မဲမံၫလျၫ့ကိၫဘ့ၪ

ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖီၪ မုခွၫလၧအအီၪအနီၫ့အဆၧ ရၩလၩ့ဖၧၩ့ မုကနံၩယီၩ ယအဲၪဒိၭယၩလၩ့န့အ့ၪဘၪနၥံၪနီၪ မွဲဝ့ၫဒၪ မဲမံၫ လျၫ့ကိၫဘ့ၪ အဂဲးအကၠီၩ့နီၪလီၫႉ မဲမံၫလျၫ့ကိၫဘ့ၫယီၩမွဲဝ့ၫ ပိၪလၫ့ဆၨၩဖိၪ  ဘိၪ့ခိၪၥၫ့ခၫလဂၩနီၪလီၫႉ လၧနံၪ့ ၁၉၄၁ နံၪ့အိၩ ၦၡၩဘၪ ထိးဖီၪ့ထၬအၥၭ အလးကလးဖၧၩ့ ၦၡၩလဂၩ အၪ့ဂူၪစဲၪ့ဖျိၭထၪ့တၭ ၦၡၩအၪ့ဂူၫစဲၪ့ဖျိၭထၪ့လဂၩ  ယီၩ ဘဲၫလမွဲဘၪ လအီၪခရၧၫ့လး အဂးၦၡၩဘၪထိးဖီၪ့ထၬအၥၭလ ဖၪအၪ့ကံၩ့ ဘၩဆိၪဖၪဝ့ၫဒၪနီၪလီၫႉ ၦၡၩအၪ့ဂူၫစဲၪ့ဖျိၭထၪ့မုကနံၩနီၪ ၦၡၩဘၪထိးဖီၪ့ ထၬအၥၭထီးအလူၬၥံၪ ဘၪအီၪဝ့ၫလၧ ဆၧၥၭမဲၪၥၭဖျဲၩ့ ဖၧၩ့နီၪလီၫႉ ၦၡၩလၧ ၦၡၩလၧ အၪ့ဂူၫစဲၪ့ဖျိၭထၪ့အလးနီၪ မွဲဝ့ၫ ခရၧၫ့ ၁၄ အလးဖၧၩ့မွဲဝ့ၫဒၪအကၠီၩ့  ၦအီၪထးလၧခရၧၫ့ဖၧၩ့အဂၩ ၆၀၀ နီၪ မုဂၫဆၧအၪ့ကအၪ့ဘၪဝ့ၫ အဂး အခွးအယါလအီၪလၧၩ့ဘၪနီၪလီၫႉ ဘၪမနီၪလဲၪစွါဘဲၫ အဝ့ၫၥံၪအလိၬၥၭလဂၩအၪ့ဂူၫစဲၪ့ဖျိၭထၪ့အကၠီၩ့နီၪလီၫႉ

လခဲၫ့ကနံၩနးဆ့အဝၫၥံၪအလိၬၥၭလဂၩ အၪ့ဂူၪစဲၪ့ဖျိၭထၪ့အကၠီၩ့ ဘၪလ့ၩဆၧၫ့ထုၪ့အီၪလၧ ဆၧခိဖၧၩ့အကၠီၩ့ ၦၡၩလနၩ့နၩ့နီၪ ထိးဆၧၫ့လန့ဘၪ အဂဲးအဘၭ လအီၪလၧၩ့ဘၪအကၠီၩ့ လၩ့ထံၩဖၭ ထးလၧအလးထနီဖၧၩ့နီၪလီၫႉ ၦၡၩဘၪထိးဖီၪ့ထၬအၥၭလဖၪနီၪ လၩ့ထံၩဖၭလါနၫ့ ၦၡၩကဘျၩ့အဝ့ၫ ၥံၪ ကယိထွ့ၪမၩဆၧၩ့အဝ့ၫၥံၪ လအီၪဘၪနီၪလီၫႉ ၦၡၩဘၪထိးဖီၪ့ထလဖၪၥံၪနီၪ ဘၪဆၧၫ့ထုၪ့အီၪလၧ ဆၧ ခိကျၩလဖၪၥံၪနီၪ ထီၩ့မုနၩအခံၫ့ ၥုၭခိၪနါလဂၩနီၪ ဂဲၫလၧအဝ့ၫၥံၪအအီၪဂီၩ ဂဲၫထုၬထၪ့ဆၧလရၧၫ့မွဲဝ့ၫလီၫႉ ၥုၭခိၪနါအဆၧလရၧၫ့ယီၩနီၪ အဝ့ၫၥံၪအဂး ဆၧၥုၪ့ဎွံၪၥၭထိၬမွဲအ့ၬႉ လၧအဝ့ၫၥံၪဖၧၩ့အလိၬၥၭလဂၩအၪ့ဂူၫစဲၪ့ ဖျိၭထၪ့အကၠီၩ့ ၦလၧအအီၪ့ထးအဂၩ ၆၀၀ ဖၧၩ့ ၁၀ ဂၩနီၪ ကဘၪ ထိးအီၪဝံအၥၭဆၧအၪ့ဂီၩ့ ကဘၪၥံၫခ့ၬအ့ၪ ၦ လၧအၪ့ဂူၫစဲၪ့ဖျိၭထၪ့ လဂၩအဂးမွဲဝ့ၫဒၪနီၪလီၫႉ လခဲၫ့ အ့ၪၦအၪ့ဂူၫစဲၪ့ဖျိၭထၪ့စွါဘဲၫ ကဘၪၥံၫခ့ၫအ့ၪ အဂၩ၂၀ အဂးဆ့ ထုၬလီၩဖျီၪထၪ့ထၬဝ့ၫဒၪဒံၭနီၪလီၫႉ