လု(ဎဒ) ကဆါမုၪနးမၫရံၫ အဘိၪ့မုနံၩ

ကနံၩယီၩ ဆၧအီၪကီၪ့ မၩလၩမၩဖၩ့ လု(ဒ)   ကဆါမုၪနးမၫရံၫအဘိၪ့မုနံၩလီၫႉ လၧ ၁၈၅၈နံၪ့အထးဖၧၩ့နီၪ  ကဆါမုၪနးမၫရံၫဒုၭနဲၪဖျီၪ့ထၪ့ၥၭ ၁၈ ဘျၩ့ႇ လၧၦမုၪနၩဖိၪလဂၩ အၥၭအီၪ ၁၄နံၪ့ႇ အမံၩ့  (ဘဲနၫဒဲၭ ဆူၫဘံၫဝူၫ) လၧ လု(ဒ) ႇ ခးပၠ့ၫၥ့ၭဖၧၩ့နီၪလီၫႉ

ဆၧဒုၭနဲၪဖျီၪၥၭ အခၪ့ထံၭလကၠၪ လၧလၩဖ့ၪဘြူအ့ၫရံၫ ၁၁ ၥၫ့ႇ ၁၈၅၈နံၪ့ႇ လ့ၩဘိၭၥံၫ့မု လၧအဖုမုၪ တွၩနဲၬ ဒဲအၥိၭ ယၩ့အၫဘၫဒံၫႇ လ့ၩထီၩ့လၧ မၫဆၫဘံၫယဲ လိးအိၩအနဲၩ့ထံၭနီၪ ဘၪခၪ့ထ့ၭထံၫကၠီၫ့အဂးႇ ကွံၪလၩ့အခၪ့ဖံၭ ဒဲအခၪ့ဖျၪ့တၭႇ နါဂၧၫ့ဘၪလံၩဂဲၫအလူၥီၪ့လါနၫ့ ၥံၫ့ထံၭႇၥံၫ့လၫလဖၪဂဲၩ့အ့ၬႉ အဝ့ၫယိစိၩလၧ လိးအိၩဖၧၩ့ကကၠၪ ဒၪဘၪၦမုၪလဂၩ ၥိၪကီၩ့ထၬ ဆၧကိၪဆၧၥိၭအဘွၩႇ ခၧၩ့ယးအလၫႇ လၧအခၪ့ယၫခိၭနံၫခီၫအဖၫ့ခိၪနီၪ ဖီၪဆၧဆူၪအဘၩ့အီၪနံၫဖိၪႇ အဖဲၫဆံၫ့ဎံၪအဘွၩႇ အဖျံၩနီၪအဘၩ့လီၫႉ

ဘဲနၫဒဲၭ လဂၩ ဘၪၡၪ့ ဘၪယၬႇ အီၪလမုၬဆီၪ့လချဲၫ့ဘၪႇ လၥ့ၪလံၬၥ့ၪလဲလါနၫ့ဂ့ၩႇ အဝ့ၫအီၪလၧဆၧမုၬလၩၥၭဎွံၫဒိၪဒိၪလ့ၬအဖၧၩ့လီၫႉ ဆၧအနီၪ မွဲယွၩအ ဘၩ့အမုလီၫႉ  ကဆါမုၪနဲၪဖျီၪထၪ့ၥၭလၧ ဘဲနၫဒဲၭ ဆူၫဘံၫဝူၫ အဆိၪထုၬ ၇ ကၠၪအထးဖၧၩ့နီၪ လၧၫ့ဎွ့ၩဝ့ၫလၧ ဆၧၥုၪ့မုၬၥၭပျၩ့လီၫႉ စၭထၪ့လၧ ၈-၁၂ ဘျၩ့အဖၧၩ့နီၪ ဘဲနၫဒဲၭ ဆူၫဘံၫဝူၫ အမ့ၬအနၪအၪ့လဲၩ့ထၪ့ၥၭ လၧဆၧၥုၪ့အုၭၥၭအုၭအဖၧၩ့လီၫႉႉႉ