ဂၠူၩဆၨၩဆၭဖိၪ အဲၪနံၪဖရံး

ထၧၫ့ဖုဝဲထံၩၥိၭထီးလူၬၥံၪဧ့ႇ မံၩ့ဎၩၥၪဖျီၪမုၪခွၫလၧ အအီၪအနီၫ့ အဆၧရၫလၩ့ဖၧၩ့ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဂၠူၩဆၨၩဆၬဖိၪ အဲနံၪဖရံး အဂဲးအကၠီၩ့လါဆံၭႉ အဲနံၪဖရံး အဝ့ၫအၥၭအၥၭအီၪ (၄)  နံၪ့အခံၫ့နီၪ လၧအဝ့ၫၥံၪအီၪ ဂၠၪမနံၫ ံၫခးဖၧၩ့ ဟံတလၪ န့ထၪ့ဘၪ ထံၫခးအဆၧပၧၩ့အကၠီၩ့ အဲနံၪဖရံးဒဲ အမိမိအဖါဖါၥံၪနီၪ ဆၧၥုၪ့ခိၥၭဂီၩ စၭကဲၪထၪ့ယူၭနီၪလီၫႉ

ဘၪမနီၪလဲၪစွါဘဲၫ အဲၪနံၪဖရံး ၥံၪနီၪ ဂၠူၩဆၨၩဆၬဖီၪမွဲဝ့ၫတၭ ဟံတလၪ နီၪဆၧမ့ၬလဲၩၥၭကဲၪ့အီၪလၧဂၠူၩဆၨၩဆၬၥံၪအဖၫ့ခိၪဂီၩ့ အ့ၪဒၪ ဂၠူၩဆၨၩဆၬဖိၪလၧအထံခးဖၧၩ့စွါဘဲၫ မၩၥံၫခွံၬဝ့ၫဒၪထီးအလူၬအကၠီၩ့နီၪလီၫႉၦအကဲၪ ဂၠူၩဆၨၩဆၬဖိၪအဝ့ၫၥံၪနီၪ ဘဲၫကဖီၩ့ဖျ့ၭလၧ ဟံတလၪအဆၧမၩၥံၫခွံၬဝ့ၫဒၪထီးအလူၬအကၠီၩ့နီၪလီၫႉၦအကဲၪဂၠူၩဆၨၩဆၬဖိၪအဝ့ၫၥံၪနီၪ ဘဲၫကဖီၩ့ဖျ့ၭလၧ ဟံတလၪအဆၧမၩၥံၫအဂးဘၪလ့ၩဎဲၪ့အၪအၥၭလၧအလးလခဲၫ့ကစီၪ့နီၪလီၫႉ

ဟံတလၪ ပၧၩ့ထံၫခးအခံၫ့ထုၬထၪ့ထၬအၥနိၫ့နီၪ မွဲဝ့ၫလၧအထံၫဂး ဂၠၪမနံၪ ဖၧၩ့အ့ၪဂၠူၩဖိၪၥံၪမွဲဂ့ၩ အ့ၪထိးဆၧၫ့ထၬ ဂၠူၩဖိၪၥံၪလၧအဂံၪ့ဖၧၩ့မွဲဂ့ၩ ကဘၪထိးစ့ၩရၫ့အၥၭအကၠီၩ့တၭ ဂၠူၩဖိၪၥံၪစွါဘဲၫ ၦၡၩထိးဆၧၫ့လဘၨၫဘၪ နးဂၩနီၪလီၫႉ

အဲနံၪဖရံး ဖိၪယီၩ ထီၩ့အဝ့ၫအီၪဖျဲၪမုနံၩအခံၫ့ကကၠၪန့ဘၪ (ဒိုင်ယာရီ) လံၬအူၭကအူၭတၭကွ့ၭထုၬဖျီၪထၪ့ထၬအဝ့ၫၥံၪအဆၧၥၭမၧၫ့ကန့အဂးဘၪအီၪဂူၪအီၪဘံၪ့အၥၭလၧအလးအဲၪ့ခိၬဖၧၩ့အဂဲး ဘၪအီၪလၧ ၥုၪခိၥၭဂီၩအဂဲးနီၪလီၫႉ အဝ့ၫၥံၪဘၪအီၪဂူၫအီၪဘံၪ့ၥၭအလးနီၪအလးအဲၪ့နီၪကမံၩ့ ဘၪထိးဆၧခိအဂဲးနီၪကမံၩ့ ဆၧအၪ့ဆၧအီၪ လလၧၫ့ဎွ့ၩဘၪနီၪ ကမံၩ့ဘၪဒၪခီၩ့ဆၧၫ့ယၫ ဆၧကၪဆၧဂဲၩၥံၪထီးအလူၬအဂဲးကွ့ၭထၬဝ့ၫလၧ အ (ဒိုင်ယာရီ) လံၬစီၩ့ဖၧၩ့နီၪလီၫႉ

အကနံၩတၭ အဝ့ၫၥံၪ အီၪဂူၪအီၪ ဘံၪ့အၥၭအလးအမ့ၬယၫနီၪ လဲၪ့ၥိၪကဖျိၪ့ဂဲၫစိၭထၪ့ဂီၩ့ ၦအဖီၪ့စူၪဝဲၩလဖၪထဲၩ့ကိၭန့အဝ့ၫၥံၪ လၧ ကဘၪထိးမၩၥံၫအၥၭအလးလစီၪ့နီၪလီၫႉ အခံၫ့အန အဲၪနံၪဖရံးနီၪ အၥၭအီၪဝ့ၫ (၁၆) နီၪ့ယူၬ နီၪလီၫႉ ဘၪထိးထဲၩ့ကိၭန့အၥၭအခံၫ့ အဲနံၪဖရံးယီၩ အီၪလမုၬဆီၪ့လချဲၫ့ဘၪကဲၪထၪ့ဎိၩဒိၪဒ့ၬတၭဆၧဆၫနီၪအၪ့န့ထၪ့ဆၧအနၧၩ့လၧအဝ့ၫအဖၫ့ခိၪအဝ့ၫအၥၭဘၪၥံၫခွံၬဝ့ၫဒၪယူၭနီၪလီၫႉ

လၧအဝ့ၫၥံၪအီၪအလးနီၪ ဂၠူၩဆၨၩဖိၪၥံၪဘၪထိးမၩၥံၫအၥၭအီၪဝ့ၫအဂၩ ကကုၭဘျဲၪနီၪလီၫႉ ၦၡၩဘၪထိးမၩၥံၫအၥၭဖၧၩ့ အဲနံၪဖရံးအခါခါနီၪ ဖီၩ့ဖျ့ၭဝ့ၫဒၪဖၧၩ့ ပၫဝ့ၫဒၪအကၠီၩ့ ထဲၩ့ထဲၩ့လၧအဝ့ၫၥံၪအီၪဂူၫအီၪဘံၪ့ၥၭအလးကကၠၪဒၪန့ထၪ့ထဲၩ့အခိၪမုၪ အဲနံၪဖရံးကွ့ၭထုၬဖျီၪထၪ့ထၬအ (ဒိုင်ယာရီ) လံၬဘၫယီၩၥိၭနီၪလီၫႉ .“အိႉႉဆၧဒုၭဆၧယၩၥံၩဧ့ႇ နၥံၪမၩဂ့ၩဆၧမနီၪလဲၪႉ ၦၡၩၥံၪယီၩ ဘၪနီၪလဲၪအီၪဎူၫဎူၫဎၩ့ဎၩ့ယံၩယံၩၡီၩ့ၡီၩ့ လနၧၩ့ဘၪလဲၪႉ ဘၪမၩပြံၩမၩပြၩဆၧ ဘဲၫယီၩၥိၭလဲၪႉ ၦၡၩထီးအလူၬနီၪမွဲဝ့ၫၦၡၩလမံၩ့လီၫ မီၪ့ဎီၩ့လီၫအကၠီၩ့ ၦၡၩၥံၪကၥ့ၪယၫအဂး ယွၩဧ့ႇ နဲၪဖျီၪထၪ့အ့ၪဆၧလၩဆၧဖၩ့လါဆံၭႉ

ယွၩတဲၩ့လၩ့ထၬၦၡၩၥံၪထီးအလူၬယီၩ ဘဲၫအဝ့ၫၥိၭနီၪ အ့ၪၦၡၩၥံၪၥၭနၪ့အၥၭစွါဘဲၫ ဆၧဒုၭဆၧယၩၥံၪယီၩကကဲၪထၪ့လဘျၩ့ဘၪလဘျၩ့နီၪလီၫႉ“ အဲနံၪဖရံး ကွ့ၭထုၬဖျီၪထၪ့ထၬအလံၬအီၪဝ့ၫဘဲၫယီၩၥိၭနီၪလီၫႉ အဲၪနံၪဖရံးယီၩ အၥၭဆံၭဒံၭလါနၫ့ အဆၧအၪ့ဎၬကွ့ၭထုၬဖျီၪထၪ့ထၬလံၬလဖၪၥံၪယီၩ အၪ့လၩ့ထၪ့အ့ၪ ၦၡၩၥံၪအဆၧၥ့ၪယၫနၪၥ့ၪအီၪဝ့ၫဒၪဒိၪမၬဒ့ၭနီၪလီၫႉ

အဝ့ၫကွ့ၭထုၬထၪ့ထၬလံၬအီၪဝ့ၫဘဲၫယီၩၥိၭအကၠီၩ့အဝ့ၫၥံၪအီၪဂူၫအီၪဘံၪ့အၥၭအလးနီၪ ဘဲၫယီၩ ၦၡၩၥံၪၥုၪထၪ့ထၬထဲၩ့ (ပြတိုက်) ဂီၩ့ လၧ (ပြတိုက်) ဖၧၩ့နီၪ အဲၪနံၪဖရံး ကွ့ၭထၬအ (ဒိုင်ယာရီ) နဲၪဖျီၪထၪ့ထၬဝ့ၫ ၦၡၩၥံၪဖီဘၪ အၪအၪဂီဂီယူၭ နီၪလီၫႉ လၧ ဟံတလၪ ပၧၩ့ထံၫခးအခံၫ့ ခးဂၠၪမနံၪ ဖၧၩ့ ဂၠူၩဆၨၩဆၬဖိၪၥံၪဘၪဒၪခီၩ့ဆၧၫ့ယၫ ဆၧကၪဆၧဂဲၩဖၧၩ့ အဲနံၪဖရံး အဆၧအၪ့ကံၩ့အၪ့ယၫ ဆၧချဲၩ့အီဝ့ၫလၧ ယွၩအီၪဘဲၫယီၩၥိၭအဂဲး ယရၩလၩ့ဖ့ၪၥ့ၪယၫအ့ၪဘၪနၥံၪဘဲၫၥိၭနီၪလီၫႉ