ထီးဒၪယလ့ၩဆၧအလးနီၪနၥံၪလ့ၩထီၩ့ၥ့ၪအ့ၬ.

မၩအၥၭဘဲၫနီၪတၭႇ ယ့ၫၡုၬစံၭဒီၭအဝ့ၫၥံၪႇ ယလ့ၩဆၧတၭႇ နၥံၪမိအၪ့ဎၬယၧၩနီၪႇ နၥံၪမိၥံၫလၧ နၥံၪအဆၧဒဲၩဘၭအဖၧၩ့တၭႇ ထီးဒၪယလ့ၩဆၧအလးနီၪႇ နၥံၪလ့ၩထီၩ့နၥံၪဝ့ၫၥ့ၪအ့ၬ.-

မၩအၥၭဘဲၫနီၪတၭႇ ၦယုဒၫဖိၪလဖၪစံၭဝ့ၫဒၪႇ အဝ့ၫနီၪစံၭဝ့ၫႇ ထီးဒၪယလ့ၩဆၧအလးနီၪႇ နၥံၪလ့ၩထီၩ့ၥ့ၪအ့ၬႇ တၭမွဲအမိမၩၥံၫလၩ့ဒၪအၥၭဆ့ဧၪ. အဝ့ၫဒၪစံၭအဝ့ၫၥံၪႇ နၥံၪဝ့ၫယီၩႇ နၥံၪဘၪဆဲၫ့လၧလၬလခီၫတၭႇ ယဝ့ၫဒၪယီၩႇ ယဘၪဆဲၫ့လၧထၭလခီၫး နၥံၪဝ့ၫယီၩနၥံၪဘၪဆဲၫ့လၧဂၪ့ခိၪတၭႇ ယဝ့ၫဒၪယီၩႇ ယဘၪဆဲၩ့လၧဂၪ့ခိၪအ့ၬ.

မၩအၥၭဘဲၫနီၪတၭႇ ယစံၭလၧနၥံၪမိၥံၫ လၧနၥံၪအဆၧဒဲၩဘၭအဖၧၩ့လီၫ. အဂဲးဘဲၫယီၩ ယမွဲၦလဂၩနီၪႇ နၥံၪအ့ၪလနဲၩဘၪတၭႇ နၥံၪမိၥံၫလၧနၥံၪအဆၧဒဲၩဘၭအဖၧၩ့လီၫ.

မၩအၥၭဘဲၫနီၪတၭႇ အဝ့ၫၥံၪစံၭအဝ့ၫႇ နဝ့ၫဒၪယီၩနမွဲပလၫလဂၩလဲၪ. ယ့ၫၡုၬစံၭအဝ့ၫၥံၪႇ ယဝ့ၫဒၪယီၩ ယမွဲဘဲၫယလီၩဘၪနၥံၪ လၧအၥၫ့အၥိၭနီၪလီၫ.- ယဝ့ၫဒၪယီၩ ယချဲၩ့ဆၧႇ ဒဲစ့ၩရၫ့ဆၧ လၧနၥံၪအဂဲးအကၠီၪ့အလးအီၪအၪမၬႇ လါနၫ့ဘိၩး ၦလၧအအၪ့မၧၫ့လၩ့န့ယၧၩလဂၩနီၪႇ မွဲၦအတီၩအလီၩ့တၭႇ ဆၧလၧယနါဂၧၫ့လၧအဝ့ၫနီၪႇ ယလီၩဘၪၦဂၪ့ခိၪဖိၪၥံၪလီၫ. အဝ့ၫဒၪစံၭဆၧလၧဖါအဂဲးနီၪ အဝ့ၫၥံၪၥ့ၪယၫဝ့ၫအ့ၬ.-

မၩအၥၭဘဲၫနီၪတၭႇ ယ့ၫၡုၬစံၭအဝ့ၫၥံၪႇ ထီးနၥံၪအ့ၪဘီၩ့ထၪ့ၦၡၩအဖိၪခွၫတၭႇ ယမွဲပလၫလဂၩလဲၪနီၪႇ နၥံၪမိၥ့ၪယၫတၭႇ ယမၩဘၪဆၧလၧ ယနၫ့ဆါဒၪယဝ့ၫနးမံၩ့အ့ၬ. ဘဲၫယဖါၥီၪ့ထဲၩ့ၥၫ့ထဲၩ့ယၧၩအၥိၭနီၪႇ  ယလီၩဘၪဆၧယီၩလဖၪလီၫ.- ၦလၧအအၪ့မၧၫ့လၩ့ယၧၩလဂၩနီၪႇ အီၪလၧယၥိၭလီၫ. ဘဲၫယမိအီၪလဂၩဎးအၥိၭ ဖါနီၪစဲၪ့ဒၪယၧၩအ့ၬ. အဂဲးဘဲၫယီၩ ဆၧလၧအဘၪအဝ့ၫအၥၭလဖၪနီၪႇ ယမၩယဝ့ၫထံၪဎးလီၫ.

အဝ့ၫဒၪချဲၩ့ဆၧလဖၪနီၪအဘိၩ့ဘၭတၭ, ၦနဲၩထဲၩ့ ဝ့ၫအၪဂၩလီၫ.