ဘိၪ့ခိၪၥၫ့ခၫ ရူၫတံၩလံၫအိၫ

 လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ မံၩ့ဎိၩၥၪဖျီၪ မူၪခွၫလၧ အအီၪအနိၫ့ အဆၧရၩလၩ့ဖၧၩ့ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦအဒုၭဆၧၫ့ဆၧလၧ ၥုၭဆၧပၧၩ့ စီၩ့မၩ့ရၧးစၧးထီဂီၩ့ အီၪဂုးခၧၫ့လၧ ထံၫခးဖိၪၥံၪ ကၠၧၫ့ ကၠၧၫ့ ဘိၪ့ခိၪၥၫ့ခၫ ရူၫတံၩလံၫအိၫ အဂဲးအကၠီၩ့နီၪလီၫႉ

        ဘိၪ့ခိၪၥၫ့ခၫ ရူၫတံၩလံၫအိၫယီၩ လၧ (ဂျေဆွစ်) ခရၧၫ့ဖၧၩ့ ဘိၪ့ခိၪၥၫ့ခၫ လဂၩ မွဲဝ့ၫလီၫႉ အီၪဂုးခၧၫ့လၧ ၦအၡၪ့ဖိၪၥံၪအဂးဂီၩ့  ဒုၭဆၧၫ့ ၥုၭဆၧပၧၩ့ စီၩ့မၩ့ရၧးစၧး အကၠီၩ့ ဘၪထိးမၩၥံၫခွံၬ အၥၭမွဲဝ့ၫဒၪနီၪလီၫႉ ဘၪထိးမၩၥံၫအၥၭဂီၩ့ ယံၬထၪ့ထဲၩ့နံၪ့ (၄၅) ကကၠၪ ဘၪဆၧထံၭထၪ့အဝ့ၫလၧ ၦဆံၫ့ဎံၪအလးနီၪလီၫႉ

        ဘိၪ့ခိၪၥၫ့ခၫ ရူၫတံၩလံၫအိၫယီၩ ဖီၪ့ထၪ့ဖံၭထၪ့ ကဆါယွၩအဆၧဖံၭဆၧမၩလၧ ၦအမၩဆံၬ ဖိၪကၩဖိၪ ၦအၡၪ့ဖိၪၥံၪအကျၩဂီၩ့ ဖ့ၪလၫ့လၩ့အၥၭလၧ ၦအၡၪ့ဖိၪၥံၪအဂး ဂ့ၩဂ့ၩ ဘၪ ဘၪအကၠီၩ့ ၦအၡၪ့ဖိၪၥံၪ အဲၪဒိၭအဝ့ၫဒိၪမၬဒ့ၭ လကၭဒံၭ ဘၪ ၦအၡၪ့ဖိၪၥံၪ နီၪ ဆၧၥ့ၪယၪနၪၥ့ၪ အီၪအၪ ထၪ့ထဲၩ့လၧ ဆၧအီၪကီၪ့အဂဲးအဖးဖၧၩ့နီၪလီၫႉ

        ဘိၪ့ခိၪၥၫ့ခၫ ရူၫတံၩလံၫအိၫယီၩ ဖီၪ့ဂုးခၧၫ့ထၬ ဘိၪ့ခိၪၥၫ့ခၫ အဆၧၥၭမၧၫ့နီၪ မွဲဝ့ၫဒၪ ဆၧလၧဘိၪ့ခိၪၥၫ့ခၫနီၪ ဎြံၬဖိၪၥံၪအဂးဒဲ ၦၡၩၥံၪအဂး ကဘၪအၪ့နၩ့ဖ့ၪၥ့ၪ ယၫအ့ၪ ဎြံၬအဆၧၥၭထိၬအပရၧၫ့ အဂးမွဲဝ့ၫဒၪနီၪလီၫႉ

        ဘိၪ့ခိၪၥၫ့ခၫယီၩ အီၪဖျဲၪလၧ နံၪ့ ၁၉၂၈ နံၪ့ လၧ (ဆန်ဆာလ်ဗာဒို) ဝံးအလး ဖၧၩ့နီၪလီၫႉ အဝ့ၫနီၪ ခၪ့ဖျီၪလၧ အၥၭဆံၭ အခံၫ့အိၩ အၥၭဆုးလၩ့အီၪဝ့ၫဒၪ ကဖ့ၪလၫ့ လၩ့အၥၭလၧ ၦဂူၫဂၩၥံၪ အဂးအကၠီၩ့  နံၪ့ ၁၉၄၁ နံၪ့နီၪ လ့ၩထၪ့ဆၧမၩလိၪလၧ  ၦက ကဲၪထၪ့ ဘိၪ့ခိၪၥၫ့ခၫ ဆၧမၩလိၪလး ဖၧၩ ့ဂီၩ့  ကဲၪထၪ့ (ဂျေးဆွစ်)  ဘိၪ့ခိၪၥၫ့ခၫ နီၪလီၫႉ အဝ့ၫထၪ့ ဆၧမၩလိၪလးလဖၪၥံၪနီၪမွဲဝ့ၫဒၪ (ဗင်နီဇွဲလား၊ အက်ကွေဒေါ၊ ပနားမား ၊ စပိန်၊ ဘယ်လ်ဂျီယံ ) ထံၫခးဖၧၩ့ၥံၪနီၪလီၫႉ အဝ့ၫနီၪ ဆၧၥ့ၪယၪနၪၥ့ၪ အီၪအၪမၬဒ့ၭလါနၫ့  အၥၭထၪ့ထီၫ လအီၪက့ၪထၬ ဘၪဝ့ၫနီၪလီၫႉ

        ၡၩခံးဂးဖၧၩ့ ဆၧတီၩဆၧလီၩ့ လအီၪဘၪၥံၪဆ့ အီၪဂုးခၧၫ့ထဲၩ့အ့ၪဝ့ၫလၧ ၦအၡၪ့ ဖိၪၥံၪ အဂးနီၪလီၫႉ မွဲဆၧနီ ၦလၧအမၩ ဆၧလတီၩလလီၩ့ဘၪ ၦၡၩၥံၪလဖၪ ဒၪအဝ့ၫ လၥ့ၪလၧၩ့ဘၪဂီၩ့ မၩၥံၫခွံၬ ဘိၪ့ခိၪၥၫ့ခၫ ရူၫတံၩလံၫအိၫနီၪလီၫႉ  အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬၥံၪဧ့ႇ ၦအဒုၭဆၧၫ့ ၥုၭအဆၧပၧၩ့အစီၩ့အမၩ့အရၧးစၧး ဘိၪ့ခိၪၥၫ့ခၫ ရူၫတံၩလံၫအိၫ အဂဲး မွဲဝ့ၫထၨၪယီၩလီၫႉ ထၧၫ့ဖုဝဲထံၩၥိၭထီးအလူၬ မွဲအီၪဂုးခၧၫ့န့ဝ့ၫ ဒၪလၧ ဆၧတီၩဆၧလီၩ့ ဖၧၩ့ လါဆံၭႉ