ၦဆံၫ့ဎံၪ ဂၠိၫ အိၫဂိၫဘံၫ (St. John Ogilvie)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪနၥံၪနီၪ မွဲဝ့ၫဒၪ ၦဆံၫ့ဎံၪ ဂၠိၫ အိၫဂိၫဘံၫ (St. John Ogilvie) အဂဲးအကၠီၩ့နီၪလီၫႉ ၦဆံၫ့ဎံၪ (ဂျွန် အိုဂိုဗီ) ယီၩ နဲၪဆၧဆူနဲၩ ဆၧဒီၩ့ဆၧထ့ၬအဂ့ၩ မွဲဝ့ၫဒၪ ၥၫ့ခၫလဂၩနီၪလီၫႉ ဆၧလမီၪ့ဎီၩ့ ထၨၪဎီၩ့ဘၪၥံၪအဂးႇ ၦအဘၪမၩနၧၩမၩစၪၥၭ လဖၪၥံၪအဂးႇ ၦအမၩၥၫထနါ ဆၧမၩဖိၪၥံၪအဂး အီၪပဒၩ့ထၬ မွဲဝ့ၫဒၪ ၦဆံၫ့ဎံၪလဂၩဆ့နီၪလီၫႉ
ၦဆံၫ့ဎံၪ (ဂျွန် အိုဂိုဗီ) ယီၩ မွဲဝ့ၫဒၪ (စကော့တလန်) ခးဖိၪလဂၩနီၪလီၫႉ ယၩနံၪ့ (၁၆-၁၇) ဖၧၩ့ အၪ့လဲၩထၪ့ခွံၬၥၭလၧ ဘၧၩ့ထံၫ ဆၧအီၪကီၪ့ဖိၪလဂၩဂီၩ့ ကဲၪထၪ့ထဲၩ့ ကၭၥလ့ၬ ဆၧဘိၪ့ဆၧဘၩဖိၪလဂၩ လကၭဒံၭဘၪ ကဲၪထၪ့ (Jesuit) ၥၫ့ခၫလဂၩဆ့နီၪလီၫႉ လၧအခံၫ့အနီၪအိၩ ဘၧၩ့ထံၫအခရၧၫ့ စဎွၩ (James) နီၪ စီၪလၩ့ထၬၥၭဘဲၫ ဆၧဘိၪ့ဆၧဘၩ ဎိၩဒိၪထုၬ ခိၪနါၥိၭဂီၩ့ ၦလၧအၪ့လဲၩထၪ့ အဆၧဘိၪ့ဆၧဘၩအ့ၬႇ အ့ၪလမွဲဘၪ အဝ့ၫၥံၪအဆၧဘိၪ့ဆၧဘၩဖိၪ ကၭၥလ့ၬဖိၪစွါဘဲၫ မၩနၧၩမၩစၪဝ့ၫ ကိၭအမံၩ့ဒ့ၭဂီၩ့ မၩၥံၫခွံၬဝ့ၫနီၪလီၫႉ လၧစဎွၩ (James) အထံၫခးဖၧၩ့ ၦဆံၫ့ဎံၪ (ဂျွန် အိုဂိုဗီ) လဂၩ မၩၥၫထနါအဆၧမၩဖၧၩ့ ဘၪထိးဖီၪ့ၥၭဂီၩ့ ဘၪထိးမၩနၧၩမၩစၪၥၭနီၪလီၫႉ အၪ့လဲၩထၪ့ခွံၬ အဆၧဘိၪ့ဆၧဘၩအဂး မၩနၧၩဆီၪ့ဝ့ၫ လန့လၧၩ့ဘၪကကၠၪ အခဲၫ့ထုၬနီၪ မၩၥံၫခွံၬဝ့ၫဒၪနီၪလီၫႉ
ၦဆံၫ့ဎံၪ (ဂျွန် အိုဂိုဗီ) ယီၩ ကဲၪဎြံၬဖိၪလဂၩအကၠီၩ့ ကဘၪထိးမၩၥံၫၥၭခၫ လီၩဝ့ၫဒၪနီၪ “မွဲဝ့ၫလၧ ယဆၧဆူနဲၩ ကၭၥလ့ၬ ဆၧဘိၪ့ဆၧဘၩအဂး အ့ၪမွဲယကဘၪ ဖ့ၪအ့ၪ ယဆၧၥၭမၧၫ့ ကယၩမွဲဂ့ၩ ယကဖ့ၪဆၧၫ့လၧ ဆၧၥုၪ့ဎွံၫၥၭထိၬ ဎိၩဒိၪဖၧၩ့နီၪလီၫႉ နၥံၪကၠူၭလၫ့ခွံၬ ယဆၧၥၭမၧၫ့ ဘိၩ့ယီၩ န့ယူၭနီၪလီၫႉ လါနၫ့ ယဆၧဆူနဲၩနီၪ နၥံၪကၠူၭလၫ့ခွံၬ န့ဝ့ၫဒၪ နးဆိၭအ့ၬအကၠီၩ့ အခဲၫ့ထုၬ လီၩထးထၬဝ့ၫဒၪ ဘဲၫယီၩၥိၭနီၪလီၫႉ ၦဆံၫ့ဎံၪ (ဂျွန် အိုဂိုဗီ) အဘိၪ့မုနံၩနီၪ မွဲဝ့ၫဒၪ လၩမၫၡါ (၁၀) နီၪလီၫႉ
အဝ့ၫယီၩ ကၭၥလ့ၬ ဆၧဘိၪ့ဆၧဘၩဖၧၩ့ အဆၧဆူနဲၩဎိၩဒိၪအကၠီၩ့ ထၨၪအဆၧၥၭမၧၫ့ၥၭၡီၩ့ထုၬကကၠၪ ဆၧၥုၪ့ဒုၩၥၭဒုၩဖၧၩ့ ထိးအၥၭႇ ထိးဖ့ၪဆၧၫ့လၩ့အဆၧၥၭမၧၫ့ မွဲဝ့ၫဒၪ ၥၫ့ခၫလဂၩနီၪလီၫႉ အနၫ့ဆါဒၪအဝ့ၫ ဆၧလမီၪ့ဎီၩ့ထၨၪဎီၩ့ဘၪႇ ဆၧမၩဆီၪ့မၩနီၩ့ႇ ဆၧမၩနၧၩမၩစၪလဖၪ ဘၪထိးဝ့ၫအကၠီၩ့ ဘဲၫၥိၭအနၫ့ဆါၥိၭ ၦလၧအဘၪဒၪဆၧၫ့ယၫ ဆၧကၪဆၧဂဲၩလဖၪ အၪ့က့ၩဘၩဆိၪဖၪလၧ အဝ့ၫဒၪအအီၪ န့ဝ့ၫဒၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩလါဆံၭႉ