ၥိၪလၩ့မါ

ၦအၪ့ကံၩ့အခီၫ့, ဒဲၦဆၧဒဲၩဘၭဖိၪထီးအလူၬနီၪ, ဘဲၫၥိၭအမိနါဂၧၫ့ဘၪဆၧတၭ, ၥုၭဘူၭအၥၭလၧအအီၪလီၫ.- ၦဖၫရစံၫ, ဒဲၦကွ့ၭလံၬၥံၪၥူၭဝံၥူၭလၩဆၧတၭ, စံၭဝ့ၫ ၦလဂၩယီၩထိးဆၧၫ့ၦဆၧဒဲၩဘၭဖိၪ, ဒဲ အၪ့ဎုၬဆၧလၧအဝ့ၫၥံၪအၥိၭလီၫ.

အဝ့ၫဒၪချဲၩ့ဒီၩ့လၩ့ဆၧလမံၩ့ယီၩ, စံၭဝ့ၫ, ၦလၧနၥံၪအကျၩလၧအအီၪလၧအၥိၪလယၩနီၪ အ့ၪလၩ့မါလဒုၩတၭ, လအီၪက့ၪလၩ့ထးဘၪဝ့ၫ ခွံၫဆံၫခွံၫဒုၩ လၧမံၩ့လၬကျၩတၭ, လလ့ၩအၪ့ဎၬဘၪလၧအလၩ့မါ လဒုၩထီးအဒၪန့ထဲၩ့ဝ့ၫနီၪ, မွဲပလၫလဂၩလဲၪ.- အ့ၪဒၪန့ထဲၩ့ဝ့ၫနီၪ, အၥုၪ့ထိၬအၥၭထိၬတၭ, အီၪက့ၪထၪ့ ဝ့ၫလၧအခိၬထံၭခိၪ,- ဂဲၫထဲၩ့ဝ့ၫထီၩ့လၧအဂံၪ့နီၪ, ကိၭကီၪ့အထံၩအၥိၭ, ဒဲၦအီၪလၧအနဲၩ့ထံၭလဖၪတၭ, လီၩဘၪအဝ့ၫၥံၪ, စံၭဝ့ၫ, ၥၭထိၬဎုၬလၧယၥိၭဘီၪ. အဂဲးဘဲၫယီၩ ယၥိၪလၧအလၩ့မါလဒုၩနီၪ, ယဒၪန့ထဲၩ့ယူၭအဝ့ၫယူၭ.- ယလီၩဘၪနၥံၪဘဲၫနီၪအၥိၭ, ၦဆၧဒဲၩဘၭဖိၪလဂၩ လၧအနီၫ့ယါလၩ့ထဲၩ့ အၥၭနီၪ,ၦမူၭခိၪဖိၪၥၭထိၬ လၧအကၠီၩ့အၪနဲၪ့ဒံၭလၧ ၦအတီၩခွံၫဆံၫခွံၫဂၩ လၧအနီၫ့ယါလၩ့ထဲၩ့အၥၭ အလးလအီၪဘၪလဖၪအကၠီၩ့ဒံၭလီၫ.

ၦမုၪလဂၩအီၪလၧစ့ၩဆံၫဘံၪ့တၭ, အ့ၪလၩ့မါခွံၬ နးဘံၪ့နီၪ, လစီၩ့ထၪ့ဘၪမ့ၪဒိၩ့တၭ, လဝ့ၬဘၪဝ့ၫလၧ အဂံၪ့ထၧၫ့ဖျိၪ့ယၫ, ဒဲအၪ့ဎၬလၩ့ထံးလၩ့ဆ့ၭ ထီးအဒၪန့ထဲၩ့ဝ့ၫနီၪ,မွဲၦလၫလဂၩလဲၪ.- ထီးအဒၪန့ထဲၩ့ဝ့ၫ နီၪကိၭကီၪ့အထံၩအၥိၭ, ဒဲၦအီၪလၧအနဲၩ့ထံၭလဖၪတၭစံၭဝ့ၫ, ၥၭထိၬဎုၬလၧယၥိၭဘီၪ. အဂဲးဘဲၫယီၩ ယစ့ၩလၧအလၩ့မါလဘံၪ့နီၪ, ယဒၪန့ထဲၩ့ယူၭ.- ဘဲၫနီၪအၥိၭယစံၭနၥံၪ, ၦဆၧဒဲၩဘၭဖိၪလဂၩ လၧအနီၫ့ ယါလၩ့ထဲၩ့အၥၭအကၠီၩ့နီၪ, ဆၧၥၭထိၬအီၪထၪ့ဝ့ၫ လၧယွၩအၥီၫ့လဖၪအမ့ၬယၫလီၫ.