ယ့ၫၡူၬအဆၧၥီၪ့လိၪဘၪဆဲၫ့ဆၧဘၪဆိၪဖၪ

ဆၧမၩအၥၭထီးအအီၪဘၩဆိၪဖၪဆၧ လၧအလးလစီၪ့နီၪ, ထီးအဂီၩ့နီၪအထံၩအဖျဲလဂၩစံၭအဝ့ၫ, ကဆါဧ့, ၥီၪ့လိၪပၧၩလၧပဘၩဆိၪဖၪဆၧအဂဲး ဘဲၫစယီဟၫ့ၥီၪ့လိၪအထံၩအဖျဲၥံၪအၥိၭနီၪဆ့ဆံၭ. အဝ့ၫဒၪစံၭအဝ့ၫၥံၪ, ထီးနၥံၪဘၩဆိၪဖၪဆၧတၭ, စံၭအီၪလၧမူၭခိၪပဖါဧ့, မွဲနမံၩ့အီၪဆံၫ့ဎံၪဒၪဝ့ၫဆံၭ. နဘၩ့နမုးနီၪ မွဲအထီၩ့ထဲၩ့ဒၪဝ့ၫဆံၭ.- မွဲနၥၭလၧၫ့ထၪ့ဎွ့ၩထၪ့ထဲၩ့ဒၪဝ့ၫ ထီးဂၪ့ခိၪချိၫ့ယီၩ ဘဲၫလၧမူၭခိၪအၥိၭနီၪဆံၭ. ဆၧအၪ့လၧလနံၩအဂးလနံၩအဂးနီၪ ဖ့ၪလၫ့လါပၧၩလနံၩဘၪလနံၩ, လနံၩဘၪလနံၩဆံၭ. ကွဲၪဖျါခွံၬပဆၧဒဲၩဘၭဆံၭ. အဂဲးဘဲၫယီၩ ပကွဲၪဖျါဆ့ကယဲၦလၧအဒ့ၪအမါအီၪ လၧပစူၪဖၧၩ့ကိၭဂၩဒ့ၭတၭ, ထီးဒုၭလ့ၩနုၬပၧၩ လၧဆၧကျဲၩ့ဖစီၩ့အဖၧၩ့နီၪလဂ့ၩ, [အ့ၪမွဲထုၭထၪ့ခွံၬလါပၧၩ လၧဆၧအၧၩ့ဆၧၥၫ့အဖၧၩ့နီၪဆံၭ.]

မွဲအစံၭအဝ့ၫၥံၪ, ၦလဂၩလၧနၥံၪအကျၩ အီၪလၧအထံၩအၥိၭတၭ, လၧဖိၭဖၫ့မုလ့ၩဝ့ၫလၧအအီၪတၭ, စံၭအဝ့ၫ,- တခွၫဧ့, ယန့ဘၪကိၪၥၧၫ့လီၪ့အလးအီၪဝ့ၫလီၫ. အဂဲးဘဲၫယီၩ ယထံၩယၥိၭလဂၩ လ့ၩဆၧနီၪ, ဂဲၫထီၩ့လၧယအီၪတၭ, ဆၧလၧယမိအီၪက့ၪ လၧအမ့ၬယၫနီၪအီၪနးမံၩ့အ့ၬ.- ၦအီၪလၧအဖၧၩ့ချဲၩ့ဆၧၫ့ဆၧတၭစံၭဝ့ၫ ထီးမၩထံၬထၬယၧၩလဂ့ၩ, တရၫ့ကၭဘံၭထၬယူၭအၥၭယူၭး ယဖိၪယလံၩအီၪယူၭလၧယၥိၭ လၧလးမံၫအဖၧၩ့ယူၭ, ယဂဲထုၪ့ဖ့ၪလၫ့နၧၩၥ့ၪအ့ၬ.- ယစံၭနၥံၪ, အဝ့ၫလဂၩမွဲလၧအထံၩအၥိၭအကၠီၩ့နီၪတၭ, လဂဲထုၪ့ဖ့ၪလၫ့ဘၪလါနၫ့တၭ, မွဲလၧအ အၪ့ကံၩ့ဝ့ၫဆီၪ့ဆီၪ့လ့ၬအကၠီၩ့နီၪ, မိဂဲထုၪ့ဖ့ၪလၫ့ဝ့ၫဒၪထီးအန့ဘၪဆၧအလးအီၪလဖၪလီၫ.-

ယစံၭနၥံၪဆ့,အၪ့ကံၩ့ဆံၭ,ဆၧမိဖ့ၪလၫ့နၥံၪလီၫ. အၪ့ဎၬဆၧဆံၭ,နၥံၪမိဒၪန့ဆၧလီၫ. ဒိၪထိၬဆၧဆံၭ, ဆၧမိဝဲထၪ့ န့ဝ့ၫလၧနၥံၪအဂးလီၫ.- အဂဲးဘဲၫယီၩကယဲၦလၧအအၪ့ကံၩ့ဆၧလဂၩလါလါနီၪ, န့ဘၪဝ့ၫလီၫ. ၦလၧအ ဒိၪထိၬဆၧနီၪ, ဆၧမိဝဲထၪ့န့လၧအဝ့ၫနီၪအဂးလီၫ.

လၧနၥံၪအကျၩဖါလဂၩ လၧအဖိၪအ့ၪအၪ့ကံၩ့အၪ့ကိၪတၭ, မိဖ့ၪလၫ့အဝ့ၫလၧလိးနီၪ, မွဲအအီၪလဂၩဂၩဆ့ဧၪ. အ့ၪအၪ့ကံၩ့အၪ့ယၪနးဘံၪ့တၭ, လၧယၪအလးနီၪ, မွဲအမိဖ့ၪလၫ့ဝ့ၫလၧဂူနးဘီၩ့ဆ့ဧၪ.- အ့ၪအၪ့ကံၩ့ဆၧဒံၪနးဖျိၪ့နီၪ, မွဲအမိဖ့ၪလၫ့ဝ့ၫလၧဆၧကဲၪ့မ့နးဘီၩ့ဆ့ဧၪ.-

မၩအၥၭဘဲၫနီၪတၭ,နၥံၪဝ့ၫဒၪမွဲၦအအၧၩ့လဖၪနီၪ, နၥံၪအ့ၪၥ့ၪယၫဖ့ၪလၫ့ နၥံၪအဖိၪအလံၩလၧဆၧအဂ့ၩတၭ, နၥံၪအဖါအီၪလၧမူၭခိၪနီၪ, မိဖ့ၪလၫ့ဝ့ၫလၧၦအၪ့ကံၩ့ဆၧ လၧအဝ့ၫနီၪလဖၪ လၧၥၭမုဆံၫ့ဎံၪနီၪအၪနဲၪ့အနီၪဒံၭလီၫ.