ဖိၪၥၪလဂၩ လ့ၩဒၪဘၪ ၥၫ့ဎွၩဒိၪ ဖရၫ့စ့ၭ ဂီၩ့ အဆၧဆၫ လၩ့မါ ဝ့ၫဒၪအဂဲး

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉႇ မံၩ့ဎိၩၥၪဖျီၪ မုၪခွၫလၧအအီၪ အနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ၥၫ့ဎွၩဖရၫ့စ့ၭ အဂဲးအကၠီၩ့ နီၪလီၫႉ  လၧအဖီၩ့ခွံၬနံၪ့ ( ၂၀၂၁ )  နံၪ့အခံၫ့အိၩ ဝံး ( ဗာတီကန်) လးဖၧၩ့ ၡၩခမျၧးၥံၪ အဆၧဒၪ လၩ့ဎိၭအီၪလၧ ၥၫ့ဎွၩဒိၪဖရၫ့စ့ၭအခံၫ့ ဖိၪၥၪခွၫဖိၪ အၥၭကအီၪဝ့ၫ (၁၀ )နံၪ့  လဂၩနီၪ ဖျုထိၭ ဆၧဆၫ ဒဲ အခိၪနူၬလဎွ့ၩ ဘၪ ဆၧဆၫ ဘၪထိးဝ့ၫဒၪတၭ ဂဲထုၪ့လၧအလးဂီၩ့ လၧၡၩခမျၧးအကျၩ ကလ့ၩဒၪလၧ ၥၫ့ဎွၩဒိၪဖရၫ့စ့ၭအဂး ကျ့ၭစၨၭဝ့ၫဒၪနီၪလီၫႉ ဆၧဆၫဆါဖိၪၥၪခွၫဆံၭဖိၪယီၩ နံၪ့ကနံၪ့ အထးဖၧၩ့ယီၩ အဆၧဆၫဂဲၫဎိၩထၪ့ဝ့ၫဂီၩ့ ၥံၪ့ဎွံၪဆရၫၥံၪ အၪ့ယိၪခဲၫ့ကံၭဝ့ၫဒၪလၧ ကကဲၪထၪ့ထဲၩ့ အခိၪနုၬ ခဲၩ့ဆၫ ဆၧဆၫနီၪလီၫႉ ဖိၪၥၪခွၫဆံၭဖိၪယီၩ ကဘၪဂဲၫနဲၪအၥၭလၧ ၥံၪ့ဎွံၪဆရၫအဂး ဂဲၫထီၩ့လၧ ဝံးရီမၩ မွဲဝ့ၫဒၪနီၪလီၫႉ အဝ့ၫၥံၪ အထၧၫ့ပမိနီၪ အီၪလၧ ခး (အီတလီ) လံၩထံၭအလး မွဲဝ့ၫဂီၩ့ ဂဲၫဘျၩ့အဖိၪခွၫအဆၧဆၫအဂး ဂဲၫအၪ့လံၩ့အီၪအလးနီၪ ဘူၭထဲးလၧ            ( စိန်ပီတာ) အနဲၩ့ နီၪလီၫႉ

           အဲၪကွံၩ ဘၪထၧၫ့ဖုဝဲထံၩၥိၭၥံၪဧ့ႇ ၦထၧၫ့ပမိဝ့ၫနံၫဂၩယီၩ ကစဲၪ့ထၪ့ဂၭဖၬလၧ ခီၫ့အဂးလ့ၩ ဝ့ၫကကၠၪ ဒၪၦၡၩၥံၪ ဆၧၫ့ထၧၫ့အီၪ ဖၧၩ့ၥၭထၧၫ့ဘီၩ့ယၫ အၪအၪဒ့ၭတၭ လ့ၩအၪ့စၪ့ဝ့ၫနီၪလီၫႉ ဆၧၫ့ထၧၫ့အီၪ ၦၡၩလဖၪၥံၪယီၩ မွဲဝ့ၫ ကဘၪဒၪလၧ ၥၫ့ဎွၩဖရၫ့စ့ၭအကၠီၩ့ၥ့ၪယၫ ဘၪဝ့ၫတၭႇ အဝ့ၫ ၥံၪနးဆ့ အဲၪဒိၭဒၪဝ့ၫလါနၫ့ လအၪ့န့ဆိၪထၬ ဘၪ အခွးအယါနးမံၩ့အကၠီၩ့ ကဒၪဘၪလၧ ၥၫ့ဎွၩ ဖရၫ့စ့ၭအဂး အဆၧယိလါလအီၪလၧၩ့ ဘၪနီၪလီၫႉ မွဲဆၧနီ လ့ၩဆၧၫ့နၩ့အီၪလၧ အလးလစီၪ့ဖၧၩ့ လၧ ၥုၪ့အုၭၥၭအုၭဖၧၩ့နီၪလီၫႉ အဝ့ၫၥံၪ အထၧၫ့ပမိဆၧၫ့နၩ့အီၪနီၪ လၧ          ( ဗာတီကန်) လးဖၧၩ့ ၦအတၩလၫ့အီၪလၧ ကဘၪမၩဆၧၩ့ ၦၥုၪ့က့ၭၥၭၡါၥံၪႇ ဆၧဆီၪ့ဆၧချဲၫ့လအီၪဘၪ ၦၡၩၥံၪ အဂး ခိၪနါမွဲဝ့ၫတၭ ခိၪနါလဂၩနီၪ အဆၧမၩဆၧၩ့အကၠီၩ့ အဝ့ၫၥံၪ အထၧၫ့ပမိနံၫဂၩ လ့ၩနုၬလၩ့ ဘၪလၧ             ( ဗာတီကန်) လးဝၩ့ဖၧၩ့နီၪလီၫႉ အဝ့ၫၥံၪအထၧၫ့ပမိနီၪ ထီၩ့လၧ (စိန်ပီတာ)  လးဝၩ့ဖၧၩ့ကကၠၪ ဆၧၫ့နၩ့အီၪ ဘၪလၧ အမ့ၬယၫထုၬနီၪလီၫႉ

          ကထုၪဎးဖိၪၥၪဆၧဆၫဆါဖိၪယီၩ ဂဲထုၪ့လၫ့လၧ အလဖၧၩ့ဂီၩ့ လ့ၩလၧ ၥၫ့ဎွၩဖရၫ့စ့ၭ ဆၧၫ့နၩ့အီၪအလးနီၪလီၫႉ အမိမိကိၭထဲၩ့လါနၫ့ လန့လၧၩ့ ဘၪတၭ အမိမိအၪ့ယိၪခဲၫ့ကံၭဝ့ၫဒၪနီၪ လီၫႉ (ဗာတီကန်) ဖၧၩ့ ၦအတၩလၫ့အီၪလဖၪနီၪ လဘၪအၪ့ယိၪခဲၫ့ကံၭဘၪဆၧနးမံၩ့အဂး လီၩဖ့ၪ ၥ့ၪယၫအ့ၪ ဖိၪၥၪအမိမိနီၪလီၫႉ ၥၫ့ဎွၩဖရၫ့စ့ၭ ဒၪလၩ့ဎိၭလၧ ၦၡၩၥံၪထီးအလူၬဂီၩ့ကကၠၪ ဂဲၫဒၪလၩ့ဎိၭ စဲၪထဲၩ့လၧ ဖိၪၥၪဆၧဆၧဆါ အထၧၫ့ပမိဂီၩ့ စံၭ ဘၪ ဖိၪၥၪအမိမိ “ အၪ့န့ထၪ့ နဂဲးန ဘၭဆံၭႇ နဂး ဆၧလကဲၪထၪ့ ဘၪ လအီၪ ဘၪနီၪလီၫႉ ယကဖ့ၪအ့ၪနၧၩ ဆၧမၩဆၧၩ့လၧ ယဆၧ ဘၩဆိၪဖၪ ဖၧၩ့အကၠီၩ့ ” ဖ့ၪဂဲးဖ့ၪ ဘၭအ့ၪ ဖိၪၥၪဆၧဆၫဆါ အမိမိနီၪလီၫႉ

          ထီၩ့ဝ့ၫမုဂၫအခံၫ့ကကၠၪ ၥံၪ့ဎွံၪဆရၫနီၪကိၭဖိၪၥၪအမိမိခွ့ၩဒိၭနါဂီၩ့ အဖိၪခွၫအဆၧဆၫနီၪ ဆၧအၪ့ယီၪခဲၫ့ကံၭအီၪအကၠီၩ့ႇ က ဘၪနဲၪထဲၩ့အၥၭလၧ ၥံၪဎွံၪဆရၫအီၪလိၪဝ့ၫဒၪအဖျဲၪအကၠီၩ့ႇ မွဲဆၧနီ လ့ၩဖ့ၪနဲၪ အဖိၪခွၫ ဆၧဆၫဆါယီၩလၧ ၥံၪ့ဎွံၪဆရၫအအီၪ လ ဘျၩ့ဒီၭနီၪလီၫႉ ယံၬထၪ့ထဲၩ့ ၥုၪ့ၥၫ့ ဂီၩ့ အဆၧဆၫအဂဲးအဖးအီၪဝ့ၫ ဘဲၫၥ့ၪလဲၪ လံၬ ဘျံၭစဲၪ့ထၪ့ကကၠၪ အဖိၪခွၫအဆၧဆၫနီၪ လအီၪလၧၩ့ ဘၪနးမံၩ့အကၠီၩ့ႇ ဘၪကဲၪထၪ့ဝ့ၫ ဘဲၫယီၩၥိၭ ဘၪနီလဲၪနီၪ ၥံၪ့ဎွံၪဆရၫၥံၪ လီၩလၥ့ၪ ဘၪ အကၠီၩ့ႇ ဖိၪၥၪအမိမိနီၪ စံၭ ဘၪဝ့ၫ လ့ၩဒၪလၧ ၥၫ့ဎွၩဖရၫ့စ့ၭဂီၩ့ ၥၫ့ဎွၩဖရၫ့စ့ၭ အၪ့ကံၩ့ ဘၩဆိၪဖၪအ့ၪ အဝ့ၫၥံၪအဂးတၭ အဖိၪခွၫနီၪ န့ထၪ့ထဲၩ့ ဘၪ ဆၧဆီၪ့ဆၧချဲၫ့ ဘဲၫယီၩအကၠီၩ့ႇ မွဲဆၧနီ စံၭခိးစံၭတၩ ဘၪ ၥၫ့ဎွၩဖရၫ့စ့ၭ ဒိၪဒိၪဒ့ၭအဂဲး လီၩဖျီၪထၪ့အ့ၪ ၦအအၪ့စၪ့ဆၧ ဘဲၫယီၩၥိၭအကၠီၩ့ ၥၫ့ဎွၩဖရၫ့စ့ၭ အဂဲး ယရၩလၩ့ဖ့ၪၥ့ၪယၫအ့ၪ ဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ