လံၫမၫဝံးဖိၪ ၦဆံၫ့ဎံၪရိၭ

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧ အအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ လံၫမၫဝံးဖိၪ ၦဆံၫ့ဎံၪရိၭ အဂဲးအကၠီၩ့နီၪလီၫႉ ၦဆံၫ့ဎံၪရိၭယီၩ ဘၪထိးရွံထၪ့အၥၭလၧ ခး (တောင်အမေရိက) အဂုထုၬ မွဲဝ့ၫၦဆံၫ့ဎံၪလဂၩနီၪလီၫႉ အဝ့ၫယီၩ အီၪဖျဲၪလၧနံၫ ၁၅၈၆ နံၫ ခး (ပီရူး)ႇ ဝံး (လီမာ) နီၪလီၫႉ အဝ့ၫအမ့ၬပၫနီၪ အီၪဝီၩကၠီၪအကၠီၩ့ အမိမိကိၭအဝ့ၫလၧ ရိၭ ဖီၫဆၧဆူၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪရိၭယီၩ ဒိၭန့ ၦမုၪနၩ့ လဆိၩယၫ ဆၧအုၩ့လၩ့ဂီၩ့ အမိမိဒဲ အဖဖနီၪ အဝ့ၫထၪ့ၡါလၩ့ဖၭအဂး ဆၫ့ထွ့ၫဝ့ၫလါနၫ့ အဝ့ၫလထိးဆၧၫ့ဘၪဝ့ၫနီၪလီၫႉ ၦလၧအၥၭဆုးလီၩ့အီၪလၧ အဝ့ၫအဖၫ့ခိၪလဖၪ ကစဲၪ့ဖၭထၪ့ခွံၬလၧ အဝ့ၫအအီၪအဂး အဝ့ၫယီၩ အမ့ၬအဎံၫအလၩဒဲ အစူၪဘီၩ့ ဂ့ၩဘၪဂ့ၩစဲၪလဖၪနီၪ ဒံၭဒူၭဝ့ၫလၧ ဎွံၬၥၪမုၬနီၪလီၫႉ

ထီၩလၧအၥၭ ၂၀ အခံၫ့နီၪ ၦဆံၫ့ဎံၪရိၭလဂၩ လ့ၩနုၬလၩ့လၧ St. Dominic မံၭထၭမုၪ အခရၧၫ့ဖၧၩ့နီၪလီၫႉ စႇ ထၪ့လၧ လၧနီၪအမ့ၬယၫ အဝ့ၫယီၩ လၧအဂံၫ့အီၪအလးႇ ကျိၭအဝၩ့ဖၧၩ့ အီၪလၧကၠၩ့ကဖျိၪ့နီၪ အီၪစႇ ထၪ့ အီၪၥၭမၧၫ့ ဘဲၫၦဆံၫ့ဎံၪၥံၪ အဆၧၥၭမၧၫ့နီၪလီၫႉ အဝ့ၫယီၩ ဘၪဒၪဆၧၫ့ယၫ ဆၧဒူၪဆၧဒၩႇ ဆၧမၩထံၬမၩထၬဆၧ အၪမၬလါနၫ့ ထိးဆၧၫ့ဝ့ၫန့ဝ့ၫဒၪလၧ ဆၧဆူၩနဲၩႇ ဆၧၥၭဆၧၩ့ ဎိၩဒိၪဖၧၩ့နီၪလီၫႉ

မုကနံၩကကၠၪ ကဆါဎြံၬ လီၩ့ထးထၬအဝ့ၫနီၪ “ဆၧတတုၬတနၭ ဎိၩဒိၪဂဲၫဂီၩ့ကကၠၪ ယွၩအခိးအတၩ ကဂဲၫနီၪလီၫႉ မွဲဆၧနီၪ ဆၧလၧထုၪ့စူၪယၫ လအီၪဘၪ ၦဂူၫဂၩမၬ ကထီၩ့လၧ မူၭခိၪဘၩ့မုးအဂး ဖၧၩ့ၥၭနီၪ ဒၪထၪ့ဝ့ၫ လကဲၪၥ့ၪဘၪနီၪလီၫႉ ဆၧလၧဆၧချဲၩ့လဖၪယီၩ နါဂၧၫ့ဝ့ၫဂီၩ့ကကၠၪ နးၥၭဂဲးဘၭဎိၩဒိၪလၧၫ့ဒူၩ လ့ၩကိၭအဝ့ၫလၧ ဖၧၩ့ၥၭမုဂီၩ့ “အိၩ ၦၡၩထီးအလူၬၥံၪဧ့ႇ ခိၭနါယူၭလီၫႉ ပဝ့ၫၥံၪ အ့ၪပလထိးဆၧၫ့ဘၪ ဆၧကၪဆၧဂဲၩႇ ဆၧစူၭဆၧဆၫစွါ ဘဲၫ ပန့ထၪ့ ဆၧအခိးအတၩအဂး လကဲၪၥ့ၪဘၪနီၪလီၫႉ” လီၩဖျီၪထၪ့ဝ့ၫလၧ အလူၬဎိၩဒိၪအဂး ဘၪထိးဆၫ့ထွ့ၫအၥၭနီၪလီၫႉ

ၦဆံၫ့ဎံၪရိၭယီၩ ကိၭလၥံၪဒ့ၭဘၪ မုၡၩခိၬအခံၫ့နီၪ လီၩဝ့ၫဒၪ “အိၩ ကဆါယွၩဧ့ႇ မၩဂုထၪ့အၪထၪ့ ယဆၧကၪဆၧဂဲၩႇ ဆၧဆုၭဆၧဆၫ လဖၪၥံၪနီၪလီၫႉ လၧဆၧဆုၭဆၧဆၫႇ ဆၧကၪဆၧဂဲၩၥံၪယီၩအဖၧၩ့ မၩဂုထၪ့အၪထၪ့ နဆၧအဲၪဆၧကွံၩ လၧယၥၭခံဖၧၩ့နီၪအကၠီၩ့ လီၩထးထၬဝ့ၫနီၪလီၫႉ

ၦဆံၫ့ဎံၪရိၭယီၩ နံၫ ၁၆၁၇ နံၫ အၥၭ ၃၁ နံၫနီၪ ၥံၪဖီၩခွံၬဝ့ၫဒၪလီၫႉ အဝ့ၫယီၩ ဘၪထိးရွံထၪ့အၥၭလၧ ၦအီၪပဒၩ့ထၬ ခး (တောင်အမေရိက) ၦဆံၫ့ဎံၪလဂၩနီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥီၭ ထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါဎြံၬ အဆၧအဲၪဆၧကွံၩလါဆံၭႉ

 

Add new comment

9 + 5 =