ပကဘၪယူၭယၪ့ ၦဂူၫဂၩၥံၪ အဆၧးဎံၪဆၧးလၩႇ အလုၫအလါ အဂဲး

ထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭအဆၧၥီၪ့ဆၧၥၫ့အနိၫ့ အဆၧရၩလၩ့ဖၧၩ့ မုကနံၩ ယီၩယအဲၪ ဒိၭရၩလၩ့န့အ့ၪဘၪနၥံၪနီၪမွဲ၀့ၫဒၪ ပကဘၪယူၭယၪ့ ၦဂူၫဂၩၥံၪ အဆၧးဎံၪ ဆၧးလၩႇ အလုၫအလါ အဂဲး အကၠီၩ့ နီၪလီၫႉ ၦဂၪ့ခိၪဖိၪၥံၪထီးအလူၬယီၩ ပမွဲဝ့ၫ ပထၧၫ့ဖုထၧၫ့ဝဲ ၥံၪလီၫတၭ ဆၨၩလဆၨၩဘၪလဆၨၩအကျၩႇ ၦၡၩ လဂၩ ဘၪလဂၩအကျၩ ကဘၪအီၪ ဎူၫဎူၫဎၩ့ဎၩ့ႇ ဘူၭဘူၭထံးထံးမါ ဆၧမ့ၬလဲၩၥၭကဲၪ့လိၬၥၭအဆၧမၩၥံၪႇ ဆၧမၩ နၧၩ့ မၩစၪလိၬၥၭ အဆၧမၩၥံၪ ကလၩ့ ၡၩဝ့ၫဒၪနီၪလီၫႉ

          ၦၡၩၥံၪထီးအလူၬအဖၫ့ခိၪ ပကဘၪအီၪက့ၪထၬပၥၭ ဘဲၫပထၧၫ့ဖုဝဲၥိၭဂီၩ့ ပကဘၪမၩထၪ့ ထီၫ ၦၡၩၥံၪအဆၧလ့ၩထၪ့လ့ၩထီၫ ကအီၪအဂးႇ ဆၧၥုၪ့ဆၧၩ့ၥၭဆၧၩ့လိၬၥၭ ကအီၪအဂးႇ ဆၧၥ့ၪယၫနၪၥ့ၪအ့ၪလိၬၥၭ ကအီၪအဂး ပကဘၪမၩကဲၪထၪ့ဝ့ၫဒၪနီၪလီၫႉ

          ၦဝ့ၫၥံၪထီးအလူၬယီၩ ပလွ့ပလဲၪႇ ပဆၧဘိၪ့ဆၧဘၩႇ ပခရၧၫ့ယခရၧၫ့ႇ ၦမုၪၦခွၫႇ ပၥၭအဎိၩအဆံၭႇ ပခီၫ့ၡၩဂဲးႇ ပဆၧဆီၪ့ဆၧချဲၫ့ၥံၪ လမီၪ့ဎီၩ့ဘၪလါနၫ့ ပအီၪလၧ ဂၪ့ခိၪလဘံၪ့ အဖၫ့လၬအကၠီၩ့ ပဝ့ၫၥံၪထီးအလူၬယီၩ ပမီၪ့ဎီၩ့ဝ့ၫဒၪအကၠီၩ့ ကိုဗစ် ဆၧဆၫဆီၪ့ၥံၪဆီၪ့ယီၩ ဖ့ၪနဲၪအ့ၪပၧၩ ပျၩ့ပျၩ့ယူၭနီၪလီၫႉ ကဆါဎြံၬ အဆၧထိးထဲၩ့တၩ့ထဲၩ့ယီၩ ပၧၩလဂၩအဂးလီၫ မွဲအ့ၬနီၪ လီၫႉ ပအီၪလၧ ဂၪ့ခိၪလဘံၪ့အဖၫ့လၬ မီၪ့ဎီၩ့လီၫအကၠီၩ့ ပဝ့ၫၥံၪထီးအလူၬယီၩ ပမွဲဝ့ၫ ပထၧၫ့ဖု ထၧၫ့ဝဲအကၠီၩ့ ပကဘၪထီးဆၧၫ့ဝ့ၫဒၪနီၪလီၫႉ

          ၦၡၩၥံၪနီၪ ပဆၧဘိၪ့ဆၧဘၩၥံၪလမီၪ့ဎီၩ့ဘၪလါနၫ့ ပဆၧအၪ့ကံၩ့ဘၩဆိၪဖၪၥံၪနီၪ ကဘၪ ထီၩ့လၧ မုၭခိၪဘၩ့မုအဂးလိၪဝ့ၫဒၪနီၪလီၫႉ ဘၪမနီၪလဲၪစွါဘဲၫ ၦအအဲၪကဆါယွၩလၧ ၥုၪ့ၥၭထၧၫ့ ဖျိၪ့ယၫနီၪ မွဲဝ့ၫ ၦအအဲၪၦၡၩၥံၪလၧ အဘူၭအနဲၩ့ၥံၪနီၪလီၫႉ မွဲဆၧနီၪ ပကဘၪယိထၪ့ဆၧလၧထၭႇ ပကဘၪဆိၬထၪ့ပၥၭလၧထၭ ကဆါယွၩအီၪဂီၩ့ ပကဘၪအၪ့ကံၩ့ဘၩဆိၪဖၪဆၧႇ ၦဂူၫဂၩၥံၪနီၪ ပအီၪက့ၪထၬ ဘဲၫပထၧၫ့ဖုထၧၫ့ဝဲၥံၪကန့အဂးႇ ပမၩဆၧၩ့ၦဂူၫဂၩၥံၪကန့အဂးႇ ပအဲၪၦဂူၫဂၩၥံၪ ကန့အဂး ပကဘၪဖ့ၪအ့ၪလိၬၥၭ ဆၧမၩဆၧၩ့နီၪလီၫႉ ခံၫ့ခၫဆၧၫ့ထီဘဲၫယီၩ ၦၥုၪ့ဂ့ၩၥၭဘွၩအီၪဒဲ ဆၧဆူနဲၩအီၪၦၡၩၥံၪနီၪ ကဘၪဖီၪ့ထၪ့ ဆၧဖံၭဆၧမၩကၠၧၫ့ကၠၧၫ့ႇ ကဘၪလ့ၩဆၧလၧယၫ ကၠၧၫ့ကၠၧၫ့ လိၪဝ့ၫဒၪနီၪလီၫႉ ၦၡၩၥံၪကအီၪကၧၩ့ဖျိၪ့ထၪ့ၥၭ ကန့အဂးနီၪ မွဲဝ့ၫဒၪ ဆၧအရ့ၩဒိၪအဂဲးနီၪလီၫႉ ပကဘၪအီၪက့ၪပဲၩထၬလိၬၥၭအခံၫ့မွဲအ့ၬႉ ပထၧၫ့ဖုထၧၫ့ဝဲအကျၩမွဲဂ့ၩႇ ပဂံၪ့ဒီၪ့ဖိၪၥံၪမွဲဂ့ၩ ဆၧလၩ့ ဖၭ အဂဲးအဖး ကဲၪထၪ့ၥ့ၪဝ့ၫဒၪအကၠီၩ့ ဘဲၫဆၧလၩ့ဖၭယီၩ လကဲၪထၪ့ဘၪအဂး ပကဘၪအီၪလၧ ဆၧထုၪ့ၥုၪ့ထုၪ့ၥၭဖၧၩ့နီၪလီၫႉ

          ၦၡၩၥံၪထီးအလူၬအဖၫ့ခိၪ ပကအီၪက့ၪထၬပၥၭဘဲၫ ပထၧၫ့ဖုထၧၫ့ဝဲၥံၪၥိၭနီၪ ဆၧကၪ ဆၧဂဲၩၥံၪအီၪႇ ဆၧအၪ့ထၩၥံၪအီၪလါနၫ့ ၦၡၩၥံၪ ဆၧထိးထဲၩ့တၩ့ထဲၩ့ ကန့အဂးမွဲဝ့ၫဒၪအကၠီၩ့ ၦၡၩၥံၪနီၪ ဆၧလမီၪ့ဎီၩ့ဘၪ အီၪဝ့ၫဒၪ အမံၩ့အစံၩ့လါနၫ့ႇ ဆၧလၩ့ဖၭအဂဲး ကဲၪထၪ့ဝ့ၫအၪလါနၫ့ ပကထိးဆၧၫ့လိၬၥၭကန့အဂး ပကကျ့ၭစၨၭဂီၩ့ ပကဘၪအၪ့ကံၩ့ ပဂဲးပဘၭလၧ ကဆါယွၩအီၪ အကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭအဂဲး ယရၩလၩ့ ဖ့ၪၥ့ၪယၫအ့ၪဘၪနၥံၪ လၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ