စယ့ၫရမဲအၫ

ထၨၪ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၪ့ အဆၧရၩလၩ့ဖၧၩ့ယအဲၪဒိၭရၩလၩ့န့အ့ၪဘၪနၥံၪနီၪ လၧလ့ၬဆံၫ့ဎံၪဖၧၩ့ပၫဝ့ၫစယ့ၫရမဲအၫအဂဲးအကၠီၩ့လါဆံၭနဲၪႉ ကဆါယွၩလကိၭဒံၭဘၪ စယ့ၫရမဲအၫအခံၫ့အိၩ စယ့ၫရမဲအၫယီၫ ဆၧဘၪအၪ့ယိၪခဲၫ့ကံၭလၩ့အဂး ဆၧခိဆၧဝီၩလအီၪဘၪနးမံၩ့ဂီၩ့ အီၪဘၪအၪ့ဘၪချံၪ့ချံၪ့ၡုၪၡုၪ ဂ့ၩဂ့ၩဘၪဘၪနီၪလီၫႉ

ဆၧအီၪကီၪ့အဆၧဖံၭဆၧမၩအဂး ကဆါယွၩ ကိၭထဲၩ့အဝ့ၫ ဘဲၫယီၩၥိၭနီၪလီၫႉ “လၧယလချုၭမၩကဲၪထၪ့ဒံၭဘၪနၧ လၧနမိမိအဂူၭဖိၫ့ဖၧၩ့နီၪ ယၥ့ၪယၫနၧၩ ဒဲ နလချုၭဂဲၫထၪ့ခွံၬဒံၭဘၪလၧဆၧဒၧၩ့လးဖၧၩ့နီၪ ယအီၪက့ၪဆံၫ့ဎံၪနၧၩစၧမီၪလဂၩလၧၦဆၨၩလဖၪအဂးလီၫႉ အခံၫ့အနီအိၩ စယ့ၫရမဲအၫအၥၭအီၪဝ့ၫဆံၭကိၭဒံၭလီၫအကၠီၩ့ စယ့ၫရမဲအၫစံၭဆဲၩ့ယွၩ အၩလါ ကဆါယယွၩဧ့ႇ ယချဲၩ့ဆၧၥ့ၪအ့ၬ ယမွဲဝ့ၫဖိၪၥၪဒ့ၭလီၫႉ အနီၪတၭကဆါယွၩစံၭထဲၩ့အဝ့ၫ “ထီးၥၭမဲၪဆၧနးမံၩ့လဂ့ၩ ယအီၪလၧနၥိၭလီၫႉ“

ကဆါယွၩ အီၪက့ၪထၬဆၧအုၩ့လၩ့ဆၧချဲၩ့လၧ စယ့ၫရမဲအၫအဖၫ့ခိၪနီၪ မွဲကဲၪထၪ့ဂဲးဘၭ အဎိၩဒိၪထုၬနီၪလီၫႉ စယ့ၫရမဲအၫနီၪ မွဲဝ့ၫဖိၥၪဒံၭလီၫအကၠီၩ့ ကဘၪချဲၩ့ဘဲၫၥ့ၪလဲၪလၥ့ၪယၫဘၪဝ့ၫလါနၫ့ ကဆါယွၩယူၬထၪ့အစုၪထိၭဘၪအနိၭဂီၩ့ ကဆါယွၩ စံၭအဝ့ၫ “ယိခွါ ယအီၪယ့ၪယူၭယဆၧချဲၩ့လၧ နနိၭဖၧၩ့ယူၭႉ ယအီၪက့ၪလၩ့နၧၩလၧၦဆၨၩလဖၪအဖၫ့ခိွဒဲ လၧဘၩ့မုးလဖၪအဖၫ့ခိၪယူၭလီၫႉ“

လၧယ့ၫရမဲအၫ အဆၧၥၭမၧၫ့ဖၧၩ့ ဆၧအလၩ့ဆၫ့အီၪနီၪမွဲဝ့ၫဒၪကဆါယွၩနီၪ နုၬလါမဆၧမၩလၧအဝ့ၫအဆၧၥၭမၧၫ့ဖၧၩ့အခးီၩ့အဝ့ၫအီၪဆၧမၩ့နီၪခဲဖၩ့ထၪ့န့ဝ့ၫဒၪလၧဆၧခံၭအီၪအလးပၧၩ့နီၪလီၫႉ  အခၪ့ထံၭလဘျၩ့ ယွၩအၪ့မၧၫ့အဝ့ၫဆၧမၩနၪမွဲဝ့ၫဒၪ ၦအနဲၩဘၪအလၭအလူလဖၪၦအဖိၬထၪ့ဘၫအလၭအဖၧၩ့ၥၭဖျိၩ့လဖၪအီၪဘဲၫအဝ့ၫၥံၪလထီၩ့ဘၪလၧ ဆၧမၭဂီၩ့ဂၭစၪဖၧၩ့အဂးကဘၪအီၪပဒၩ့ထၬအ့ၪဝ့ၫ ကဘၪၥီၪ့ၥၫ့ ဖ့ၪၥ့ၪယၫအ့ၪဆၧတီၩဆၧလီၩ့အဂဲးလဖၪနီၪလီၫႉ

ယ့ၫရမဲအၫယီၩ န့ထၬဘၪ အခွးအယါလယွၩအီၪ ၦၡၩၥံၪအီၪၥၭမၧၫ့လၧ ဖၧၩ့ၥၭအဘၪမၪဖၧၩ့ၥံၪအဂး ကဘၪကိၭထဲၩ့ ဝ့ၫလၧ ယွၩအီၪနီၪလီၫႉ ဘဲၫယွၩအဆၧအၪ့မၧၫ့လၩ့ အီၪထၬၥိၭလၥၭမဲၪဘၪဆၧနးမံၩ့ဂီၩ့ၥီၪ့ထဲၩ့အ့ၪၦၡၩလဖၪၥံၪနီၪလၧ ဆၧၥုၪ့ဒူၩၥၭဒူၩဖၧၩ့အကၠီၩ့ ၦၡၩလဖၪၥံၪနီၪ မ့ၬလဲၩအဝ့ၫ စီၪဆံၭအဝ့ၫဘၪထိးမၩနၧၩ့မၩဆၪအၥၭဆ့ အီၪဝ့ၫဒၪနီၪလီၫႉ လၧထီအခံၫ့အနီအိၩ ၦၡၩအီၪ အၪ့ၥၭမၧၫ့ လတီၩလလီၩ့ဘၪၥံၪအဂးၦအဖ့ၪနဲၪထၪ့အ့ၪဖၧၩ့ၥၭတီၩဖၧၩ့ စယ့ၫရမဲအၫယီၩ အမံၩ့ဎိၩလဂၩမွဲဝ့ၫဒၪနီၪလီၫႉ

ၦၡၩလဖၪၥံၪနီၪ ကအီမုၬလၩလၧ ဆၧဒဲၩဘၭအဆၧဘၪမၪ ဖၧၩ့ဂီၩ့ ဆၧအၪ့လဲၩထၪ့ထဲၩ့အၥၭ အ့ၪလအီၪဘၪစွါဘဲၫကထီၩ့လၧ ဆၧဂၭဂီၩ့ဂၭစၪဖၧၩ့ အကၠီၩ့အဝ့ၫ ထိးၡၪ့ထိးယါအၥၭ ထိးမ့ၬလဲၩအၥၭဂီၩ့ ၥီၪ့ၥၫ့ထဲၩ့အ့ၪဝ့ၫဒၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫယွၩအလူလၩ့ဘၪၥိၭ ပကအီၪၥၭမၧၫ့အဂး စယ့ၫရမဲအၫဖိၪၥံၪဂုထၪ့အၪထၪ့ဒၪဝ့ၫလၧ ဂၪ့ခိၪချိၫ့ဖၧၩ့ယီၩလါဆံၭနဲၪႉ