ၦဆံၫ့ဎံၪ Pierina Morosini

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Pierina Morosini အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ Pierina Morosiniယီၩ မွဲဝ့ၫဒၪ ၦလၧအီၪပဒၩ့ထၬ ၦဘၪထိးဆၧမၩနၧၩ့မၩစၪလဖၪၥံၪဒဲ ၦအီၪၥၭမၧၫ့ ဆၧဆံၫ့ဆၧဖျ့ၪဖၧၩ့ၥၭဖၧၩ့ၦၥံၪအဂး မွဲဝ့ၫဒၪ ၦဆံၫ့ဎံၪလဂၩနီၪလီၫႉ ၦဆံၫ့ဎံၪ Pierina Morosini ယီၩ အီၪဖျဲၪလၧခး Italy Bergamo ဆၧအီၪကီၪ့ နံၪ့ (၁၉၃၁) နံၪ့နီၪလီၫႉ အဝ့ၫယီၩ အထၧၫ့ဖုဝဲ အီၪဝ့ၫဒၪ ဎိၬဂၩနီၪလီၫႉ အဝ့ၫအမိမိဒဲ အဖါဖါနီၪ မွဲဝ့ၫဒၪ ၦအၡၪ့ဖိၪၥံၪနီၪလီၫႉ ၦဆံၫ့ဎံၪ Pierina Morosini အမိမိဒဲ အဖါဖါနီၪ ၥီၫ့လိၪအ့ၪအဝ့ၫ ဆၭဆၧအဆၧမၩဂီၩ့တၭ အဝ့ၫအၥၭအီၪ (၁၂) နံၪ့နီၪ စႇထၪ့မၩဆၧမၩလၧ ဆၧဆၭဆၧအလးနီၪလီၫႉ အဝ့ၫအဆၧမၩနီၪ ဘၪစႇထၪ့ဝ့ၫလဂီၩ (၆) နၫရံၫနီၪလီၫႉ ဆၧနီၪအကၠီၩ့ ၦဆံၫ့ဎံၪ Pierinaယီၩ လဂီၩအခံၫ့နီၪ ထၪ့ဘၩကၠဲၬဂီၩ့မၬ လ့ၩဆၧမၩနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪယီၩ မွဲဝ့ၫဒၪ ၥၭဘၪ့ဖိၪလဂၩအကၠီၩ့ ဘၪမၩဆၧအီၪကီၪ့အဆၧမၩ ပကိၭဝ့ၫလၧ Catholic Action နီၪလီၫႉ အဝ့ၫမၩ ဆၧအီၪကီၪ့အဆၧမၩအခံၫ့နီၪ လ့ၩထၪ့ဘၪဝ့ၫ ၦဆံၫ့ဎံၪ Maria Gorreti ဘၪထိးရွံထၪ့ ၦဆံၫ့ဎံၪဘိၪ့နီၪလီၫႉ ဆၧဘိၪ့အယီၩ ၦဆံၫ့ဎံၪ Pierina အဂး ဆၧလ့ၩဆၧထဲၩ့ဆၧယီၩ မွဲဝ့ၫအယဲၩ့ထုၬ လက့ၭဒံၭဘၪ မွဲဝ့ၫ အဆိၫ့ထုၬ ဆၧလ့ၩဆၧထဲၩ့ဆၧနီၪလီၫႉ လကၭဒံၭဘၪ ဆၧဘိၪ့ယီၩ မၩအၪ့လဲၩထၪ့အ့ၪအဝ့ၫ အဆၧမၧၫ့ဆၧဂဲၩဘဲၫယီၩဒဲ လၧခဲၫ့အဂးနီၪလီၫႉ အဝ့ၫကမိကဲၪဘဲၫၥိၭ ၦဆံၫ့ဎံၪ Maria Gorretiနီၪလီၫႉ ၦဆံၫ့ဎံၪ လီၩဝ့ၫဒၪနီၪ “ကမၩဖျီး ဆၧလဂ့ၩလဘၪဘၪ ဆၧအအၧၩ့ လၧဆၧမၩအလးနီၪ ကထိးၥံၪဝ့ၫဒၪအၥၭနီၪလီၫႉ”
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ Pierina ယီၩ အီၪလၧ ကၠဲၬလူကၠဲၬဂဲးဒဲ အၥၭခံဖၧၩ့ အဲၪဒိၭဝ့ၫဒၪ ကဆါကၠဲၬအကၠီၩ့ လၧကဆါကၠဲၬ အမ့ၬယၫ ကအီၪလၧဆၧဆံၫ့ဆၧဖျ့ၪအဂး အုၩ့လၩ့ဆၧအုၩ့လၩ့ဆ့ၭနီၪလီၫႉ ၦဆံၫ့ဎံၪ Pierinaယီၩ အဲၪဒိၭၦဆံၫ့ဎံၪ ဆၧမၧၫ့ဆၧဂဲၩ အၪမၬလ့ၬနီၪလီၫႉ လါနၫ့ဂ့ၩႇ အဝ့ၫကဘၪယိထွ့ၫမၩဆၧၩ့ အမိမိဒဲ အဂံၪ့ဒီၪ့အဂး ဘၪအီၪလၧဂံၪ့ဂီၩ့ ဘၪၥီၪ့လိၪအ့ၪ အဖုခွၫၥံၪ ကၠဲၬလူကၠဲၬထၫနီၪလီၫႉ အဝ့ၫအၥၭထၪ့ဘၭ (၂၆) နံၪ့ကနံၩနီၪ အီၪဂဲၫထဲၩ့လၧ အဆၧမၩဖၧၩ့ၥၭနီၪ ၦၡၩလဂၩ ကမၩနၧၩ့မၩစၪအဝ့ၫအကၠီၩ့ ဂဲၫထီၩ့လၧအဝ့ၫအမ့ၬယၫနီၪလီၫႉ ၦဆံၫ့ဎံၪ Pierina လဂၩ အီၪပဒၩ့ထၬ အဆၧဆံၫ့ဆၧဖျ့ၪ ကန့အဂး ခိးဂဲးခိးဘၭ ဒုၭဆၧၫ့ဝ့ၫနီၪလီၫႉ လါနၫ့ဂ့ၩ ၦၡၩနီၪ ထးအဝ့ၫအခိၪဎွံၪလၧ လိးခိလီၪ့ဂီၩ့ စဲၪ့ဖျိၭထၪ့ဝ့ၫနီၪလီၫႉ
ၦဆံၫ့ဎံၪလဂၩ လၧဆၧဘၪထံၭ အခိၪဎွံၪအကျၩ ခိးဂဲးခိးဘၭ ဂဲၫထဲၩ့လၧအဂံၪ့နီၪလီၫႉ အဝ့ၫအဂံၪ့ဒီၪ့ဖိၪၥံၪလဖၪနီၪ လီၩ့ဎွါအဝ့ၫအခံၫ့နီၪ အဝ့ၫယီၩ ဆၧဘၪထံၭ အခိၪဎွံၪအကျၩ အစူၪဖၧၩ့နီၪ ဖီၪ့ထၬ ဖဲၫဆံၫ့ဎံၪဂီၩ့ ၥၭနၪ့ဆၧလၧခီၫ့နီၪလီၫႉ ၦၡၩၥိၪ့အဝ့ၫလၧ ဆၧဆၫဂံၪ့ လၩ့မၬယံၬ နံၫၥၫ့ဂီၩ့တၭ ၥံၪဖီၩ့ခွံၬဝ့ၫဒၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘၪထွ့ၫလၧ ၦဆံၫ့ဎံၪ Pierina Morosini အဂဲး ယရၩလၩ့န့အ့ၪဘၪနၥံၪနီၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧဆိၪဂ့ၩဆၧဘွၩလါဆံၭႉ