ဆၧတတုၬတနၭဖၧၩ့ ၦလၧအီၪဝ့ၫဒၪလၧ ယူၫကရံၩ့ဖိၪၥံၪကၠၧၫ့ကၠၧၫ့ မံၭထၭမုၪနံၫဂၩအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ဆၧတတုၬတနၭဖၧၩ့ ၦလၧအီၪဝ့ၫဒၪလၧ ယူၫကရံၩ့ဖိၪၥံၪကၠၧၫ့ကၠၧၫ့ မံၭထၭမုၪနံၫဂၩအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦလၧအီၪဝ့ၫဒၪကၠၧၫ့ကၠၧၫ့လၧ (ယူကရိန်း) ၦတတုၬတနၭဖိၪ မံၭထၭမုၪနံၫဂၩနီၪ အီၪဝ့ၫဒၪလၧ ခး (အိန္ဒိယ) ဝံး (မီဇိုရမ်) ဖၧၩ့နီၪလီၫႉ အဝ့ၫၥံၪအၥိၭနံၫဂၩနီၪ ခး (အိန္ဒိယ) ဝံး (ကာလကတ္တား) Mother Teresa အခရၧၫ့ မွဲဝ့ၫဒၪ (Missionary of Charity, MC) ခရၧၫ့ မံၭထၭမုၪၥံၪနီၪလီၫႉ အမံၩ့နီၪ မွဲဝ့ၫဒၪ မံၭထၭမုၪ (ရိုစီလာနိုးထန်းငီး) ဒဲ မံၭထၭမုၪ (အဲန်း ဖရီဒါ) နီၪလီၫႉ အဝ့ၫၥံၪအၥိၭနံၫဂၩယီၩ လၧခး (ယူကရိန်း) ဆၧဒုၭဆၧယၩ ကဲၪထၪ့အခံၫ့ အီၪဝ့ၫဒၪလၧ (ယူကရိန်း) ၦတတုၬတနၭဖိၪၥံၪကၠၧၫ့ကၠၧၫ့နီၪလီၫႉ ခရၧၫ့ခိၪနါ မံၭထၭမုၪ (Prema) နီၪ အဝ့ၫအမံၭထၭမုၪနံၫဂၩအဂး အၪ့ယိၪခဲၫ့ကံၭဝ့ၫအကၠီၩ့ အၪ့စိၭအၪ့စၪ့ဝ့ၫဂီၩ့ အၪ့မၧၫ့ဝ့ၫၥုၭအၥၭလၧ ဖီၩ့ဒုၪဖီၩ့ဒၩအလးနီၪလီၫႉ လါနၫ့ဂ့ၩ မံၭထၭမုၪၥံၪနီၪ လၧၦတတုၬတနၭဖိၪၥံၪအကျၩ အီၪဝ့ၫဒၪလၧအဝ့ၫၥံၪကၠၧၫ့ကၠၧၫ့ဂီၩ့ ၦလၧဘၪထံၭဘၪနဲၪ့လဖၪနီၪ ဘၠၩ့အ့ၪဝ့ၫဂီၩ့ ၦလၧအဂဲၫစဲၪ့ဖျိၭထၪ့လၧ ဆၧဒုၭဆၧယၩအကျၩလဖၪနီၪ ယိထဲၩ့ခွါထဲၩ့အ့ၪဝ့ၫႇ ယၫ့ၥၭမၩဆၧၩ့အ့ၪဝ့ၫနီၪလီၫႉ လကၭဒံၭဘၪ အဝ့ၫအၥိၭနံၫဂၩယီၩ ဆၧကၪဆၧဂဲၩ တခၩဒၪ ဘၪဒၪဆၧၫ့ယၫဝ့ၫလါနၫ့ ကဆါကၠဲၬအဆၧမၩနီၪ လၧအလးအကျဲၩ့အနီ ကမၩဆုးလီၩ့ဝ့ၫအကၠီၩ့ႇ အဝ့ၫၥံၪနးဆ့ လၧဆၧနိၫ့ဆၧနၭအကျၩ ဆၧဖီၩ့ဆၧဖျ့ၭ အီၪဝ့ၫဒၪအကၠီၩ့ လီၩၥ့ၪယၫဘၪ အဘူၭအထံးၥံၪအကၠီၩ့ လီၩဖျီၪထၪ့ထၬဝ့ၫ အီၪဝ့ၫဒၪဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ (မာသာရ်ထရေဇား) အမံၭထၭမုၪၥံၪယီၩ ခးၥဲၫၡၩခမျၧး ဆၧအခိးအတၩအဂး ၦၡၩအဆၧၥၭမၧၫ့ၥၭၡီၩ့နီၪ ဘဲၫအဝ့ၫၥံၪအဆၧၥၭမၧၫ့ၥိၭ အီၪက့ၪထၬ ဆၧအလူအဎွ့ၩဂီၩ့ အီၪပဒၩ့ထၬ ယိထဲၩ့ခွါထဲၩ့ဝ့ၫ မွဲဝ့ၫဒၪ ၥၫထနၫၦအဆၧမၩဆၧဖိၪၥံၪနီၪလီၫႉ ဆၧဒုၭဆၧယၩၥံၪအကျၩ အဝ့ၫၥံၪနးဆ့ လဆီၫ့မီၪ့ဆီၫ့မၬထၬဘၪဝ့ၫအခံၫ့ ဘၪထိးခၭအၥၭၥ့ၪဝ့ၫဒၪ လါနၫ့ဂ့ၩ အဆၧၥၭမၧၫ့အဂး ဆၧအၪ့ယိၪခဲၫ့ကံၭ လအီၪဘၪနီၪလီၫႉ ဆၧအဲၪဆၧကွံၩကမံၩ့ဎးလီၫ ယိဆီၫ့မီၪ့ဝ့ၫဂီၩ့ ယၫ့ၥၭမၩဆၧၩ့ၦၡၩၥံၪႇ ဆၧလၧၥုၪ့ၥၭအယီၩ ၥုၪ့ၥၭအဂ့ၩထုၬ ပကအၪ့န့ဆၧဒီၩ့ဆၧထ့ၬအဂး ဂ့ၩနဲၪ့အၪလ့ၬအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩအဆၧအဲၪဆၧကွံၩလါဆံၭႉ