ဆၧဒၧၩ့ထၪ့လၧအဖီၩ့ဖျ့ၭဆၧဒဲၩဘၭ အဘိၪ့မုနံၩ

ကဆါဎြံၬအီၪဖျဲၪမုနံၩလထီၩ့ဒံၭဘၪအထီ ကနံၩယီၩ လၩဒံၫဇ့ၩဘၧၫထၪ့ (၈) ၥၫ့ႇ ကၭၥလ့ၬဆၧအီၪကီၪ့မၩလၩမၩဖၩ့ ၦမုနၩ့ၥံၫ့ဆ့ၬထံၪဎး နးမၫရံၫယၩဘၪဆၧဒၧၩ့ထၪ့လၧအဖီၩ့ဖျ့ၭဆၧဒဲၩဘၭ အဘိၪ့မုနံၩလီၫႉ ထီးအထၪ့ဘၭလၩ (၉) ဘံၪ့ႇ လၩစဲၬထဲၩ့ဘၧၫထၪ့ (၈) ကကၠၪႇ မွဲဝ့ၫ နးမၫရံၫယၩအီၪဖျဲၪအဘိၪ့မုနံၩလီၫႉ

ဘိၪ့မုနံၩယီၩ ၦလနၩ့နၩ့ စီၪဘၪမၪဝ့ၫလၧ ကဆါယွၩအၥီၫ့လီၩဘၪနးမၫရံၫယၩအဘိၪ့မုနံၩႇ မွဲဝ့ၫ နးမၫရံၫယၩဒၧၩ့ထၪ့န့ကဆါယွၩအဖိၪခွၫယ့ၫၡူၬအဘိၪ့မုနံၩလီၫႉ

လၧစအၫဒၫ့ ဒဲနးအံၫအဆၧဒဲၩဘၭအကၠီၩ့ႇ ၦၡၩကိၭဂၩဒ့ၭယီၩ ဘၪဆၧဒၧၩ့ထၪ့န့ဝ့ၫလၧဆၧဒဲၩဘၭအဖၧၩ့လီၫႉ ဆၧအနီၪ ပကိၭဝ့ၫလၧ “ဆၧဒဲၩဘၭအခၪ့ထံၭ”လီၫႉ  ပန့ၥၪထၬဆၧဒဲၩယီၩလါနၫ့ မုနံၩလၧလဒိၭန့ဆၧၥူၫဝၭဆံၫ့ဎံၪလကၠၪ ပန့ဘၪဆၧဒဲၩဘၭအခၪ့ထံၭအဆၧကွဲၪဖျါလီၫႉ လၧၦၡၩကိၭဂၩဒ့ၭအကျၩနီၪႇ ၦလၧအလန့ၥၪဘၪ အဆၧဒဲၩဘၭအခၪ့ထံၭနီၪႇ အီၪဒၪၦၡၩကဂၩဎးလီၫႉ အဝ့ၫနီၪႇ မွဲဝ့ၫ ယွၩအမိဆံၫ့ဎံၪ နးမၫရံၫယၩလီၫႉ

ကဆါယွၩနီၩ မွဲယွၩအဆံၫ့ဎံၪထုၬတၭႇ အဝ့ၫအီၪအလးႇ ဒဲအဖိၪခွၫၥၭဘီၩ့အီၭအလးနီၪ ကဘၪဆံၫ့ဎံၪဝ့ၫဂ့ၩဂ့ၩဘၪဘၪလီၫႉ ဆၧနီၪအကၠီၩ့ ကဆါယွၩတဲၩ့ဝဲၩထၬ ပမုနၩ့ၥံၫ့ဆ့ၬထံၪဎး နးမၫရံၫယၩႇ မၩလၧၫ့ထၪ့ဎွ့ၩထၪ့အဝ့ၫလၧအခိးအတၩႇ ပဒၩ့ထၬအဝ့ၫလၧဆၧဒဲၩဘၭအခၪ့ထံၭအကံၪအၥွ့ၫထီးအလူၬလီၫႉ

 ၥၫ့ဎွၩပံၫအူၩ ၉ ဘိၭဘၪၥ့ၪယၫထၪ့ ဘိၪ့မုနံၩယီၩ ဘဲၫကၭၥလ့ၬဆၧအီၪကီၪ့အဆၧဆူနဲၩလဖၧၫ့အၥိၭ လၧ ၁၈၅၄ နံၪ့အိၩလီၫႉ ဖီၩ့ခွံၬထဲၩ့ ၄နံၪ့ႇ ၁၈၅၈ နံၪ့နီၪ ကဆါမုၪနးမၫရံၫယၩဒုၭနဲၪဖျီၪၥၭ ၁၈ ကၠၪ လၧၦဆံၫ့ဎံၪ ဘဲနၫဒဲၭတၭႇ အလးခဲၫ့ထုၬကဘျၩ့နီၪ အဝ့ၫလီၩဖျီၪထၪ့အမံၩ့ “ယမွဲၦဘၪဆၧဒၧၩ့န့လၧအဖီၩ့ဖျ့ၭဆၧဒဲၩဘၭလီၫႉ”

ထၧၫ့ဖုဝဲထီးလူၬၥံၪ ဘိၩယီၩ အၫဒဝ့ၫတူၩအဆၧၫ့အထီးႇ ပကျ့ၭစၨၭအီၪတဲၩ့ဝဲၩပၥၭလၧကအဆါဎြံၬအီၪဖျဲၪအဘိၪ့မုနံၩလဖၪယီၩ ပကဘၪယိဒီၩ့ ကဆါမုၪနးမၫရံၫယၩလီၫႉ အဝ့ၫအီၪခိၭထိးဆၧၫ့အကဆါယွၩ လၧဆၧယူၬယၪ့အဲၪကွံၩႇ လၧဆၧခိၭနၪႇ ထီးန့ဖံၭထၬယွၩလူယွၩထၫအဖၧၩ့လီၫႉ

ဘဲၫၥိၭပကကြၨၭထိးဆၧၫ့ႇ မၩလၩမၩဖၩ့ဘၪ ကဆါဎြံၬအီၪဖျဲၪမုနံၩအဂးႇ မွဲကဆါမုၪနးမၫရံၫယၩလၧအဖီၩ့ဖျ့ၭဆၧဒဲၩဘၭထီးလူၬလဂၩ အၪ့ကံၩ့ဘၩဆိၪဖၪန့ပဂးကိၭဂၩဒ့ၭလါဆံၭႉ