မ့ၫရံၫစလ့ၫဆၫ

           ထၧၫ့ဖုဝဲထံၩၥိၭထီးအလူၬၥံၪဧႉ ႇ မံၩ့ဎိၩၥၪဖျီၪမုၪခွၫလၧအအီၪ အဆၧရၩလၩ့ဖၧၩ့ ယအဲၪဒိၭရၩ လၩ့န့အ့ၪဘၪ နၥံၪ ၦအမံၩ့ဎိၩလဂၩနီၪမွဲဝ့ၫဒၪ မ့ၫရံၫစလ့ၫဆၫ အဂဲးအကၠီၩ့နီၪလီၫႉ မ့ၫရံၫစလ့ၫဆၫ အမိအဖါၥံၪနီၪ မွဲဝ့ၫၦအၡၪ့ လကၭဒံၭဘၪ အဖါဖါနီၪ အီၩၥံၭထံၫဂၬထံၫဒိၪမၬဒ့ၭတၭ ဆၭခၪ့ဖံၭအ ဆၧမၩဖၧၩ့ ကျိၪစ့ၩန့လဖၪ လလၧၫ့ဎွ့ၩထၪ့ ဘၪနီၪလီၫႉ အမိမိနီၪ မၩ ဖီၪ့ထၪ အဆၧမၩလါနၫ့ အဝ့ၫ ၥံၪ အထၧၫ့ဖုဝဲလဖၪ အီၪဝ့ၫ ဎူၫဂၩဒ့ၭအကၠီၩ့ ကအၪ့က အီၪအဂး ဆၧကၪဆၧဂဲၩအီၪဝ့ၫဒၪ တၡါဒ့ၭ ဘဲၫယီၩၥိၭနီၪလီၫႉ

            မ့ၫရံၫစလ့ၫဆၫယီၩ အၥၭအီၪဝ့ၫ (၇)  နံၪ့အခံၫ့ ဒံၭလီၫ ႇ ဘၪလ့ၩမၩဆၧမၩလၧ စဲၭဆၧမၩ လး ကလးဖၧၩ့ နီၪလီၫႉ ဘၪထၪ့ဆၧမၩလိၪဒံၭ ႇ ဘၪမၩဆၧမၩလၧ စဲၭဖၧၩ့ဒံၭနီၪလီၫႉ မ့ၫရံၫစလ့ၫဆၫ ၥံၪအဂံၪ့နီၪ ထံၫလန့ဘၪ ႇ မ့ၪလန့ဘၪ ဂီၩ့ ဘၪအီၪလၧ အလးအဲၪ့ခိၭဖၧၩ့အကၠီၩ့ ဆၧဆီၪ့ဆၧချဲၫ့ အဂး ဆၧအဂ့ၩလကဲၪထၪ့ဘၪ နးမံၩ့နီၪလီၫႉ  မ့ၫရံၫစလ့ၫဆၫ အဆၧၥၭမၧၫ့ယီၩ ဘၪအီၪၥၭမၧၫ့ လၧ ဖၧၩ့ၥၭဖၧၩ့လီၫတၭ ကၪဂဲၩဝ့ၫဒၪဒိၪမၬဒ့ၭနီၪလီၫႉ လယံၬလ မီးဘၪ ဘၪစဲၪ့ထၪ့ခွံၬလၧ ဆၧမၩလိၪ လးဖၧၩ့တၭ ကဘၪဆုးမၩမနီၪလဲၪ နီၪ အၪ့ဎၬထၪ့ဝ့ၫဒၪနီၪလီၫႉ

             အခံၫ့အနီအိၩ လၧခးဆူၫဒၫ့လးဖၧၩ့ ဆၧအီၪ့ကီၪ့ဆရၫလဂၩ အလးလၩ့ဝ့ၫဒၪလၧ မ့ၫရံၫ စလ့ၫဆၫၥံၪအီၪ အလးတၭ ဆရၫလဂၩအဆၧရၩလၩ့လဖၪနီၪ  ဘၪထံၭ မ့ၫရံၫစလ့ၫဆၫ အၥၭဒိၪ မၬဒ့ၭနီၪလီၫႉ အဝ့ၫနးဆ့ အဲၪဒိၭ ကဲၪ ဘဲၫ ဆၧအီၪကီၪ့ဆရၫလဂၩၥိၭလါနၫ့ လၧအဝ့ၫအီၪ ဆၧအၪ ဎၬထိၪတွၭ ႇ ဆၧၥ့ၪယၫနၪၥ့ၪ ဆၧအမံၩ့အစံၩ့နီၪ လိၪဝ့ၫဒၪကိၭမံၩ့အကၠီၩ့ အဝ့ၫ အဲၪဒိၭကဲၪ ဆၧအီၪ ကီၪ့လဂၩနီၪ ၦၡၩၥံၪၥၭအဆၧလၩ့ဎိၬလအီၪဘၪနးဂၩနီၪလီၫႉ လါနၫ့ ယွၩအလိၪအီၪဝ့ၫဒၪအကၠီၩ့ အဝ့ၫအဆၧဂဲးဆါဘၭဆါအီၪထီးအလူၬလဖၪ ကဆါယွၩဖ့ၪလၫ့ထဲၩ့အ့ၪအဝ့ၫ အခွးအယါနီၪလီၫႉ

            နံၪ့အခံၫ့ယံၬထၪ့ကကၠၪ ကဲၪထၪ့ဝ့ၫဒၪ ဆၧအီၪကီၪ့ဆရၫမုၪ မ့ၫရံၫစလ့ၫဆၫယူၭနီၪလီၫႉ အဝ့ၫကဲၪထၪ့ ဆၧအီၪကီၪ့ဆရၫမုၪဂီၩ့ လုထၪ့လၩ့အၥၭလၧ အၫဖရံကၭ ၦအၡၪ့ဖိၪၥံၪအီၪအလးဖၧၩ့ နီၪလီၫႉ အလးနီၪ ဆၧအၪ့ ဎွ့ၩအၪ့ဆၫၦၡၩ ဎီးၡၩအဆၧမၩ အီၪဝ့ၫဎိၩဒိၪအလးမွဲဝ့ၫဒၪနီၪလီၫႉ အလးထနီဖၧၩ့ အဝ့ၫၥံၪအလုၫလါအီၪဝ့ၫက မံၩ့နီၪ မိလဂၩ အ့ၪအီၪဖျဲၪအဖိၪ လထုၪ့ဎး နံၫဂၩစွါ ဘဲၫ ဘၪမၩၥံၪခွံၬဝ့ၫဒၪနီၪလီၫႉ အဝ့ၫၥံၪအဆၧနဲၩ အီၪဝ့ၫလမံၩ့ နီၪမွဲဝ့ၫ ဖိၪၥၪနံၫဂၩဖၧၩ့ လဂၩနီၪ မွဲဝ့ၫမုၪခီၩလဲး အဖိၪအကၠီၩ့ အဝ့ၫၥံၪ ဆူနဲၩထၬဝ့ၫဘဲၫယီၩၥိၭနီၪလီၫႉ

            ထၧၫ့ဖုဝဲထံၩၥိၭထီးအလူၬၥံၪဧ့ ႇ မ့ၫရံၫစလ့ၫဆၫယီၩ ကဲၪထၪ့ဆၧအီၪကီၪဆရၫမုၪလဂၩ ယူၭအကၠီၩ့ အၫဖရံကၭမုၪၥံၪ ခွံၬၡိၬထၬအဖိၪလဖၪ အဝ့ၫအၪ့လုဖိၪထၬထီးအလူၬနီၪလီၫႉ မိလဂၩ အ့ၪအၪ့လု အဖိၪ အဎဲၩ့စွါဘဲၫ ကဘၪမၩၥံၪခွံၬဝ့ၫဒၪ လုၫလါယီၩ ကလၩ့မါအဂး မ့ၫရံၫစလ့ၫဆၫ ဒုၭဆၧၫ့ခွံၬဝ့ၫဒၪနီၪလီၫႉ အၫဖရံကၭၦမုၪၥံၪအခွးအယါအဂး ဆၧဒုၭဆၧၫ့ဆၧဖၧၩ့ ၦအမံၩ့ဎိၩဝ့ၫဒၪ လဂၩမွဲဝ့ၫလဂၩနီၪလီၫႉ အဝ့ၫအီၪ လဂၩဎးလီၫအခံၫ့ နးဆ့ချဲၩ့လဂၩလီၫတၭ ၦၡၩစီၪအဝ့ၫလၧ ၦအ ဂီၩ့ ဖိၪလဂၩနီၪလီၫႉ အၡါမၪနီၪ အဝ့ၫနီၪ ချဲၩ့လၧယွၩနီၪလီၫႉ ဒုၭအီၪလၩ့အၥၭလၧယွၩ ဘူၭဘူၭထံၭ ထံၭ နီၪလီၫႉ အီၪလၧယွၩဘူၭထံၭအကၠီၩ့ အဝ့ၫအဆၧဖံၭဆၧမၩၥံၪနီၪ ဆၧကၪဆၧဂဲၩအီၪလါနၫ့ မၩကဲၪထၪ့ဝ့ၫန့ အကၠီၩ့ မ့ၫရံၫစလ့ၫဆၫ ဖ့ၪၥ့ၪယၫအ့ၪပၧၩ ယူၭနီၪလီၫႉ မွဲဆၧနီ ပကအီၪ ဘူၭထံၭ လၧယွၩ ကိၭအဆၧၫ့ကိၭအထီလါဆံၭနဲၪႉ