ကိၫနိၫဆုခဲ မဲဆုၡံၫတၭ

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉႇ မံၩ့ဎိၩၥၪဖျီၪ မုၪခွၫလၧ အအီၪအနိၫ့ အဆၧရၩလၩ့ ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ၦအၥုၪ့ထၪ့ န့ၫၡ့ၫနဲၪ ပၫ့နဆိၩန့ (စ်) ကၫ့မနံၫ ကိၫနိၫဆုခဲ မဲဆုၡံၫတၭ အဂဲးအကၠီၩ့နီၪလီၫႉ ထၧၫ့ဖုဝဲထံၩၥိၭၥံၪဧႉႇ မဲဆုၡံၫတၭ အဆၧၥၭမၧၫ့ ထၧၫ့ထီယၫဖၧၩ့ အီၪက့ၪထၬ အဆၧထိစိၩနီၪ မွဲဝ့ၫဒၪ ဆၧလ့ၩထၪ့လ့ၩထီၫ ကအီၪဝ့ၫလၧ ဆၧလၧၫ့ဆၧဎွ့ၩ ဖၧၩ့ အဂးနီၪလီၫႉ မဲဆုၡံၫတၭယီၩ အဆံၭဆံၭအိၩ ထၪ့ဘၪဆၧမၩလိၪ ဂ့ၩဂ့ၩ ဘၪ ဘၪအ့ၬနီၪလီၫႉ ဂဲၫလိၪဘီၩ့ထၪ့အၥၭ အခံၫ့နးဆ့ ဘၪအၪ့ ဘၪအီၩဆၧလၧၫ့ဆၧဎွ့ၩ လအီၪဘၪနီၪလီၫႉ ဆၧဆီၪ့ဆၧချဲၫ့ဆ့ လအီၪ ဘၪဂ့ၩဂ့ၩ ဘၪ ဘၪနီၪလီၫႉ အထံၩအၥိၭ အီၪအၪ ၦၡၩမွဲဧၪအ့ၬနီၪလီၫႉ ကဘၪလ့ၩထဲၩ့လၧ ၦၡၩၥံၪအကျၩႇ ကဘၪချဲၩ့လၧ ၦဂူၫဂၩၥံၪ စွါ ဘဲၫ မ့ၬခိၪမ့ၬမဲ ႇ ၥၭမဲၪၥၭဖျဲၩ့ဆၧ အီၪဝ့ၫဒၪနီၪလီၫႉ

            အၥၭထီၩ့ဝ့ၫ အနံၪ့ (၃၀ )  အခံၫ့နီၪ မဲဆုၡံၫတၭလဂၩ အၪ့လဲၩထၪ့ခွံၬ အဆၧၥၭမၧၫ့အလံၩ မွဲဝ့ၫဒၪ ဆၧၥၭမဲၪၥၭဖျဲၩ့ၥံၪႇ ဆၧမ့ၬခိၪမ့ၬမဲၥံၪ ဂီၩ့ ၦဂူၫဂၩၥံၪမၬ မၩကဲၪထၪ့လဘုၪ့ဘၪ ဆၧမၩ အဝ့ၫမၩဝ့ၫဒၪနီၪလီၫႉ အၥၭထီၩ့ဝ့ၫ (၄၀)  အခံၫ့နီၪ မဲဆုၡံၫတၭလဂၩ ကဲၪထၪ့ဝ့ၫဒၪ ၦအယိဆၧလၧ ထီလၧယၫ အဂးခိၪနါႇ ဆၧကိၪ့ ဆၧတဲၩ့ အီၪဝ့ၫဒၪ ဎိၩဒိၪ ၦၡၩလဂၩ ဂီၩ့ ၥုၪ့ထၪ့ ခီၫ့ၡၩဂဲးဖၭဒိၪ န့ဝ့ၫဒၪယူၭနီၪလီၫႉ အခီၫ့ၡၩဂဲးအမံၩ့နီၪ မွဲဝ့ၫဒၪ  (Matsushita Electric) ကီၫပိၫရ့ၩၡ့ၩ နီၪလီၫႉ အဝ့ၫနီၪ အဆၧကိၪ့ဆၧတဲၩ့ အီၪဝ့ၫဎိၩဒိၪအကၠီၩ့ မဲဆုၡံၫတၭ ( Electric )ဆၧမၩလးနီၪ အီၪဝ့ၫဒၪလၧ ဆၧလ့ၩထၪ့လ့ၩထီၫဖၧၩ့ ဎိၩဒိၪဒ့ၭနီၪလီၫႉ ဘၪဆဲၫ့လၧ စဲၭ အဂဲး အဝ့ၫ အဆၧၥ့ၪယၫနၪၥ့ၪ အီၪဝ့ၫ အၪမၬဒ့ၭတၭ လၧအဝ့ၫၥံၪ အဆၧမၩအလးဖၧၩ့ ထုၬထၪ့ ဆၧလဖၪၥံၪနီၪ ဘၪၥိၪ့ဝ့ၫဒၪ လၧ ဂၪ့ခိၪထၧၫ့ဘံၪ့ယၫဖၧၩ့ယူၭနီၪလီၫႉ အဝ့ၫအဆၧကိၪ့ဆၧတဲၩ့ဒဲ အဆၧကျ့ၭစၨၭအကၠီၩ့ လခဲၫ့ ကဲၪထၪ့ ၦအကွ့ၩထုၪထၪ့လံၬ ဆရၫ ႇ ၦအလိၪၥံၪအဂး မွဲဝ့ၫ ၦအဖ့ၪအ့ၪဆၧမၩဆၧၩ့ ႇ ခီၫ့ၡၩဂဲးဖၧၩ့ဒဲ ဆၧလ့ၩထၪ့လ့ၩထီၫ ကအီၪလၧ ဆၧလၧၫ့ဆၧဎွ့ၩဖၧၩ့အဂး မွဲဝ့ၫ ၦအမၩကဲၪထၪ့န့ ဆရၫလဂၩ ဒဲ ထံၫခးဂဲး အဆၧမၩၥံၪဖၧၩ့ဆ့ ဖ့ၪအ့ၪ ဆၧမၩဆၧၩ့ န့ဝ့ၫဒၪယူၭနီၪလီၫႉ

            မဲဆုၡံၫတၭယီၩ က ဘၪၥီၪ့လိၪနဲၪလိၪၥၭ အဂးစွါ ဘဲၫ လအီၪက့ၪထၬဘၪ ၥုၪ့ၥၭ အဎိၩအဆံၭနီၪလီၫႉ အီၪအၪ့ၥၭမၧၫ့ လၧ ထီ အဆၧလ့ၩထၪ့လ့ၩထီၫ အီၪ မီၪ့ဎီၩ့နီၪလီၫႉ ကအီၪက့ၪထးလၧ ထီအလးခဲၫ့အဂး အၥၭလုလအီၪ ဘၪနီၪလီၫႉ မဲဆုၡံၫတၭယီၩ အၥၭအီၪဝ့ၫ (၇၀)  အလးခဲၫ့နီၪ အီၪဘၪအၪ့ဘၪ လၧၫ့လၧၫ့ဎွ့ၩဎွ့ၩယူၭ နီၪလီၫႉ မဲဆုၡံၫတၭယီၩ အီၪၥၭမၧၫ့ ဘၪဝ့ၫလၧ ဂၪ့ခိၪဖၧၩ့ အနံၪ့ (၉၄ )  နံၪ့နီၪလီၫႉ အဲၪကွံၩ ဘၪ ထၧၫ့ဖုဝဲ ထံၩၥိၭၥံၪဧႉ ႇ မဲဆုၡံၫတၭ အမံၩ့ယီၩ ၦၡၩၥံၪ လၥ့ၪယၫ ဘၪ အၪအၪလါနၫ့ အဝ့ၫ ဖိၬလိၬထုၬထၪ့ထၬ ( National ) ဒဲ ( Panasonic) အမံၩ့အီၪဝ့ၫ ဆၧအၥိၩ့လဖၪ ဂၪ့ခိၪထၧၫ့ ဘံၪ့ယၫဖၧၩ့ ၦၡၩလၥ့ၪယၫ လအီၪ ဘၪနီၪလီၫႉ ၦအထုၬထၪ့ ( Electric  - National / Panasonic ) ကိၫနိၫဆုခဲ မဲဆုၡံၫတၭ အဂဲး မွဲဝ့ၫဒၪ ထၧၫ့ယီၩလီၫ ႉ အဲၪကွံၩ ဘၪထၧၫ့ဖုဝဲ ထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩအဆၧအဲၪ ကိၭဒံၩကိၭဂၩလါဆံၭနဲၪႉ

 

Add new comment

3 + 0 =