ကၩလိၫအၫကူၩတံၭ

ထၧၫ့ဖုဝဲထံၩၥိၭထီးလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၦဆံၫ့ဎံၪနီၪ မွဲဝ့ၫဒၪ နံၪ့ ၂၀၂၀ ဖၧၩ့ၦအဘၪထိးထံၬထၪ့အၥၭလၧ ကကဲၪထၪ့ၦဆံၫ့ဎံၪအလး မွဲဝ့ၫ ကၩလိၫအၫကူၩတံၭ နီၪလီၫႉ အဆၧၥၭမၧၫ့ယီၩနီၪ မိဖါၥံၪဒဲ အမိဂါဖၫထံၥံၪ အဘူၭအထံးဟံၪဘၪအၪ့န့ထၪ့ထဲၩ့ဆၧအဒီၩ့အထၬလၧအဝ့ၫအီၪနီၪလီၫႉ

ကၫလိၫအၫကူၩတံၭတ အမိမိနီၪ လၧအဆၧဘိၪ့ဆၧဘၩဂဲးဖၧၩ့အၥၭဆုးလၩ့လအီၪဘၪလါနၫ့အဖိၪခွၫကၩလိၫအၫကူၩတံၭယီၩ ၥုၪ့ဆီၪ့ၥၭဆီၪ့အီၪဝ့ၫဒၪလၧ ဆၧဘိၪ့ဆၧဘၩဂဲး အဝ့ၫနီၪမွဲဝ့ၫဖိၪၥၪလဂၩလါနၫ့ဝၧကဆါယွၩအဖၫ့ခိၪအီၪက့ၪထၠအဆၧဆူနဲၩဂုးဂုးခၧၫ့ခၧၫ့နီၪအမိမိအဂး ကဲၪထၪ့ဝ့ၫဆၧအၪ့ထၩဆၧၫ့ထီဂဲးနီၪလီၫႉ

အဖိၪခွၫကၩလိၫအၫကူၩတံယီၩ ဆၧဘိၪ့ဆၧဘၩဂဲးဖၧၩ့အၥၭဆုးလၩ့အီၪဝ့ၫဒိၪမၬဒ့ၭအကၠီၩ့ကဘၪဖ့ၪဂဲးဖ့ၪဘၭအ့ၪဝ့ၧဘဲၫၥ့ၪလဲၪလၥ့ၪယၫဘၪဝ့အကၠီၩ့အၪ့ကံၩ့ဆၧကိၪ့ဆၧတဲၩ့လၧအလိၬၥၭကၭၥလ့ၬဆၧဘိၪ့ဆၧဘၩဖိၪလဂၩအအီၪဂီၩ့ အလိၬၥၭနီၪနးဆ့ဖ့ၪၥ့ၪယၫအ့ၪအဝ့ၫလၧ ဘိၪ့ခိၪၥၫ့ခၫလဂၩဂီၩ့ ဘိၪ့ခိၪၥၫ့ခၫနီၪဘဲၫဖိၪၥၪယီၩအဆၧဆူနဲၩ အဝံအစၧၩ့ဂုးခၧၫ့အဂး အၪ့မၧၫ့ၥီၪ့လိၪနဲၪလိၪအၥၭဘၪထွ့ၪလၧယွၩလူယွၩထၫအဆၧၥ့ၪယၫနၪၥ့ၪနီၪလီၫႉ အဖိၪခွၫ ကၩလိၫအၫကူၩတံ နီၪ ၥီၪ့ၥိၪနဲၪၥိၪထဲၩ့ယွၩလူယွၩထၫလါနၫ့ အမိမိနီၪ ဘၪထွ့ၪလၧဆၧဘိၪ့ဆၧဘၩဂဲးလအီၪယ့ၪထၬဘၪဝ့ၫယိၬယိၬထၧၫ့ထၧၫ့ နးမံၩ့နီၪလီၫႉ ဘိၪ့ခိၪၥၫ့ခၫအဆၧၥီၪ့ဆၧၥၫ့အဆၧယိထွ့ၪမၩဆၧၩ့အကၠီၩ့ ကၩယိၫအၫကူၩတံၭအၥၭအီၪဝ့ၫ (၇)  နီၪ့ဒံၭလီၫႉ န့ထၪ့ဘၪကိၪဘိၪ့ဆံၫ့ဎံၪယူၭနီၪလီၫႉ 

အဝ့ၫၥံၪအဂံၪ့ဒီၪ့ထၧၫ့ဖျိၪ့ယၫလ့ၩဂၭအလးကစီၪ့စီၪ့ယါနၫ့ ကၩလိၫအၫကူၩတံၭယီၩ လ့ၩလီၩ့ဎွါထၪ့မံဆၩဆၧလုထၪ့ဆၧၩ့န့ဂီၩ့ လၧၩဒိၭန့အၪ့ ကိၪဘိၪ့ဆံၫ့ဎံၪနီၪလီၫႉ အဖိၪခၪၫဆံၭ ကၩလိၫအၫကူၩတံၭအဆၧဆူနဲၩအီၪလၫကိၪဘိၪ့ထံၫ့ဎံၪဖၧၩ့ ဘဲၫယီၩၥိၭအကၠီၩ့ အမိမိနးဆ့ ဆၧဘိၪ့ဆၧဘၩအဖၫ့ခိၪဆၧအၪ့လဲၩထၪ့ၥၭ ကဲၪထၪ့ဝ့ၫဒွယူၭနီၪလီၫႉ လၧကိၪဘိၪ့ဆံၫ့ဎံၪအဖၫ့ခိၪ အဆၧဆူနဲၩအီၪဆၪ့ထဲၩ့ အဆၧအဲၪဆၧကွံၩအီၪထၩ့ဒၪနီၪလီၫႉ

ကၩလိၫအၫယူၩတံၭအီၪၥၭမၧၫ့ ဆံၫ့ဆံၫ့ဎံၪဎံၪန့ဝ့ၫဒၪနီၪ မွဲဝ့ၫအီၪက့ၪထၬအဆၧဆူနဲၩ ဎိၩဒိၪလၧ ကိၪဘိၪ့ဆံၫ့ဎံၪအဖၫ့ခိၪအကၠီၩ့နီၪလီၫႉ အဝ့ၫအဆၧချဲၩ့အီၪလ့ၫလမံၩ့နီၪမွဲဝ့ၫဒွ “ပကထီၩ့မူၭခိၪဘၩ့မုအဂးကိၪဘိၪ့ဆံၫ့ဎံၪယီၩ မွဲဝ့ၫဖၧၩ့ၥၭအဖျဲၪလဘီၩ့“ အကၠီၩ့နီၪလီၫႉ ဘဲၫ ကၩလိၫအၫလူၩတံၭ ဘၪဆၧထံၭထၪ့လၧ ၦဆံၫ့ဎံၪလးကန့အဂး ၦလီၩ့ဎွါထုၬထၪ့အဝ့ၫအဂဲးအဖးလဂၩအဆၧလီၩဖျီၪထၪ့အီၪဝ့ၫ “ၦၡၩလဂၩအီၪက့ၪထၬအဆၧအဲၪဆၧကၪံၩလၧ ယွၩအဖၫ့ခိၪအဎိၩဒိၪနီၪ မီၪ့ဎီၩ့ဒၪလၧ အနိၩ့အဎီၩ့ၦၡၩၥံၪ ကအဲၪယွၩဘဲၫအဝ့ၫၥိၭဆၧဆၪ့ထွ့ၪလမံၩ့အကၠီၩ့နီၪလီၫႉ“

အဝ့ၫကလ့ၩထၪ့ဘၩယွၩအဂး အမိမိ ဘၪလ့ၩကိၭန့အဝ့ၫမွဲအ့ၬႉ အဝ့ၫလ့ၩထၪ့ဘၩယွၩ ကိၭနံၩအကၠီၩ့အမိမိဒဲ အနဲၩ့ဎီၩ့ၦၡၩလဖၪၥံၪနီၪ ဆၧဲၪဆၧကံၩ ဎိၩဒိၪထၪ့ထဲၩ့လၧ ယွၩအဖၫ့ခိၪနီၪလီၫႉ ကၩလိၫအၫကူၩဧတံၭအမိမိနီၪ အၪ့န့ထၪ့ထီ ကိၪဘိၪ့ဆံၫ့ဎံၪစကရမ့ၫတူၩအခံၫ့အိၩကကၠၪ န့ထၪ့ဘၪ ဆၧဒိၭန့ဆၧဒူၩယၪ့ဖပိၪစကရမ့ၫတူၩ အခံၫ့အိၩကကၠၪ အၪ့န့ထၪ့ဆၧထၪ့အီၪဎုၬစကရမ့ၫတူၩအခံၫ့အိၩကကၠၪထၪ့ဘၩယွၩၥရိၬအီၪဝ့ၫဒၪ (၃)  ဘျၩ့ဒံၭနီၪလီၫႉ

အဖိခွၫကၩလိၫအၫကူၩတံၭအကၠီၩ့ လ့ၩထၪ့ထဲၩ့ မံဆၩအဆၧလူထၪ့ခိၭမၭခိၭမၬဂီၩ့ အဆၧအၪဆၧကွံၩဎိၩဒိၪထၪ့ထဲၩ့ဝ့ၫဒၪလၧကိၪဘိၪ့ဆံၫ့ဎံၪအဖၫ့နီၪလီၫႉ မွဲဆၧနီအဖိၪခွၫပၩလိၫအၫကူၩတံၭနီၪအဝ့ၫအဂး ဖ့ၪအ့ၪဆၧထိးထဲၩ့တၩ့ထဲၩ့အကၠီၩ့ အဆၧလီၩဖျီၪထၪ့အီၪဝ့ၫဒၪနီၪလီၫႉ

ကၩလိၫအၫကူၩတံၭ ယီၩ မွဲဝ့ၫဖိၪၥၪလဂၩ ၥၭဘၪ့ဖိၪလဂၩလါနၫ့ အၥၭဆုးလၩ့အီၪလၧ ကွ့ၩၥဲၪ ဆၧကွ့ၩ (ဂိမ်း) လါနၫ့မုကနွံၫမၬကွ့ၩၥဲၪအဆၧကွ့ၩနီၪ ကနၩရံၫလီၫႉ ဘၪမနီၪလဲၪစွါဘဲၫ လၧအၥၭဆုးလၩ့အီၪဆၧလမံၩ့အဖၫ့ခိၪလထိးလူၬဘၪအခံၫ့ထီးအလူၬနီၪလီၫႉ အၡါမၬအဝ့ၫနီၪလၧ ဆၧၥ့ၪဆၧဘၪ (နည်းပညာ) ဖၧၩ့အဆၧၥ့ၪယၧနၪၥ့ၪ အီၪဝ့ၫဒၪ ဎိၩဒိၪဒ့ၭနီၪလီၫႉ အၥၭ (၁၄)  နီၪ့အခံၫ့နီၪ ကွ့ၭထုၬဖျီၪထၪ့ထၬကိၪဘိၪ့ဆံၫ့ဎံၪအဂဲးဂီၩ့ဝ့ၫဒၪယူၭနီၪလီၫႉ

အဝ့ၫနီၪမွဲဝ့ၫ ခး (လန်ဒန်) ဖိၪလဂၩဂီၩ့န့ထၪ့ဘၪဆၧအီၪဖၬဲၪလၧ နံၪ့ (၁၉၉၁) နီၪ့အိၩနီၪလီၫႉ အဝ့ၫမံၫမၫတဲၩ့လၧ ဎြံၬအခံၫ့နီၪ မွဲဝ့ၫ နံၪ့ ၂၀၀၆ နံၪ့အိၩဂီၩ့နံၪ့ ၂၀၂၀ လၩအီၬတိၫဘၪ ၁၀ ၥၫ့အိၩဘၪဆၧထံၭထၪ့လၧကကဲၪဘၪ ၦဆံၫ့ဎံၪအလးယူၬနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ကၩလိၫအၫ ကူၩထံၭ ယီၩ အီၪက့ၪထၬ အဆၧအဲၪလၧ ကိၪဘိၪ့ဆံၫ့ဎံၪအဖၫ့ခိၪထၧၫ့မုလဲၪနီၪ ပၥ့ၪယၫဘၪယူၭတၭပကအၪ့န့ထၪ့ ဆၧအဒီၩ့အထ့ၬလၧအဝ့ၫအီၪလါဆံၭနဲၪႉ