ခးအဲၫယၫလၫ့လံၩခံၫဖိၪ Sr. ခရၧၭကဲ (Crockett) အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ခးအဲၫယၫလၫ့လံၩခံၫဖိၪ Sr. ခရၧၭကဲ (Crockett) အဂဲးအကၠီၩ့နီၪလီၫႉ Sr. Crockett ယီၩ ခး (အီကွေဒေါ)ႇ (စပိန်) မံၭထၭမုၪ အခရၧၫ့ဖၧၩ့ မွဲဝ့ၫ မံၭထၭမုၪလဂၩနီၪလီၫႉ နံၪ့ (၂၀၁၆) နံၪ့ဒၪအိၩ လၧခး (အီကွေဒေါ) ဖၧၩ့ ဂၪ့ခိၪဝၭအကၠီၩ့ Sr. Crockett လဂၩ ထဲၩ့ပၫဖိၬထဲၭလၧ ဖူၫဆံၫဂုဖၧၩ့နီၪလီၫႉ အနီၫဒၪအိၩ အဝ့ၫယီၩ အၥၭအီၪ (၃၃) နံၪ့ဒ့ၭနီၪလီၫႉ Sr. Crockett ၥံၪဖီၩ့ခွံၬကကၠၪ အဝ့ၫအၪ့က့ၩဘၩဆိၪဖၪဆၧအဖၧၩ့ ဆၧစီၩ့ဆၧမၩ့ ကဲၪထၪ့ဝ့ၫ လမံၩ့ဂီၩ့လမံၩ့တၭ ၦၡၩၥံၪ အဆၧၥၭမၧၫ့ ဆၧအၪ့လဲၪထၪ့ၥၭ န့ဝ့ၫဒၪအကၠီၩ့ လၧ (စပိန်) မံၭထၭမုၪ အခရၧၫ့ဖၧၩ့ လီၩဖျီၪထၪ့ထၬဝ့ၫဒၪနီၪလီၫႉ

Sr. Crockett အဆၧမၧၫ့ အဂဲးအဖး အခၪ့ထံၭခၪ့ဎၧၩ မွဲဝ့ၫ All or Nothing ၡါဂဲးဖး ဒိၪထဲၩ့ဝ့ၫကကၠၪ လၧ You Tube ဖၧၩ့ ၦၡၩအယိထဲၩ့ အီၪဝ့ၫဒၪ လံခွးဂီၩ့ ဆၧလၧၡါဂဲးဖးယီၩ့အကၠီၩ့ ဂၪ့ခိၪထၧၫ့ဖျိၪ့ယၫ ၦၡၩၥံၪ နးၥၭ အၪ့လဲၪထၪ့ၥၭ အၪအၪဒ့ၭနီၪလီၫႉ ဆၧဆူနဲၩဆၧဘိၪ့ဆၧဘၩဖိၪၥံၪနးဆ့ အၪ့က့ၩအၪ့ယၫလၧ အဝ့ၫဒၪအီၪဂီၩ့ အဝ့ၫဒၪနးဆ့ ဒီၪနါခိၭနၫဝ့ၫအကၠီၩ့ အဝ့ၫအခရၧၫ့ လီၩထၬဝ့ၫဒၪနီၪလီၫႉ

Sr. Crockett လၧအဆံၭဆံၭ ခီၩဒၪအိၩ လမိကဲၪဘၪ မံၭထၭမုၪလဂၩနီၪလီၫႉ အဝ့ၫအဆၧထိစိၩနီၪ မွဲဝ့ၫဒၪ ကမိကဲၪဘၪ (ဟောလီဝုဒ်) ဆၧဂၩ့ဒီၩ့မုၪ လဂၩနီၪလီၫႉ အမံၩ့ဎိၪထၪ့ကကၠၪ အၪ့အီၩဆၧမၧၩဆၧပၠိၭႇ လ့ၩမုၬလ့ၩလၩ အဲၪဒိၭမၩဝ့ၫဒၪနီၪလီၫႉ နံၪ့ (၂၀၀၀) အဝ့ၫအၥၭအီၪ (၁၈) နံၪ့အခံၫ့ အထံၩၥိၭ ကိၭအဝ့ၫလၧ ခး (စပိန်) ကကၠၪ အဝ့ၫလ့ၩဝ့ၫဒၪနီၪလီၫႉ ဆၧလၧဆၧလ့ၩယီၩ မွဲဝ့ၫဒၪ ဆၧဘိၪ့ထၪ့ဘၩထၪ့ဆၧ အဆၧလ့ၩလမံၩ့နီၪလီၫႉ ဆၧလ့ၩယီၩ အ့ၪမွဲၥ့ၪယၫဘၪဝ့ၫလၧ ဆၧဘိၪ့ထၪ့ဘၩထၪ့ဆၧ အဆၧလ့ၩစွါဘဲၫ လ့ၩဝ့ၫအဂး ကဲၪထၪ့လၥ့ၪဘၪအကၠီၩ့ လီၩထးထၬဝ့ၫဒၪနီၪလီၫႉ

အဝ့ၫယီၩ ထီၩလၧ (စပိန်) တၭ အၥၧၭမုဎိၩနံၩ (Good Friday) နီၪ ဘဲၫၦဂူၫဂၩၥံၪ လ့ၩနၧၩမၧၫ့ ထုၪ့စူၪယၫၥိၭ လ့ၩနၧၩမၧၫ့ဝ့ၫကကၠၪ အဝ့ၫ အၥၭခံဖၧၩ့ ဂဲၫကဲၪထၪ့လၧ ကဆါယွၩ ကိၭထၪ့အဝ့ၫလၧ မံၭထၭမုၪ အဆၧၥၭမၧၫ့နီၪလီၫႉ လၧနံၪ့အနီၪဖၧၩ့ ဂၪ့ခိၪၥၭဘၪ့ဖိၪ အဘိၪ့မုနံၩနီၪ ဒၪခီၩလၧ ၥၫ့ခၪလဂၩတၭ လ့ၩကိၭန့အဝ့ၫလၧ (the Servant Sisters of the Home of the Mother) အခရၧၫ့နီၪလီၫႉ အဝ့ၫယီၩ ဒိၭန့ မံၭထၭမုၪအဆၧကီၩ့ဆၧၥိၭဂီၩ့ အၪ့န့ထၪ့အမံၩ့လၧ Sr. Clare Maria of the Trinity and the Heart of Mary နီၪလီၫႉ

လၧလစႇထၪ့ဘၪ အဆၧလ့ၩလၧ (အီကွေဒေါ) အခံၫ့ ကွ့ၭထၬဝ့ၫ အလံၬဘျံၭဖၧၩ့ “လၧယဆၧဆီၫ့မီၪ့ဆၧမၬဆၧဒဲ ယၥၭထၧၫ့ဖျိၪ့ယၫ ဆၧကိၭမံၩ့နီၪ မွဲဝ့ၫကဆါယွၩအဆၧႇ အဆၧန့ၥၫအကၠီၩ့ ပၧၩထၬယၩလါဆံၭ ဖါကဆါယွၩဧ့” ကွ့ၭထၬဝ့ၫ အီၪဝ့ၫဒၪ ဘဲၫယီၩၥိၭနီၪလီၫႉ အဝ့ၫယီၩ လၧၥၫထနၫ အဆၧမၩဖၧၩ့ ဖီၪထၪ့ဖံၭထၪ့ လၧဆၧအဲၪဆၧကွံၩ လၧၫ့လၧၫ့ဎွ့ၩဎွ့ၩအကၠီၩ့ န့ထၪ့ဘၪ ၦၡၩၥံၪအဆၧအဲၪဆၧကွံၩဂီၩ့ ၦၡၩၥံၪၥ့ၪယၫထၪ့ အၪအၪဒ့ၭနီၪလီၫႉ

Sr. Crockett ယီၩ ကဲၪထၪ့ မံၩ့ဎိၩၥၪဖျီၪ လၧဂၪ့ခိၪချိၫ့ဖၧၩ့ကကၠၪ အဝ့ၫအခရၧၫ့ဖၧၩ့ မံၭထၭမုၪၥံၪ ၥၭဆၧဆၫႇ နးၥၭဆၧဆၫလဖၪ ဘျၪထဲၩ့ၡီၩ့ထဲၩ့ႇ န့ထၪ့ဆၧၥၭမၧၫ့ ဆၧအၪ့လဲၪထၪ့ၥၭဒဲ ဒၪထၪ့ဘၪ ဆၧစီၩ့ဆၧမၩ့အကၠီၩ့ လီၩဖျီၪထၪ့ထၬဝ့ၫဒၪနီၪလီၫႉ အၪ့န့ထၪ့ အဖိၪအဒံၪအဂး ကၪဂဲၩဝ့ၫဒၪ ၦထၪ့ၡါ လနၩ့နၩ့ အၪ့က့ၩဘၩဆိၪဖၪဆၧလၧ Sr. Crockettအီၪတၭ အဂုအၥၪ န့ထၪ့ဘၪအကၠီၩ့ႇ ၦလၧအမိမၩၥံၪခွံၬၥၭ ၦလနၩ့နၩ့ ယိထၪ့ဘၪ Sr. Crockett အဆၧဂၩ့မၧၫ့ကကၠၪ ကဘၪအီၪၥၭမၧၫ့ အဆၧၥၭမၧၫ့ ဘဲၫၥ့ၪလဲၪအဂး ဒၪထၪ့ဝ့ၫအကၠီၩ့ႇ ၦလၧအီၪပဲၩထၬၥၭလၧ ဆၧအီၪကီၪ့ဖၧၩ့ လနၩ့နၩ့ န့ထဲၩ့ဘၪ ဆၧဆူနဲၩအကၠီၩ့ ခရၧၫ့မံၭထၭမုၪလဂၩ လီၩထၬဝ့ၫလၧ (Spain Website) ဖၧၩ့နီၪလီၫႉ မွဲဆၧနီၪ အဝ့ၫယီၩ ကဘၪထိးရွံထၪ့ၥၭလၧ ၦဆံၫ့ဎံၪလဂၩအဂး အီၪတဲၩ့ဝဲၩထၬဝ့ၫဒၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪ လၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ