ကွၫဒၫလုပ့ၫ ကဆါမုနးမၫရံၫယၩ

၁၅၃၁ နံၪ့ ဒံၫဇ့ၩဘၧၫ ၉ၥၫ့ ၥံၭၥီၫ့မုနံၩ ႇ ၦခွၫမဲၪအမံၩ့ Juan Diego လဂၩ ကလ့ၩထၪ့ မံဆၩဆၧလုထၪ့အဂး လ့ၩဆၧလဂီၩနၪခုၬလီၫႉ အဝ့ၫဘၪလ့ၩခၪ့ထ့ၭခိၪလီၩ့လဖျိၪ့ အမံၩ့ Tepeyac အဘိၩ့ဘၭနီၪ နါဂၧၫ့ဘၪ ဆၧအူၪဆၧဒံၩ့အမုၬလီၫႉ ဆၧအလူထုၬကကၠၪႇ ဆၧအုၪ့ဂဲၫဖျီၪထၪ့တၭႇ ၦမုနၩ့ဖိၪအဎံၪလၩလဂၩ အၪ့စၪ့ Juan Diego လၧအလုခီၫ ႇ မွဲအလ့ၩခီၫခီၫလဲၪႉ Juan Diego စံၭဆၧၫ့ဝ့ၫ လၧ အလ့ၩထၪ့မံဆၩဆၧလုထၪ့လီၫႉ

ဖိၪခွၫဆံၭဧ့ႇ ယအဲၪနၧၩလီၫႉ ယမွဲပလၫလဂၩလဲၪနီၪ ယမိလါနၥံၪယၫလီၫႉ ယၧၩနီၪ ယွၩအမိဆံၫ့ဎံၪ ၦမုၪနၩ့ၥံၫ့ဆ့ၭထံၪဎး နးမၫရံၫယၩလီၫႉ ယဆါယွၩတဲၩ့လၩ့ဆၧထီးလူၬ ဒဲအီၪလၧအလးကိၭစီၪ့ဒ့ၭလီၫႉ ဘဲၫၥိၭၦၡၩၥံၪကဒိၭန့ ဘၪယဆၧယၫ့ၥုၪ့ယၫ့ၥၭအဂး ယမိလါ ဘၩယွၩၥရိၬလဖျိၪ့ ဘၪဆၧၥုၪ့ထၪ့ဝ့ၫလၧဆၧအလးယီၩလီၫႉ ၦလၧအအၪ့ကံၩ့ယဆၧမၩဆၧၩ့ လၧအဆၧဖံၭဆၧမၩဖၧၩ့ ဒဲလၧအဆၧၥုၪ့အုၭၥၭအုၭအဖၧၩ့လဖၪနီၪ ကၥ့ၪယၫဘၪမိအၥၭ လၧဆၧအလးယီၩလီၫႉယဝ့ၫဒၪယီၩ ယမွဲနမိလၧအယၫ့ၥုၪ့ယၫ့ၥၭဆၧလီၫႉ

ယမိလါ ဘၩယွၩၥရိၬလဖျိၪ့ ဘၪဆၧၥုၪ့ထၪ့ဝ့ၫလၧဆၧအလးယီၩအဂဲးနီၪ လ့ၩလီၩအ့ၪနၥၫ့ခိၭအီၪလၧ Mexico ဝံးနီၪဆံၭႉ ဆၧလၧနဒၪဘၪႇ နနါဂၧၫ့ဘၪလဖၪနီၪ လ့ၩလီၩၥ့ၪယၫနၥၫ့ခိၭဆံၭႉ

Juan Diego လ့ၩဒၪ ၥၫ့ခိၭလီၫႉ အဝ့ၫလဂၩယီၩ မွဲတဝၫ့ဖိၪႇ ၦၡၪ့ဖိၪယၬဖိၪလဂၩအကၠီၩ့ႇ အဆၧချဲၩ့လဖၪနီၪ ၥၫ့ခိၭ လနဲၩဘၪအဝ့ၫတၭႇ အဝ့ၫအၥၭမုၬအ့ၬႉ Juan Diego ထဲၩ့ထဲၩ့လၧ Tepeyac ခိၪလီၩ့ခိၪလၧ ကဆါမုၪနးမၫရံၫယၩဒုၭနဲၪဖျီၪၥၭအလးတၭႇ အၪ့ကံၩ့အၪ့ယၫ ကဆါမုၪ ဘဲၫၥိၭကဖျါလၩ့ၦၡၩအဂူၫဂၩလီၫႉ အနီၪတၭ ကဆါမုၪနးမၫရံၫ စံၭအဝ့ၫႉႉႉ

၂ႉ ဖိၪခွၫဆံၭဧ့ႇ ၦၡၩလၧယဖျါလၩ့အၪ့မၧၫ့လ့ၩလီၩၥ့ၪယၫဆၧအဂး အီၪအၪဂၩလီၫႉ လါနၫ့ နၧၩလဂၩယီၩ ယရွံန့နၧၩယူၭလီၫႉ

လခဲၫ့ကနံၩ Juan Diego လ့ၩဒီၭကဘျၩလၧၥၫ့ခိၭအီၪႇ လီၩဘၪအဝ့ၫ ကဆါမုၪနးမၫရံၫယၩ အဆၧအၪ့ကံၩ့အၪ့ယၫအဂဲးလကၠၪဒီၭလီၫႉ

ၥၫ့ခိၭ ဘဲၫၥိၭကၥ့ၪယၫဘၪၦမုၪလၧအဒုၭနဲၪဖျီၭၥၭလဂၩနီၪအဂး အဝ့ၫမိဒၪဘၪဆၧနဲၪ့ကမံၩ့အကၠီၩ့ အၪ့မၧၫ့ Juan Diego လ့ၩလီၩကဆါမုၪနီၪလီၫႉ Juan Diego လ့ၩထၪ့ဒီၭကဘျၩ့လၧ ၦမုၪလၧအဒုၭနဲၪဖျီၭၥၭအအီၪတၭႇ လီၭဘၪဝ့ၫ လၧၥၫ့ခိၭအၥၭအီၭ မိဒၭဘၪဆၧနဲၪ့ကမံၩ့လီၫႉ  တၭကဆါမုၪနီၪလီၩ့ဘၪအဝ့ၫႉႉႉႉ

၃ႉ ဖိၪခွၫဆံၭဧ့ႇ ယၧၩယီၩ နမိမွဲအ့ၬဧၪႉ ၥၭမဲၪဆၧလဂ့ၩႉ နၥၫ့ခိၭကဒၪဘၪဆၧနဲၪ့ကမံၩ့လီၫႉ  ကိမုဆဲၫ့နံၩ ဂဲၫထဲၩ့ထဲၩ့လၧဆၧအလးယီၩဆံၭႉ

လခဲၫ့ကနံၩ ဆၧဖၩ့ထၪ့ထဲၩ့ကကၠၪ Juan Diego အမၩ့မၩ့လအီၪမုၬဆီၫ့ချဲၫ့ဘၪတၭႇ ဘၪယိအမၩ့မၩ့အကၠီၩ့ လ့ၩထၪ့လၧ Tepeyac ခိၪလီၩ့အဖၫ့ခိၪႇ လ့ၩဒၪကဆါမုၪနီၪ ကဲၪလၫ့အ့ၬႉ အီၪ ၂ ၥၫ့ကကၠၪ အမၩ့မၩ့နီၪ လၩ့ဘူၭကၥံၫဝ့ၫအကၠီၩ့ႇ Juan Diego စဲၪ့ထၪ့ႇ လ့ၩအၪ့ဎါၥၫ့ခၪလဂၩလီၫႉ ကလ့ၩကိၭၥၫ့ခၪအဂး အဝ့ၫဘၪခၪ့ထ့ၭ Tepeyac အလးနီၪတၭႇ ကဆါမုၪနီၪ ခိၭအနၫ့ဆါလီၫႉ  လၧအမၩ့လအအီၪမုၪဘၪအကၠီၩ့ လီၩ့အ့ၪဘၪၦမုၪနီၪလီၫႉ

တၭကဆါမုၪနးမၫရံၫ စံၭအဝ့ၫႉႉႉ

၄ႉ ဖိၪခွၫဆံၭဧ့ႇ ၥုၪ့ခါၥၭလၩ့လဂ့ၩႉ ယအီၪလၧနၧၩႇ ဒဲနအီၪလၧယလၩဒူၩ ဒဲယဆၧပဒၩ့ထၬအဖၫ့လၬမွဲအ့ၬဧၪႉ နမၩ့မၩ့နီၪ ကကၠၪယီၩ ၥံၫဒံၭအ့ၬႉ နဘၪလ့ၩကိၭၥၫ့ခၫလိၪအ့ၬႉ အခံၫ့ဘဲၫယီၩ အဝ့ၫအီၪမုၬထၪ့ထဲၩ့ယူၭႉ လ့ၩထၪ့လၧခိၪလီၩ့အဖၫ့ခိၪတၭႇ နဒၪဘၪဖီၫ့လဖၪနီၪ ဂဲၫထဲၩ့န့လၧယအီၪဆံၭႉ

ဘဲၫကဆါမုၪအၪ့မၧၫ့ဝ့ၫအၥိၭႇ အဝ့ၫလ့ၩထၪ့လၧခိၪလီၩ့ဒၩ့ခိၪတၭႇ ဒၪဘၪ ဖီၫ့ဆၧဆူၪလဖၪအၪ့မၩဝ့ၫႇ ဖိၫ့ထၬဝ့ၫလၧအဆဲၫ့ဖၧၩ့ႇ ဂဲၫထဲၩ့ဆိၬန့ဝ့ၫလၧၦမုၪအအီၪလီၫႉ ကဆါမုၪနီၪ ဎိၭထံၪဎိၭဒီၪထၪ့ထဲၩ့ ဖီၫ့အထဲၩ့လဖၪနီၪဂီၩ့ စံၭ Juan Diegoႉႉ

ဖိၪခွၫဆံၭဧ့ႇ ဆၧနဲၪ့အယီၩ ယကၥိၫ့စိၩအ့ၪနၥၫ့ခိၭအဂးလီၫႉ လ့ၩနဲၪအ့ၪ နၥၫ့ခိၭဆံၭႉ နဲၪအ့ၪၦအဂူၫဂၩလဂ့ၩႉ အယီၩကကၠၪယီၩႇ ဆၧလၧနလီၩၥ့ၪယၫဆၧလဖၪနီၪ နၥၫ့ခိၭကနဲၩဝ့ၫလီၫႉ

Juan Diego လ့ၩထီၩ့လၧ ၥၫ့ခိၭအီၪကကၠၪ နဲၪအ့ၪၥၫ့ခိၭ ဖီၫ့လဖၪနီၪလီၫႉ ဖီၫ့လဖၪလၩ့ထ့ၬလၭလၬတၭႇ Juan Diego အဆဲၫ့လၧအဘီၪ့ထၬဖီၫ့အဖၫ့ခိၪနီၪ ကဆါမုၪနးမၫရံၫယၩအဂၩဖျီၪထၪ့ဒၪဘၪဝ့ၫတၭ ထွံၩလၩ့ၥၭလၧ ကဆါမုၪအဂၩ့အမ့ၬယၫႇ စံၭခိးစံၭတၩကဆါယွၩလီၫႉ

၅ႉအလးခဲၫ့ထုၬလဘျၩ့ ကဆါမုၪဒုၭနဲၪဖျီၪၥၭ လၧ Juan Diego အမၩ့မၩ့အမ့ၬယၫ လီၩ့ဖျီၪထၪ့အမံၩ့ မွဲဝ့ၫ Guadalupe ကဆါမုၪလီၫႉ

ၦဆူနဲၩဖိၪလဖၪ ဒိၭနဲၩ့ၥၭလၧ Guadalupe ကဆါမုၪအအီၪယီၩ လၩ့ဘူၭအနံၪ့ ၅၀၀ ယူၭလီၫႉ

Juan Diego ၥံၫ လၧ နံၪ့ ၁၅၄၈နီၪတၭႇ ၥၫ့ဎွၫ John Paul II မၩကဲၪထၪ့အဝ့ၫ ဘဲၫၦဘၪဆိၪဂ့ၩလဂၩအၥိၭ လၧ နံၪ့ ၁၉၉၀ ဂီၩ့ႇ လၧယူၫလဲၫ့  ၃၁, ၂၀၀၂ ကကၠၪႇ ၥၫ့ဎွၩ John Paul II ဘိၭဘၪၥ့ၪယၫထၪ့  Juan Diego ဘဲၫၦဆံၫ့ဎံၪလဂၩ  လၧ Guadalupe ကဆါမုၪ Basilica ဘၩယွၩၥရိၬအဖၧၩ့နီၪလီၫႉ

Guadalupe ကဆါမုၪ ကအၪ့ကံၩ့ဘၩဆိၪဖၪန့ပဂးကိၭဂၩဒ့ၭလါဆံၭႉ