ဂိၫပိၫ့စံၫ့ (Go Puan Seng)

ထၧၫ့ဖုဝဲထံၩၥိၭထီးအလူၬၥံၪဧႉႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪ ဒိၭရၩလၩ့န့ အ့ၪ ဘၪနၥံၪနီၪ မွဲဝ့ၫဒၪ ၦအဒိၭနဲၩ့အၥၭလၧ ယွၩအီၪအကၠီၩ့ လၧအဒုၪအဒၩၥံၪအကျၩ ဖီၩ့ဖျ့ၭ ဆၧမၩၥံၪ မၩဆၫ ဂိၫပိၫ့စံၫ့ အဂဲးအကၠီၩ့နီၪလီၫႉ အခံၫ့အနီအိၩ ဂၪ့ခိၪထၧၫ့ ဘံၪ့ယၫ ဆၧဒုၭဆၧယၩကဲၪထၪ့အခံၫ့တၭ ခး ဂၠါပၫ့ ဖိၪၥံၪ ဂဲၫထၪ့မၩ ဆၧဒုၭဆၧယၩလၧ ခး ဖံလံပဲၫ့ ဖိၪၥံၪအအီၪအကၠီၩ့ ၦအဒုၭဆၧၫ့ထဲၩ့ ခး ဂၠါပၫ့ ဖိၪၥံၪဖၧၩ့  ဂိၫပိၫ့စံၫ့ နီၪ မွဲဝ့ၫ ၦအမံၩ့ဎိၩ လဂၩနီၪလီၫႉ နံၪ့ (၁၉၄၁ )  နံၪ့ လၩဒံၫဇ့ၫဘၫ အခံၫ့ ဝံးမနံၫလၫ နီၪ လၩ့ထ့ၬလၧ ခးဂၠါပၫ့ ဖိၪၥံၪ အစူၪဖၧၩ့ကကၠၪ ခးဂၠါပၫ့ ဖိၪၥံၪနီၪ ကဖီၪ့ ဂိၫပိၫ့စံၫ့ အဂး လီၩ့ဎွါဝ့ၫဒၪနီၪလီၫႉ ဂိၫပိၫ့စံၫ့ယီၩ ၦအဂဲၫ ဒုၭ အဝ့ၫၥံၪစွါဘဲၫ ဒုၭဆၧၫ့ထဲၩ့ဝ့ၫဒၪ လၧ ဆၧၥုၪ့ဒုၩၥၭဒုၩဖၧၩ့အကၠီၩ့ အလိၬၥၭၥံၪ ဖျိၭထၬအဝ့ၫ အမံၩ့လၧ ဂၠ့ၫမံၫရိၩ နီၪလီၫႉ

          ဂိၫပိၫ့စံၫ့ ဘၪစဲၪ့အီၪၥူၪၥၭအခံၫ့ အဝ့ၫအဆၧၥၭမၧၫ့ ကဆုးအီၪအဂး ကၪဂဲၩဝ့ၫဒိၪမၬလါနၫ့ အဝ့ၫအၥၭဖၧၩ့ ကဆါယွၩနီၪ ကနဲၪအ့ၪအဝ့ၫဖၧၩ့ၥၭဂီၩ့ ကအီၪပဒၩ့ထၬအ့ၪအဝ့ၫလၧ ဒုၪဒၩၥံၪ အစူၪဖၧၩ့ အကၠီၩ့နီၪလီၫႉ ဂိၫပိၫ့စံၫ့ ယီၩ ဘၪစဲၪ့အီၪၥူၪၥၭအခံၫ့ လ့ၩကိၭန့ထဲး အဂံၪ့ဒီၪ့ဖိၪၥံၪထီး အလူၬဂီၩ့ လ့ၩစဲၪ့အီၪၥူၪၥၭလၧ ၡါမုနၧၫ့ဖၫ အလးဖၧၩ့ နီၪလီၫႉ အဝ့ၫဒဲ အလိၬၥၭၥံၪနီၪ အဒုၪဒၩ ဂၠါပၫ့ဖိၪၥံၪ လီၩ့ဎွါအဝ့ၫအကၠီၩ့ အၥၭမၧၫ့ ကဆုးန့အဂး အဆၧယိလါ လအီၪလၧၩ့ဘၪတၭ ကိၭၡၭထၪ့အလူ အၪ့ကံၩ့ဘၩဆိၪဖၪဆၧလၧ ကဆါယွၩ ကယိထွ့ၪမၩဆၧၩ့ အဝ့ၫၥံၪအဂး နီၪလီၫႉ ဂိၫပိၫ့စံၫ့ ကိၭၡၭထၪ့အၪ့ကံၩ့ဘၩဆိၪဖၪဆၧလၧ ယွၩအီၪဂီၩ့ကကၠၪ အဂဲးအဘၭ န့ထၪ့ဂီၩ့ အဆၧ  ယိလါ အီၪထၪ့ထဲၩ့ဝ့ၫဒၪနီၪလီၫႉ ကကၠၪကကၠၪ အဒုၪဒၩၥံၪနီၪ လီၩ့ဒိၪ ၡိၬၥံၪဂီၩ့ လီၩ့ဎွါအဝ့ၫၥံၪ နါဂၧၫ့ဝ့ၫဒၪ အလူနီၪလီၫႉ ကကၠၪကကၠၪ အဝ့ၫအလိၬၥၭၥံၪနီၪ လ့ၩထီၩ့လၧ ဒုၪဒၩၥံၪအီၪအလးတၭ ဘၪမၩကဲၪထၪ့ ဆၧအၪ့ကံၩ့ ဘၩဆိၪဖၪ အၪအၪလၧ ကဆါယွၩအီၪနီၪလီၫႉ ကဆါယွၩ အဆၧယိ ထွ့ၪမၩဆၧၩ့အကၠီၩ့ အဒုၪဒၩၥံၪ နီၪ ဒၪအဝ့ၫၥံၪ အလိၬၥၭ လနၩ့နၩ့လါနၫ့ လၥ့ၪယၫဘၪဝ့ၫ တၭ ဖီၩ့ဖျ့ၭဝ့ၫဒၪလၧ အၥၭကဘၪထိး ဆၧမၩၥံၫခွံၬ အဂဲးနီၪလီၫႉ

          ဂိၫပိၫ့စံၫ့ဒဲ အလိၬၥၭၥံၪနီၪ လ့ၩထီၩ့လၧ ခးဂၠါပၫ့ဖိၪၥံၪ အဆၧဒုၭဆၧယၩ အလးဖၧၩ့ကကၠၪ ခးဂၠါပၫ့ဖိၪၥံၪ အၪအၪဂီဂီနီၪ ဂဲၫထၪ့လၧ အဝ့ၫၥံၪအီၪအလး နီၪလီၫႉ အၡါမၪနီၪ ခးဂၠါပၫ့ဖိၪၥံၪနီၪ အီၪဂဲၫထၪ့လၧ မုနုၬအလးတၭ အဝ့ၫၥံၪနီၪ ကဘၪလ့ၩယဲၩ့ထၪ့အၥၭလၧ မုထၪ့အလးကကဲၩ့နီၪ လီၫႉ အဝ့ၫၥံၪ အဆၧကိၪ့ဆၧတဲၩ့ လအီၪလၧၩ့ ဘၪတၭ ကဘၪလ့ၩ ထခီၫလဲၪ ကဘၪမၩ မနီၪလဲၪ အဂဲး အၪ့ကံၩ့ဘၩဆိၪဖၪဝ့ၫဒၪလၧ ကဆါယွၩအီၪနီၪလီၫႉ အၪ့ကံၩ့ဘၩဆိၪဖၪဆၧဂီၩ့ လၧအဝ့ၫၥံၪ အဆၧကိၪ့ဆၧတဲၩ့ဖၧၩ့ ကဘၪလ့ၩဝ့ၫဒၪလၧ မုနုၬ အလး အဒုၪဒၩၥံၪ ဂဲၫစဲၪ့ထၪ့အလး နီၪလီၫႉ  လီၩအ့ၪအလိၬၥၭၥံၪဘဲၫယီၩၥိၭကကၠၪ အလိၬၥၭအၪအၪဂီဂီနီၪ ၥၭအဆၧလၩ့ဎိၭ လအီၪဘၪဂီၩ့ ခွံၬၡိၭထးအဝ့ၫၥံၪဂီၩ့ စဲၪ့ထၪ့လၧ အဝ့ၫၥံၪအအီၪနီၪလီၫႉ အဝ့ၫၥံၪအလိၬၥၭဖၧၩ့ ဆံၫဂၩနီၪ ကဘၪ လ့ၩလၧ မုနုၬအလးနီၪ လ့ၩထဲၩ့ဝ့ၫလၧ မုထၪ့အလးအကၠီၩ့ ဂဲၫထဲၩ့ထဲၩ့လန့လၧၩ့ဘၪ အၥၭမၧၫ့ လအီၪလၧၩ့ဘၪ နီၪလီၫႉ ဂိၫပိၫ့စံၫ့ဒဲ အီၪထးအလိၬၥၭၥံၪနီၪ ဘဲၫန့ထၪ့ဘၪ ကဆါယွၩ အဆၧဖ့ၪ နဲၪ ဖၧၩ့ၥၭၥိၭ လ့ၩဝ့ၫဒၪလၧ မုနုၬ အလးဖၧၩ့အကၠီၩ့ ဒၪခီၩ့လၧ ဂၠါပၫ့ ၥုၭဖိၪၥံၪလါနၫ့ လမၩဒုၪမၩဒၩဘၪ အဝ့ၫၥံၪ နးမံၩ့နီၪလီၫႉ ခၪ့ဖျီၪလၧ အခံၫ့အနီ အိၩ ဂိၫပိၫ့စံၫ့ဒဲ အဂံၪ့ဒီၪ့ဖိၪၥံၪ ထီးအလူၬနီၪ ၥၭနၪ့လန့ လၧၩ့ဘၪ ကဆါယွၩ အဆၧယိထွ့ၪ မၩဆၧၩ့နီၪလီၫႉ မွဲဆၧ နီ လၧကဆါယွၩအဖၫ့ခိၪ အ့ၪပအီၪက့ၪ ထၬ ပဆၧဆူဆၧနဲၩလၧ ၥုၪ့ၥၭလဖျိၪ့ဎးစွါဘဲၫ ကဆါယွၩ ကယိထွ့ၪ မၩဆၧၩ့ပၧၩ ကိၭအဆၧၫ့ကိၭအ ထီဒ့ၭအကၠီၩ့ ယရၩလၩ့ ဖ့ၪၥ့ၪယၫအ့ၪဘၪနၥံၪ ဂိၫပိၫ့စံၫ့ အဂဲး ဘဲၫယီၩၥိၭနီၪလီၫႉ နၥံၪ ပၧၩၥံၪ ကိၭဂၩဒ့ၭ မွဲပအီၪက့ၪထၬ ပဆၧဆူဆၧနဲၩလၧ ယွၩအီၪ နၧၩ့ဝ့ၫဒၪ ကိၭဒံၩကိၭဂၩလါဆံၭႉ

Add new comment

3 + 1 =