ၦကဲၪဒိၪလဂၩအဂဲး

ထီးအစဲၪ့ထၪ့လ့ၩဝ့ၫလၧဖၧၩ့ၥၭအဘိၩ့ဘၭနီၪ, ၦလဂၩဂဲၫစဲၪ့တလဲး လၧအအီၪတၭ, ထွံၩလၩ့အခၪ့ အၪ့စၪ့ဝ့ၫ,ဆရၫလၧအဂ့ၩလဂၩဧ့, ဘဲၫၥိၭယမိန့ဘၪ ဆၧမၧၫ့အဆိၩအကၠၪနီၪ, မွဲယမိဘၪမၩဆၧနီၪလမံၩ့ လဲၪ.- ယ့ၫၡုၬစံၭဝ့ၫ, မွဲဘၪနီၫနကိၭယၧၩ လၧၦအဂ့ၩလဲၪ,အ့ၪလမွဲဘၪယွၩလဂၩနီၪ, ၦအဂ့ၩအီၪနးဂၩအ့ၬ.- ဆၧမၪလူၬလဖၪနီၪနၥ့ၪယၫယူၭ. ထီးအဲၪ ဘိၩ့ မၫ အဲၪ ဘိၩ့ ဝၩ လ ဂ့ၩ, ထီး မၩ ၥံၫ ၦ ၡၩ လ ဂ့ၩ. ထီး အၪ့ ဂူၫ ဆၧ လ ဂ့ၩ, ထီး ထိး န ၥၭ လၧ ဆၧ ဘျံၭ ဆၧ ဘျၪ လ ဂ့ၩ, ထီး အၪ့ လီၫ အၪ့ ဂူၫ ဂၩ အ ဆၧ လ ဂ့ၩ, ယူၭ ယၪ့ န မိ န ဖါ ဆံၭ.

အဝ့ၫလဂၩချဲၩ့ဆၧၫ့ဆၧတၭ, စံၭဝ့ၫဒၪ,ဆရၫဧ့, ဆၧနီၪလဖၪထီးအလူၬလၧယဖိၪၥၪလံၩလံၩနီၪ, ယထီး န့ယူၭယဝ့ၫယူၭ.- ယ့ၫၡုၬယိအဝ့ၫနီၪအဲၪဝ့ၫတၭ, စံၭဝ့ၫဒၪ,နန့ဘၪဆၧအလးနီၪ, အီၪဒံၭလမံၩ့ဒံၭ,ထီး ဒၪနဆၧအီၪလဖၪနီၪ, လ့ၩအၪ့ဆၫလၩ့ခွံၬတၭ, ဖ့ၪလၫ့ ၦၡၪ့ဖိၪယၬဖိၪဆံၭ. နမိအီၪဘၪလၧနစူၪလးနခၪ့ ခိၪလၧမူၭခိၪအဖၧၩ့လီၫ. မၩန့နထုၪ့စူၪယၫတၭ, ဂဲၫဖိၬယခဲၫ့ဆံၭ.- အမ့ၬလၩ့ၡါလၧဆၧချဲၩ့လထံၪနီၪ အကၠီၩ့တၭ, အၥုၪ့အုၭအၥၭအုၭ, ထဲၩ့ထဲၩ့ဝ့ၫလီၫ. အဂဲးဘဲၫယီၩ အစူၪလးအခၪ့ခိၪ အီၪဝ့ၫအၪမၬလီၫ.

ယ့ၫၡုၬယိဝၬဝၬဆၧနီၪ, စံၭအထံၩအဖျဲၥံၪ, ၦၥထံၫလဖၪနီၪ, လ့ၩနုၬဝ့ၫလၧယွၩအဘၩ့အမုး အဖၧၩ့ကၪ မၬလီၫ.- အထံၩအဖျဲၥံၪမၩအၥၭ ထီၫမံၫထီၫမၪလၧ ဆၧချဲၩ့လထံၪနီၪ အကၠီၩ့လီၫ. ယ့ၫၡုၬချဲၩ့ဆၧၫ့ဒီၭ ဆၧတၭ,စံၭအဝ့ၫၥံၪ, ဖိၪၥံၪလံၩၥံၪဧ့, ၦလၧအဒိၭနဲၩ့ အၥၭလၧအစူၪလးအခၪ့ခိၪအဖၧၩ့လဖၪနီၪ, လ့ၩ နုၬဝ့ၫလၧယွၩအဘၩ့အမုးအဖၧၩ့ ကၪမၬကလဲၪ.- ကလအူၭနုၬဖျီၫ့ထၭမ့ခဲၫ့နီၪ, ယီၫနဲၪ့ဒံၭၦၥထံၫလဂၩ လ့ၩနုၬဝ့ၫလၧယွၩအဘၩ့မုးအဖၧၩ့ဒံၭလီၫ.-

အဝ့ၫ ၥံၪထီၫမံၫထီၫမၪဒိၪဒိၪလ့ၬနီၪ, စံၭလိၬအၥၭအ့ၪမွဲဘဲၫနီၪတၭ,မွဲပလၫထီၩ့လၧ ဆၧထိးထဲၩ့တၩ့ထဲၩ့ဝ့ၫနီၪ, မိၥ့ၪနးဂၩလဲၪ.- ယ့ၫၡုၬယိအဝ့ၫၥံၪထံၫထံၫဆၭဆၭတၭ,စံၭဝ့ၫဒၪ, အယီၩၦၡၩမၩၥ့ၪအ့ၬ. အ့ၪမွဲယွၩမၩ ၥ့ၪ,အဂဲးဘဲၫယီၩ ယွၩနီၪၥ့ၪဆၧထီးအလူၬလီၫ.