ပီၩ (လ်) တိၫနံၫယၫ

ထၧၫ့ဖုဝဲထံၩၥိၭထီးအလူၬၥံၪဧႉႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪမွဲဝ့ၫဒၪ ၦအ ဘျၩ့ ၦၡၩၥံၪအဆၧဆၫ ပီၩတိၫနံၫယၫ အဂဲးအကၠီၩ့နီၪလီၫႉ ပီၩတိၫနံၫယၫယီၩ ခး (ဆွစ်ဇာလန်) ဝံး (ဂျီနီဗာ) ဖိၪလဂၩဂီၩ့ (ရူပဗေဒ) ဆၧၥ့ၪယၫနၪၥ့ၪဖိၪလဂၩနီၪလီၫႉ ပီၩ (လ်) တိၫနံၫယၫ ယီၩ ဘၪထွ့ၪလၧ ၦအချဲၩ့  ( ပြင်သစ်) ဆၧချဲၩ့ (ဆွိ ) ဆၨၩဖိၪ ၥံၪ့ဎွံၪဆရၫ ဖၭဒိၪလဂၩ အဆၧ ချဲၩ့ကကၠၪ က ဘျၩ့ၦၡၩၥံၪအဂး ၥံၪ့ဎွံၪ အဆၧၥ့ၪယၫနၪၥ့ၪ စၭထၪ့ဝ့ၫ အၥၫ့ယူၭနီၪလီၫႉ (ဆွိ ) ဆၨၩဖိၪ ၥံၪ့ဎွံၪဆရၫ ဖၭဒိၪလဂၩ အဆၧချဲၩ့ နီၪမွဲဝ့ၫဒၪ ၦၡၩၥံၪနီၪ အီၪဝ့ၫဒၪ မိၡါႇနးခီၫႇ နးၥၭ အကၠီၩ့ နီၪလီၫႉ

          ၦၡၩၥံၪအၥၭနီၪ အီၪက့ၪထၬဝ့ၫ ၥၧၫ့ဆၪ့ လန့ ဘၪအကၠီၩ့ အီၪဝ့ၫဒၪ မိၡါႇ နးခီၫႇနးၥၭအဂဲး တိၫနံၫယၫ အဆၧနဲၩ အီၪဝ့ၫဒၪနီၪလီၫႉ ပမိၡါမွဲဂ့ၩႇ ပနးၥၭမွဲဂ့ၩ အ့ၪ ဆၧ ဘၪထံၭ ဘၪနဲၪ့ အီၪ ကမံၩ့မံၩ့စွါ ဘဲၫ ပ ဘၪထိး ထၧၫ့ဂၩယၫနီၪလီၫႉ

          ၦမိၡါ ဘၪထိးဆၧဆၫ လမံၩ့မံၩ့စွါ ဘဲၫ ပၥၭဒဲ ပနးၥၭ နးဆ့ ဆၧ ဘၪထံၭ ဘၪနဲၪ့ ကအီၪ ဝ့ၫဒၪနီၪ တိၫနံၫယၫ ၥ့ၪယၫထၪ့ထၬဝ့ၫဒၪနီၪလီၫႉ မီၫ့ဎီၩ့ၥဲၫ ဘဲၫယီၩၥိၭလီၫ ကဆါယွၩ အဆၧထိစိၩ အီၪ ၦၡၩၥံၪအဖၫ့ခိၪ ပမိၡါ အဆၧလီၩ့မၩဖိၬထွ့ၪ အ့ၪလအီၪ ဘၪစွါ ဘဲၫ ပနးၥၭအဂးဆ့ ကကဲၪ ထၪ့ဝ့ၫ ဆၧအၧၩ့အကၠီၩ့  တိၫနံၫယၫ လီၩဖျီၪထၪ့ဝ့ၫဒၪ အဂုးအခၧၫ့နီၪလီၫႉ  မွဲဆၧနီၪ ပက ဘၪ ဘျၩ့ ပမိၡါအဆၧဆၫ ကမံၩ့လီၫမွဲအ့ၬႉ ပၥၭ အဆၧဆၫ ဆ့ ပကဘၪဘျၩ့ လိၪဝ့ၫဒၪ အကၠီၩ့  ပီၩ (လ်) တိၫနံၫယၫ ၥၪယၫထၪ့ဝ့ၫဒၪနီၪလီၫႉ

          ပီၩ (လ်) တိၫနံၫယၫယီၩ ၦအဘျၩ့ဆၧဆၫ ၥံၪ့ဎွံၪဆရၫလဂၩလါနၫ့ ကဘျၩ့ဆၧဆၫၥံၪနီၪ လၧ ၥံၪ့ဎွံၪ အဆၧၥ့ၪယၫနၪၥ့ၪလီၫ လလၧၫ့ဎွ့ၩလၧၩ့ဘၪနီၪ လီၩဖျီၪထၪ့အ့ၪအလိၬၥၭၥံၪ ကကၠၪ အလိၬၥၭၥံၪ လထိးဆၧၫ့ ဘၪ အဝ့ၫ အဆၧကိၪ့ ဆၧတဲၩ့နီၪလီၫႉ အလိၬၥၭၥံၪအကၠီၩ့ အဝ့ၫအၥၭ လၩ့ဆါကဲၪထၪ့လါနၫ့ အမၪၥၭဘီၩ့ အဆၧဆၪ့ ထွ့ၪ အကၠီၩ့ အဝ့ၫ အဆၧၥ့ၪယၫနၪၥ့ၪလဖၪ ကွ့ၭထုၬထၪ့ထၬဝ့ၫဒၪလၧ လံၬစီၩ့ဖၧၩ့နီၪလီၫႉ ကွ့ၭထုၬထၪ့ထၬ အလံၬစီၩ့ နီၪ ဖ့ၪဖီအ့ၪ အလိၬၥၭ ဎူၫဂၩကကၠၪ အလိၬၥၭၥံၪနီၪ အီၪပဒၩ့ထၬအဝ့ၫ လထုၬထၪ့ ဘၪအလံၬစီၩ့ၥံၪ နီၪလီၫႉ အလိၬၥၭၥံၪ လကၭဒံၭ ဘၪ ၦအထုၬထၪ့ လံၬစီၩ့အလးလဖၪၥံၪဆ့ အီၪပဒၩ့ထၬအဝ့ၫ အလံၬစီၩ့လဖၪ နီၪလီၫႉ ကထုၬထၪ့အလံၬစီၩ့အဂး လ့ၩအလး လစီၪ့ ဘၪလစီၪ့တၭ လခဲၫ့ထုၬ ထုၬထၪ့အလံၬစီၩ့ န့ဝ့ၫဒၪ နီၪလီၫႉ

          ၥံၪ့ဎွံၪဆရၫ တိၫနံၫယၫယီၩ မၩလၩ့ဒိၩ့အၥၭလၧ အဆၧဆၫဆါၥံၪဂီၩ့ ကဘၪဘျၩ့အဆၧ ဆၫဆါၥံၪ ဘဲၫၥ့ၪလဲၪ အၪ့န့ထၪ့အခွးအယါနီၪလီၫႉ ၥံၪ့ဎွံၪဆရၫ တိၫနံၫယၫယီၩ အီၪက့ၪထၬ အဆၧၥ့ၪယၫနၪၥ့ၪလမံၩ့ နီၪမွဲဝ့ၫဒၪ လၧၦၡၩၥံၪ ကိၭဂၩအဆၧၥၭမၧၫ့ဖၧၩ့  ကဆါယွၩအလိၪအီၪဝ့ၫ လမံၩ့လမံၩ့အကၠီၩ့ နီၪလီၫႉ ကဆါယွၩဒဲ ၦၡၩၥံၪအကျၩ မၩကဲၪထၪ့ ဆၧကၪဆၧဂဲၩနီၪ မွဲဝ့ၫ ဆၧဒဲၩ ဘၭအဂဲးႇ ဆၧဒဲၩ ဘၭယီၩအကၠီၩ့တၭ ၦၡၩၥံၪ ဘၪယဲၩ့ ထၪ့လၧ ကဆါယွၩ အဆၧအဲၪအကၠီၩ့ႇ ပဆၧဒဲၩ ဘၭယီၩကဖီၩ့ဖျ့ၭအဂး အ့ၪပအၪ့ကံၩ့အၪ့ယၫထၪ့လၧ ကဆါယွၩအီၪစွါ ဘဲၫ ယွၩဒဲ ၦၡၩၥံၪ အီၪဘူၭထဲး ကန့ထၪ့ထဲၩ့ဝ့ၫအကၠီၩ့နီၪလီၫႉ

          ပီၩ ( လ်) တိၫနံၫယၫ အဆၧၥ့ၪယၫနၪၥ့ၪယီၩ ၦၡၩၥံၪ လထိးဆၧၫ့ ဘၪအဝ့ၫလါနၫ့ အီၪက့ၪထၬၥၭ အဆၧဂုးခၧၫ့ဂီၩ့ ခိးဂဲးခိး ဘၭဝ့ၫအကၠီၩ့ အီၪၥုၪ့လၩ့ထၬအၥၭလၧ လံၬဆံၫ့ဎံၪဂီၩ့ ဘျၩ့ၦၡၩ အနးၥၭဆၧဆၫအဂး စၭထၪ့ၥံၪ့ဎွံၪဆရၫလဂၩမွဲဝ့ၫဒၪအကၠီၩ့ အဝ့ၫအဆၧချဲၩ့ၥံၪနီၪ ၦၡၩၥံၪဒီၪနါဂီၩ့ န့ ဘၪဆၧယူၭဆၧယၪ့လၧ ၦၡၩၥံၪ အီၪယူၭနီၪလီၫႉ ၥံၪ့ဎွံၪဆရၫ ပီၩ (လ်) တိၫနံၫယၫ အဂဲး မွဲဝ့ၫထၨၪယီၩလီၫႉ အဲၪကွံၩ ဘၪထၧၫ့ဖုဝဲထံၩၥိၭ ထီးအ လူၬ မွဲနၥံၪန့ထၪ့ ဘၪ ကဆါယွၩ အဆၧဆိၪဂ့ၩဆိၪ ဘွၩ ကိၭဒံၩကိၭဂၩလါဆံၭႉ