ၦအၪ့ကံၩ့အခီၫ့, ဒဲၦခမျၧး ဒိၭဘၭတံၫဇၫ့အၥၭ

ထီးစယီဟၫ့အဖျဲလဖၪနီၪစဲၪ့ထၪ့ခွံၬဝ့ၫတၭ, အဝ့ၫဒၪလီၩဘၪၥၫ့ၦခမျၧးလၧစယီဟၫ့အဂဲး, နၥံၪစဲၪ့ထၪ့ လၧမံၩ့လၬကျၩ ဘဲၫၥိၭနၥံၪမိယိဖၧၩ့ဆၧနီၪလမံၩ့လဲၪ. မွဲဖီးလၧလံၩအူၪဝၭဝ့ၫလဘီၩ့နီၪဆ့ဧၪ.- အ့ၪလမွဲဘၪ တၭ,နၥံၪစဲၪ့ထၪ့ ဘဲၫၥိၭနၥံၪမိယိဖၧၩ့ဆၧနီၪလမံၩ့လဲၪ. မွဲၦကီၩ့ဆၧၥိၭဆၧဖူၬလူၭနီၪဆ့ဧၪ. ယိခွါ,ၦလၧ အကီၩ့ဆၧၥိၭဆၧလၧအဂ့ၩ, ဒဲအၪ့ဆၧအီၩဆၧလၧ အအွံၪလဖၪနီၪ, အီၪလၧစဎွၩအနီးဖၧၩ့လီၫ. အ့ၪလမွဲဘၪဘဲၫနီၪ, မွဲနၥံၪစဲၪ့ထၪ့ဘဲၫၥိၭနၥံၪမိယိဖၧၩ့ဆၧနီၪလမံၩ့လဲၪ. မွဲမီၪလဂၩဧၪ. မွဲယူၭ, ယလီၩဘၪနၥံၪမွဲအဒိၪနဲၪ့မီၪဒံၭဖၭဒိၪလီၫ.

အဝ့ၫနီၪမွဲၦလၧဆၧကွ့ၭအၥၭလၧအဂဲး, ယိခွါ, ယအၪ့မၧၫ့လၩ့ ယၥီၫ့လဂၩလၧနမ့ၬယၫ, အဝ့ၫဒၪမိတဲၩ့ဝဲၩနဖၧၩ့ၥၭ လၧနမ့ၬယၫလီၫ. အဂဲးဘဲၫယီၩယလီၩဘၪနၥံၪ, ၦလၧၦမုၪအီၪဖျဲၪန့ ဝ့ၫအကျၩ, မီၪလၧအဒိၪနဲၪ့ၦဘၭတံၫဇၫ့ဆၧ စယီဟၫ့နီၪအီၪနးဂၩအ့ၬ. မွဲလါနၫ့ဘိၩ, ၦအီၪဝ့ၫလၧယွၩအဘၩ့အမုးအဖၧၩ့ အဆံၭထုၬလဂၩ ဒိၪနဲၪ့အဝ့ၫနီၪဒံၭလီၫ. ၦအၪ့ကံၩ့အခီၫ့, ဒဲၦခမျၧးထီးအလူၬလဖၪနီၪ ဒိၭဘၭတံၫဇၫ့အၥၭလၧ စယီဟၫ့အစူၪဖၧၩ့တၭ, အီၪက့ၪ တီၩအီၪက့ၪလီၩ့ယွၩလီၫ.- အ့ၪမွဲၦဖၫရစံၫ, ဒဲၦၥ့ၪလံၬလဖၪနီၪ, လဒိၭဘၭတံၫဇၫ့ဘၪအၥၭ လၧအစူၪဖၧၩ့တၭ, ခွံၬၡိၭခွံၬယွၩအဆၧကိၪ့ လၧအဂးဒၪဝ့ၫနီၪလီၫ.