အ့ၫဒဘလျူၫ တိၫဇၫ

ထၧၫ့ဖုဝဲထံၩၥိၭထီးအလူၬၥံၪဧႉ ႇ မံၩ့ဎိၩၥၪဖျီၪမုၪခွၫလၧအအီၪအနိၫ့ အဆၧရၩလၩ့ဖၧၩ့ မုက နံၩယီၩ ယအဲၪ ဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ဘၪထွ့ၪလၧလံၬဆံၫ့ဎံၪအဂဲး ၦအကွ့ၭလံၬဖၧၩ့ အမံၩ့ဎိၩမွဲဝ့ၫ အ့ၫဒဘလျူၫ တိၫဇၫ အဂဲးနီၪလီၫႉ အ့ၫဒဘလျူၫတိၫဇၫယီၩ အၥၭအီၪဝ့ၫ (၁၇)  နံၪ့မၬ အဆၧဆူနဲၩနီၪ အၪ့လဲၩ့ထၪ့ထဲၩ့ဝ့ၫလၧ ကဆါဎြံၬအီၪနီၪလီၫႉ အီၪက့ၪထၬအဆၧဆူနဲၩလၧ ကဆါဎြံၬအီၪဂီၩ့ လယံၬလမီးဘၪ မၩဆံၫ့ဖျ့ၫအ့ၪအဖါဖါအဂံၪ့ တၭ ဒၪန့ လံၬဆံၫ့ဎံၪနီၪလီၫႉ အနီၪမၬ စၭထၪ့ဖီလံၬဆံၫ့ဎံၪ နီၪလီၫႉ

          အ့ၫဒဘလျူၫတိၫဇၫ အမံၩ့အလၧၫ့အဎွ့ၩနီၪ မွဲဝ့ၫ အ့ၫဒ့ၫဝံၫလဆ့ၫတိၫဇၫနီၪလီၫႉ အ့ၫဒဘ လျူၫတိၫဇၫ ယီၩ ဘၪထွ့ၪလၧလံၬဆံၫ့ဎံၪအဂဲး ၦအကွ့ၭလံၬဖၧၩ့ အမံၩ့ဎိၩဝ့ၫဒၪလါနၫ့ မွဲလ့ၩထၪ့ ဆၧမၩလိၪလၧ လံၬဆံၫ့ဎံၪ ဘျၪ့ ကိၪ့ဒိၪလးဖၧၩ့မွဲအ့ၬႉ ခၪ့ဖျီၪလၧ ဒၪန့အဖါဖါအလံၬဆံၫ့ဎံၪအိၩ ဖီဒၪအဝ့ၫႇ အၪ့ဎၬဆီၫ့မီၪ့ထၪ့ဝ့ၫဒၪယိၬယိၬဂီၩ့ ကွ့ၭထုၬဖျီၪထၪ့ထဲၩ့ဝ့ၫဒၪအကၠီၩ့ ဘၪထွ့ၪလံၬဆံၫ့ဎံၪ အဂဲး အဝ့ၫအဆၧကွ့ၭလံၬလဖၪၥံၪနီၪ အမံၩ့ဎိၩဝ့ၫဒၪလၧ ထီကထီအဖၧၩ့နီၪလီၫႉ တိၫဇၫကွ့ၭထၬ လံၬလဲလဖၪနီၪ နဖီဘဲၫယီၩ နနၪၥ့ၪဘဲၫယီၩမွဲအ့ၬ ႉ ပဘၪအၪ့ဎၬယိၬယိၬ မၬပနၪၥ့ၪဝ့ၫဒၪဂီၩ့ ႇ ပၥ့ၪ ယၫနၪၥ့ၪ အၪထၪ့ကဆါယွၩနီၪလီၫႉ

          အ့ၫဒဘလျူၫတိၫဇၫအဂဲး ဆၧအလၩ့ဆၫ့အီၪဝ့ၫဒၪနီၪမွဲဝ့ၫ တိၫဇၫအၪ့ဎၬဆီၫ့မီၪ့ထၪ့ ယွၩအဂဲးယိၬယိၬဂီၩ့ ကွ့ၭထုၬဖျီၪထၪ့ထဲၩ့ အလံၬစီၩ့ဂီၩ့ကကၠၪ အဝ့ၫအလံၬစီၩ့နီၪ ၦၡၩၥံၪဖီဘၪစွါ ဘဲၫ  လံၬဆံၫ့ဎံၪဖၧၩ့ ဆၧချဲၩ့လဖၪၥံၪ နီၪ ၦၡၩၥံၪ အဆၧၥ့ၪယၫနၪၥ့ၪ န့အၪထၪ့ဝ့ၫဒၪနီၪလီၫႉ ဘၪထွ့ၪလၧတိၫဇၫအဂဲး ၦၡၩလဂၩ အဆၧလီၩ ဖျီၪထၪ့ အီၪဝ့ၫ ၦၡၩဘဲၫတိၫဇၫယီၩၥိၭ လအီၪလၧၩ့ ဘၪအဂး ဆၧအၪ့ယိၪခဲၫ့ကံၭအီၪဝ့ၫဒၪ အကၠီၩ့ ႇ ဘၪမနီၪလဲၪစွါဘဲၫ အဝ့ၫအဆၧၥ့ၪယၫနၪၥ့ၪနီၪ မွဲအီၪဂဲၫလၧ ဘျၪ့ကိၪ့ဒိၪ ဆၧမၩလိၪလးဖၧၩ့ လမွဲဘၪဂီၩ့ အီၪဂဲၫလၧၥၭမုဆံၫ့ဎံၪအီၪ အကၠီၩ့နီၪလီၫႉ အ့ၫဒဘလျူၫတိၫဇၫ ကွ့ၭထုၬဖျီၪထၪ့ထၬအလံၬစီၩ့ဖၧၩ့ အီၪဝ့ၫဘဲၫယီၩၥိၭနီၪလီၫႉ “ယွၩနီၪထုၬ ဖျီၪထၪ့လၩ့ အၥၭလၧ ဖိၪၥၪဆံၭဖိၪၥံၪအီၪအကၠီၩ့ ႇ ၦအစီၪလၩ့အၥၭလၧ ဆၧၥ့ၪယၫနၪၥ့ၪ အီၪ ႇ ဆၧအၪ့ဎၬ ထိၪတွၭ အီၪၦၡၩ လဖၪ လဒၪဘၪအဝ့ၫအဂး အီၪၥူၪၥၭ”အကၠီၩ့ နီၪလီၫႉ ပကဘၪဒိၭနဲၩ့ပၥၭလၧ ကဆါယွၩအီၪနီၪ လၧဆၧ တီၩဆၧ လီၩ့ဖၧၩ့ နီၪလီၫႉ အ့ၪပအီၪက့ၪထး ထၬ ပအလိၪန့စွါဘဲၫ ဆၧလဖၪၥံၪနီၪ ပကဒၪလၧ ဆၧအဂ့ၩနီၪလီၫႉ တိၫဇၫ အဆၧ ၥ့ၪယၫနၪၥ့ၪလ ဖၪနီၪ မီၫ့ဎီၩ့လၧၦဂူၫဂၩၥံၪအ့ၬဂီၩ့ ဂ့ၩနဲၩန့ဂၪ့ခိၪဖၧၩ့ အဆၧၥ့ၪယၫနၪၥ့ၪၥံၪဂီၩ့ နးၥၭ အဂး ဆၧအတီၩ အလီၩ့ဒၪဝ့ၫ ႇ လီၩ့ဎွါယွၩ အဆၧမံၫ့ၥုၪ့မံၫ့ၥၭနဲၪန့ ၦၡၩၥံၪ အဆၧမံၫ့ၥုၪ့မံၫ့ၥၭ ကအီၪအဂးအကၠီၩ့ ႇ အီၪဘူၭထံၭလၧယွၩကိၭအဆၧၫ့ကိၭအထီဒ့ၭအကၠီၩ့ ႇ ဘဲၫအဆၧၥ့ၪယၫနၪၥ့ၪအီၪၥိၭ အီၪၥၭမၧၫ့ဝ့ၫဒၪ နီၪလီၫႉ

          တိၫဇၫအလံၬစီၩ့လဖၪၥံၪနီၪ လၧအဝ့ၫအဆၧရၩလၩ့ဖၧၩ့မွဲဝ့ၫဒၪနီၪလီၫႉ ၦလၧဒီၪနါဘၪ အဝ့ၫအဆၧရၩလၩ့ ႇ ဖီဘၪအဝ့ၫအလံၬစီၩ့လဖၪနီၪ အီၪဘူၭထၪ့န့ဝ့ၫဒၪလၧ ယွၩနီၪလီၫႉ မွဲဆၧနီ တိၫဇၫယီၩ မွဲဝ့ၫ လံၬစီၩ့အဆၧကွ့ၭဖၧၩ့ ၦအမံၩ့ဎိၩမွဲဝ့ၫႇ ဟီၩတရၩဖၧၩ့ ၦအမံၩ့ဎိၩမွဲဝ့ၫဒၪအကၠီၩ့ ယရၩလၩ့ဖ့ၪၥ့ၪယၫအ့ၪဘၪနၥံၪ အ့ၫဒဘလျူၫတိၫဇၫ အဂဲး ဘဲၫယီၩၥိၭနီၪလီၫႉ