဝဲထံၩၥိၭထီးအလူၬၥံၪဧႉႇ အဂုခိၪ လအီၪက့ၪထၬဘၪ ဆၧဆူနဲၩနးမံၩ့ ဆၧဂၩ့ဒီၩ့ခွၫ ၡံၫယၫ လဂၩ လံၬဆံၫ့ဎံၪ အစီၩ့အမၩ့အကၠီၩ့  အီၪက့ၪထၪ့ထဲၩ့ အဆၧဆူနဲၩန့ဝ့ၫဒၪလၧ ကၭၥလ့ၬဎြံၬ  ဆၧဘိၪ့ ဆၧဘၩဖၧၩ့ယူၭအကၠီၩ့ ဟီလံၩဝုၭ (စ်) ဆၧဂၩ့ဒီၩ့ခွၫ ၡံၫယၫအဂဲး ယရၩလၩ့ ဖ့ၪၥ့ၪယၫအ့ၪ ဘၪနၥံၪ ဘဲၫယီၩၥိၭနီၪလီၫႉ  အဲၪကွံၩ ဘၪထၧၫ့ဖုဝဲထံၩၥိၭထီးအလူၬ မွဲနၥံၪ လၧၫ့ဎွ့ၩဝ့ၫဒၪလၧ  ယွၩအဆၧအဲၪဆၧကွံၩ ကိၭဒံၩကိၭဂၩလါဆံၭနဲၪႉ