ဂၠီမူၩလၫ

ထၧၫ့ဖုဝဲထံၩၥိၭထီးလူၬၥံၪဧ့ႇ မုကနံၩယီၩ မံၩ့ဎိၩၥၪဖျီၪ ဖုခွၫလၧအအီၪအနိၫ့အဆၧရၩလၩ့ဖၧၩ့ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ဂၠီမူၩလၫ အဂဲးအကၠီၩ့နီၪလီၫႉ ဂၠီမူၩယၫယီၩ ထၪ့ဆၧမၩလီၪလၧ ခးဂၠၫမနံၫ ဘျၪ့ကိၪ့ဒိၪလးဖၧၩ့နီၪလီၫႉ အဝ့ၫနီၪ မွဲဝ့ၫဆၧၥ့ၪယၫနၪၥ့ၪအီၪၥၭဘၪ့ဖိၪလဂၩအကၠီၩ့အဝ့ၫအဆၧၥၭမၧၫ့ဖၧၩ့အီၪဂ့ၪထၬဝ့ၫအရ့ၩဒိၪနီၪမွဲဝ့ၫဒၪ ၦၡၩလီၫဂီၩ့ ကဆါယွၩဒဲ ယွအၩအဆၧၥီၪ့ဆၧၥၫ့နီအီၪက့ၪထၬဝ့ၫ ဘဲၫလဘၪထွ့ၪဘၪအဝ့ၫၥိၭနီၪလီၫႉ ဂၠီမူၩလၫၥၭဘၪ့အခံၫ့အၥၭ (၂၀)  အၫထီအီၪၥၭမၧၫ့ဘဲၫယီၩၥိၭနီၪလီၫႉ လၧအဝ့ၫအဆၧၥၭမၧၫ့ဖၧၩ့နီၪ မုၬလၩဝ့ၫလၧအီၩၥံၭထံၫဂၭထံၫ ၦမုၪၦမၧၩ့ဒဲ ဆၧၥၭအွံၪဖၧၩ့နီၪလီၫႉ အမိမိဒဲ အဖါဖါနီၪ အၥၭဆိၫ့မုလါအီၪဝ့ၫလၧ အဝ့ၫကကဲွဘိၪ့ခိၪၥၫ့ခၫလဂၩအဂးနီၪလီၫႉ ဂၠီမူၩလၫဝ့ၫ ဖီၩ့ဖျ့ၭလၧ ဘိၪ့ခိၪၥၫ့ခၫအဆၧၥၭမၧၫ့နီ ဆၧၥၭမၧၫ့နီၪ ဆၧၥၭပၧၫ့အဂူၫဂၩအဲၪဒိၭမၩဝ့ၫဒၪ တကိၭမံၩ့ဒ့ၭနီၪလီၫႉ 

ဂၠီမူၩလ တၪ့ဘျၪ့ကိၪ့ဒိၪ ဆၧမၩလိၪအခံၫ့အၥၭအီၪ ၂၀ ဒံၭၥၫအိၩ အထံၩၥိၭ ဎြံၬဖိၪလဂၩ ကိၭဖံၭၥိၭအဝ့ၫလၧ အဂံၪ့တၭဒၪဘၪအထံၩၥိၭ ထွံၩလၩ့အၪ့ဂံၩ့ဘၩဆ့ၪဖၪဆၧတၭ အၥၭဆုးလၩ့အီၪလၧ အထံၩၥိၭအဆၧအၦဂံၩ့ဘၩဆိၪဖၪဖၧၩ့နီၪလီၫႉ ၦၡၩထွံၩလၩ့ အခၪ့ဂီၩ့ အၪ့ကံၩ့ဘၩဆိၪဆၧ ဘဲၫယီၩၥိၭနီၪ ဂၠမူၩလၫလဒၪယံၫယါဘၪဝ့ၫနးကၠၪနီၪလီၫႉ အထံၩၥိၭအဂံၪ့နီၪ အၪ့မုဂၪအဆၧအၪ့ဂီၩ့ ဖီလံၬဆံၫ့ဎံၪကဂၩကဘျၩ့နီၪလီၫႉ ဂီၩ့ဆိၪဖၪဆၧၥၭအွံၪကရွ့ဒီၭနီၪလီၫႉ ဂၠီမူၩယၫ ဒၪဘၪဆၧအဂဲးအဖးယီၩကကၠၪထိးဆၧၫ့ဝ့ၫ လန့ဘၪအၪ့ကံၩ့စဲၪ့ထၪ့လၧအလးဖၧၩ့နီၪလီၫႉ လါနၫ့ ဂၠီမူၩယၫ ထဲၩ့ထီၩ့အဂံၪ့ကကၠၪ အၪ့ဎၬထၪ့ထဲၩ့ ဆၧအဂဲးအဖးယီၩဂီၩ့လယံၬလမီးဘၪအခံၫ့အဝ့ၫနးဆ့ ကအၪ့ခံၩ့ဘၩဆိၪဖၪဆၧအဂးအၥၭအၪ့လဲၩထၪ့ ထဲၩ့အၥၭနီၪလီၫႉ

လၧဘျၪ့ကိၪ့ဒိၪထၨၫ့လးယၫဖၧၩ့ ဂၠီမူၩလၫနီၪ အဂ့ၩဒိၪထုၬ အဆၧခိးဂဲးခိးဘၭအီၪအဒိၪ ထုၬဆၧမၩလိၪဖိၪလဂၩမွဲဝ့ၫနီၪလီၫႉ ဘဲၫဘျၪ့ဂိၪ့ဒိၪလးဖၧၩ့ အဆၧခိးဂဲးခိးဘၭအီၪလီၫ အဝ့ၫအဆၧခိးဂဲးခိးဘၭအီၪအဒိွထုၬဆၧမၩလိၪဖိၪလဂၩ မွဲဝ့ၫနီၪလီၫႉ ဘဲၫဘျၫ့ဂိၪ့ဒိၪလးဖၧၩ့ အဆၧခိးဂဲးခိးဘၭအီၪၥိၭ အဝ့ၫအဆၧခိးဂဲးခိးဘၭအီၪလဖၪၥံၪနီၪ ခ့ၬထဲၩ့အၥၭလၧ လံၬထံၫ့ဎံၪဖၧၩ့တၭအဝ့ၫအဆၧၥၭမၧၫ့လဖၪ အၪ့လဲၩထၪ့ထဲၩ့အၥၭထီးအလူၬနီၪလီၧႉ လၧအဂုခိၪအိၩ အဆၧၥၭမၧၫ့ အဖၫ့ဂိၪအဆၧအၪ့ဎၬၥံၪလဖၪအၪ့လဲၩထၪ့ထဲၩ့ဝ့ၫ လၧဆၧဆူနဲၩယွၩအီၪနီၪလီၫႉ အီၪဂၠးခၧၫ့ထၬအဆၧဆူနဲၩ့လၧ ယွၩအဆၧအုၩ့လၩ့အီၪထၬလဖွၥံၪဖၧၩ့နီၪလီၫႉ

ဂၠီမူၩလၫလဂၩ မိဖါလအီၪဘၪဖိၪၥၪၥံၪအဂး ဖီၪ့ထၪ့ဆၧဖံၭဆၧမၩအခၫ့အၪ့ကံၩ့ကၬိၪစ့ၩဆၧမၩဆၧၩ့လၧၦၡၩၥံၪအီၪ လအီၪဘၪဝ့ၫ နးကၠၪနီၪလီၫႉ အၪ့ကံၩ့ဝ့ၫဒၪလၧ ယွၩအီၪအကၠီၩ့အဝ့ၫလိၪလဖွၥံၪလၧၫ့ဎွ့ၩလကၬဒံၭဘၪ အဘျဲၪအဆဲးဆ့ န့ဘၪဝ့ၫဒၪနီၪလီၫႉ မုနံၩကနံၩဆၧအၪ့အဂးအ့ၪလအီၪဘၪစွါဘဲၫနုၬလၩ့ လၧဒူၭဖၧၩ့ဂီၩ့ ထွံၩလၩ့အခၪ့အၪ့ကံၩ့ဘၩဆိၪဖၪဆၧနီၪလီၫႉ မုဂၫဆၧအၪ့အဂးလအီၪဘၪလါနၫ့ အၪ့မၧၫ့ ၦၡၩဖိၬလိၬထၪ့ထၬအ့ၪ ဆၧၪ့အလးဂီၩ့အဝ့ၫ လ့ၩအၪ့ကံၩ့ဘၩဆိၪဖၪဆၧနီၪလီၫႉ ဂၠီမူၩလၫလဂၩၥ့ၪယၫထၪ့ဘၪ ဎြံၬဖိၪၥံၪ အဆၧအၪ့ကံၩ့ဘၩဆိၪဖၪ အစီၩ့အမၩ့ယူၬနီၪလီၫ

ဂၠီမူၩလၫ အၥၭအီၪဝ့ၫ (၈၀) အခံၫ့ဆၧအီၪကီၪ့ဘျၪကိၪ့ဒိၪလးဖၧၩ့ ဘၪလ့ၩလီၩ့လၩ့ လၬလၩ့ဆၧချဲၩ့အီၪဝ့ၫဒၪတၭ ဆၧမၩလိၪဖိၪလဂၩ အၪ့စၪ့ဘၪအဝ့ၫ “နမံၩ့ဘၪဎိၩထၪ့ဝ့ၫဘဲၫ ယီၩၥိၭနီၪ နဖီၪ့ဂုးထၬမနီၪလဲၪအဂဲးလဲၪ“ အၪ့စၪ့ဝ့ၫဘဲၫယီၩၥၭကကၠၪ ဂၠီမူၩယၫ ထွံၩလၩ့အခၪ့ဂီၩ့ ဖ့ၪနဲၪအ့ၪဝ့ၫဒၪ အဝ့ၫအၪ့ကံၩ့ဘၩဆိၪဖၪ ဆၧအဂဲးနီၪလီၫႉ ဘဲၫအဝ့ၫလီၩဖျီၪထၪ့ၥိၭ မွဲဝ့ၫဒၪတၡါဒ့ၭလီၫႉ ဂၠီမူၩလၫၥံၫဖီၩ့ခွံၬကကၠၪ လၧအဝ့ၫအလးမံၫ အနဲၩ့ၥံၪ့ပၪနီၪအဝ့ၫ ထွံၩလၩ့အခၪ့အၪ့ကံၩ့ဘၩဆိၪဖၪထၬဆၧအကၠီၩ့ ခၪ့လုခိၪလၩ့ထီၫ့အလးအီၪထးဝ့ၫဒၪနီၪလီၫႉ ထၧၫ့ဖုဝဲထံၩၥိၭထီးလူၬၥံၪဧ့ႇ ဆၧလၧဆၧအၪ့ကံၩ့ဘၩဆိၪဖၪဆၧနီၪဖၧၪအ့ၪပၧၩ အခိးအတၩထၧၫ့မုလဲၪအဂဲးအ့ၪပယိထဲၩ့ ဂၠီမူၫလၫ အဆၧအီၪၥၭမၧၫ့စွါဘဲၫ ပၥ့ၪယၫန့ဝ့ၫဒၪနီၪလီၫႉ မွဲဆၧနီၪ ပကအီၪၥၭမၧၫ့လၧဆၧဘၩဆိၪဖၪဖၧၩ့ ကိၭဒံၩ့ကိၭဂၩလါဆံၭနဲၪႉ