ပိၫ့ဂိၫ

ထၧၫ့ဖုဝဲထံၩၥိၭထီးအလူၬၥံၪဧႉ ႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩလၩ့ဖၧၩ့ မုက နံၩယီၩ ယအဲၪ ဒိၭ ရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ဆၧဆူနဲၩအီၪလၧကဆါယွၩအဖၫ့ခိၪအကၠီၩ့ ၥုၪ့ ဒူၩၥၭဒူၩ အီၪထၪ့ထဲၩ့ ပိၫ့ဂိၫ အဂဲးအကၠီၩ့နီၪလီၫႉ ပိၫ့ဂိၫနီၪ အီၪလၧ  ခးဖံလံပံၩ(စ်) မုခံၫ့အလးဖၧၩ့ နီၪလီၫႉ ပိၫ့ဂိၫအီၪ ဝံးအလး ဝံးဒီၪ့ဖိၪၥံၪနီၪ ဆၧဎူၫဆၧဎၩ့ လအီၪဘၪဂီၩ့ ဆၧတုၩ့ထၪ့တုၩ့လၩ့ ကဲၪ ထၪ့ဝ့ၫဒၪနီၪလီၫႉ အခံၫ့အနီအိၩ ပိၫ့ဂိၫနီၪ မၩဆၧဖံၭဆၧမၩ လၧ ရ့ၫဒံၫယိၫ ဘရံၭတၩအ့ၩၡၩ လၫ့ခွ့ၩ လူ ဆၧမၩလးဖၧၩ့ (အင်ဂျင်နီယာ) ဖိၪလဂၩနီၪလီၫႉ

          အခံၫ့အနီအိၩ ဆၧအီၪကီၪ့ဂဲး ဆၧဒုၭဆၧခၭဆၧကဲၪထၪ့တၭ ၦအဖီၪ့စူၪဝဲၩလဖၪၥံၪနီၪ ဂဲၫနူၬ လၩ့လၧ ဆၧၥၭ ထိၬ အပရၧၫ့ လၫ့ခွ့ၩလူ ဆၧရၩလၩ့လးဖၧၩ့ဂီၩ့ ဂဲၫခၭၥံၫ လၫ့ခွ့ၩလူၦမၩဆၧဖိၪၥံၪနီၪ လီၫႉ အခံၫ့အနီ ၦအရၩလၩ့ ဆၧၥၭထိၬအပရၧၫ့ အဆၧရၩလၩ့ လၫ့ခွ့ၩလူ ၦမၩဆၧဖိၪလနၩ့ အၥၭ ဘၪၥံၫခွံၬဝ့ၫဒၪနီၪလီၫႉ လၫ့ခွ့ၩ လူဆၧမၩလး ဖၧၩ့ ၦၡၩၥံၪ အၥၭ ဘၪၥံၫနီၪ ပိၫ့ဂိၫလဂၩဒၪ ဘၪဝ့ၫလၧ အမ့ၬၥၪဖၧၩ့တၭ အ့ၪလခဲၫ့နး ဘျၩ့ ၦအဖီၪ့စူၪဝဲၩၥံၪ ဂဲၫထဲၩ့ စွါ ဘဲၫ အဝ့ၫနးဆ့ အၥၭ က ဘၪၥံၫ နၧၩ့ဝ့ၫဒၪအကၠီၩ့နီၪၥ့ၪယၫဝ့ၫတၭ ယိထဲၩ့အဖိၪအမၪၥံၪ အမ့ၬဂီၩ့ စဲၪ့ထၪ့ခွံၬ ထဲၩ့လၧ ဆၧမၩလးဖၧၩ့ နီၪလီၫႉ

          ပိၫ့ဂိၫယီၩစဲၪ့ထၪ့လၧ အဆၧမၩလးဖၧၩ့ဂီၩ့ အစဲၬလဲၪ့ယဲးခၪ့ အီၪဝ့ၫဒၪ ကခိၪတၭ ကအၪ့က အီၩအဂး လီၩ့ဎွါထီးလၧ အစဲၬလဲၪ့ယဲးခၪ့ ယီၩနီၪလီၫႉ ၦအဖီၪ့စူၪဝဲၩၥံၪခၭၥံၫၦၡၩနီၪ လၧဖၧၩ့ၥၭဖၫ့ခိၪ အီၪဝ့ၫဒၪၡၩအကၠီၩ့ ပိၫ့ဂိၫရွံထၪ့ မၩဆၧမၩလၧ ဖၧၩ့ၥၭဖၫ့ခိၪ ဘဲၫယီၩၥိၭနီၪလီၫႉ

          ၦအဘၪမၩထိးၥံၫအၥၭ ပိၫ့ဂိၫအလိၬၥၭလဖၪအဂဲး ပိၫ့ဂိၫအၪ့ဎၬထၪ့ထဲၩ့နီၪလီၫႉ လၫ့ခွ့ၩလူ ဆၧမၩလးဖၧၩ့ ၦအဘၪမၩထိးၥံၫအၥၭ ၦမၩဆၧဖိၪၥံၪနီၪ မွဲဝ့ၫဒၪ ၦအရၩလၩ့ ကဆါဎြံၬ အဆၧၥၭ ထိၬ အပရၧၫ့နီၪလီၫႉ ကဆါဎြံၬ ဘၪထိးဖီၪ့အၥၭအခံၫ့ အထံၩအဖျဲၥံၪစဲၪ့ဒၪခွံၬအဝ့ၫအဂဲး အၪ့ဎၬ ထၪ့ထဲၩ့ဝ့ၫဂီၩ့ ဆၧၥ့ၪယၫနၪၥ့ၪန့ထၪ့ထဲၩ့ ဝ့ၫဒၪ နီၪလီၫႉ ပိၫ့ဂိၫ ထဲၩ့ထဲၩ့လၧ လၫ့ခွ့ၩလူ ဆၧရၩလၩ့ လးဖၧၩ့နီၪလီၫႉ အၥၭကဘၪၥံၫလၧ ကဆါဎြံၬအဂးနီၪ အဲၪဒိၭဝ့ၫ နဲၪ့န့ ထဲၩ့အၥၭကဘၪ ၥံၫလၧ ဖၧၩ့ၥၭ ဖၫ့ခိၪနီၪလီၫႉ မွဲဆၧနီ ထဲၩ့ထဲၩ့လၧ အဆၧမၩအလံၩလးဖၧၩ့ ဘဲၫယီၩၥိၭနီၪလီၫႉ

          ပိၫ့ဂိၫလဂၩ လ့ၩထဲၩ့လၧ အဆၧမၩအလံၩလးဖၧၩ့ဂီၩ့ လၧဆၧၥုၪ့ခိၥၭဂီၩဖၧၩ့ အၪ့ကံၩ့ ဘၩဆိၪဖၪ ဆၧနီၪလီၫႉ ပိၫ့ဂိၫဂဲၫထဲၩ့လၧ အဆၧမၩလးမုနံၩမုၥၫ့ လယံၬလမီး ဘၪအခံၫ့ ၦအဖီၪ့ စူၪဝဲၩလဂၩ ဂဲၫထဲၩ့ လဘျၩ့ဒီၭဂီၩ့ ဂဲၫနူၬ လၩ့ ခၭဆၧလၧ အကျီၩ့ဒီၭနီၪလီၫႉ ၦမၩဆၧဖိၪၥံၪလဖၪနီၪ လၧ ဆၧၥၭမဲၪၥၭဖျဲၩ့ဖၧၩ့ လီၩ့အီၪဂူၪအီၪ ဘံၪ့အၥၭလါနၫ့ ပိၫ့ဂိၫလဂၩ လ့ၩလၧ ဆၧရၩလၩ့လးဖၧၩ့ဂီၩ့ လ့ၩရၩလၩ့ ဆၧရၩလၩ့နီၪလီၫႉ ဆၧရၩလၩ့အခံၫ့ အ့ၪ ဘၪထိးခၭၥံၪအၥၭစွါ ဘဲၫ အဝ့ၫလၥၭမဲၪ ဘၪ အကၠီၩ့ အီၪဂူၪအီၪ ဘံၪ့အၥၭမၬ အဆၧၥၭမၧၫ့ကန့နီၪ လအဲၪဒိၭ ဘၪဝ့ၫအကၠီၩ့ ႇ ရၩလၩ့ ဆၧရၩလၩ့ အခံၫ့ အ့ၪဆၧခၭၥံၫလါနၫ့ အဝ့ၫ ဆၧမံၫ့ၥုၪ့မံၫ့ၥၭအီၪအကၠီၩ့ လီၩ့ဖျီၪထၪ့ထဲၩ့ဝ့ၫဒၪနီၪလီၫႉ ၦအဖီၪ့ စူၪဝဲၩနီၪ က ဘျၩ့ယီၩဂဲၫခၭဆၧလါနၫ့ ၦၡၩအၥံၫ လအီၪ ဘၪနးဂၩနီၪလီၫႉ ပိၫ့ဂိၫ လဂၩ အၥုၪ့ဒူၩၥၭ ဒူၩအီၪထၪ့ ဝ့ၫဒၪနီၪ မွဲဝ့ၫ လၧဆၧၥၭမဲၪၥၭဖျဲၩ့ဖၧၩ့ ဆၧအၪ့ကံၩ့ ဘၩဆိၪဖၪအကၠီၩ့ အဂဲးအ ဘၭန့ထၪ့ ဝ့ၫဒၪ ဘဲၫယီၩၥိၭနီၪလီၫႉ