ၦယိထွ့ၫဆၧဖိၪဆၧလံၩလၧအၥၭဆၭလဂၩ

အဝ့ၫစံၭအထံၩအဖျဲၥံၪ, ၦၥထံၫလဂၩအီၪလၧ ၦယိအဆၧလဂၩတၭ, ၦအီၪက့ၪဆၧမၪလၧအလီၩ့ လၧအမၩလူၬဂီၩ့ အစူၪလးအခၪ့ခိၪလီၫ.- မွဲအကိၭထဲၩ့အဝ့ၫတၭစံၭဝ့ၫ, ယနါဂၧၫ့ဆၧလၧနဂဲးနကၠီၪ့ယီၩ, မွဲဆၧနီၪလမံၩ့လဲၪ. ဖ့ၪလၫ့နယိဆၧအဆရၫ့ဘီၪ. အဂဲးဘဲၫယီၩ နကဲၪဘၪလၧၩ့ၦယိဆၧအ့ၬ.- ၦယိဆၧနီၪ စံၭလၩ့အၥၭ, မွဲယမိမၩဘဲၫၥ့ၪလဲၪ, အဂဲးဘဲၫယီၩကဆါမိမၩလၩ့ထ့ၬခွံၬယမံၩ့ လၧၦယိဆၧအလးလီၫ. ယခုၪ့ဆၧကဲၪအ့ၬ, ယအၪ့ကံၩ့ဆၧနီၪ ယမ့ၬမဲလီၫ. ထီးဆၧအ့ၪနၫ့ထၪ့ခွံၬယၧၩ လၧၦယိဆၧအလးဘဲၫၥိၭ ၦၡၩၥံၪမိထိးဆၧၫ့ယၧၩ လၧအဂံၪ့ဖၧၩ့တၭ, ယမိမၩဘဲၫၥ့ၪလဲၪဘဲၫၥ့ၪလဲၪနီၪ ယစ့ၩရၫ့ဝဲၩယူၭလီၫ.-

တၭအဝ့ၫဒၪကိၭ ၦလၧအဒ့ၪအမါအီၪလၧအကဆါအစူၪ ဖၧၩ့လဂၩဘၪလဂၩ လဂၩဘၪလဂၩတၭ, စံၭအခၪ့ ထံၭလဂၩ, နဒ့ၪနမါလၧနဘၪလိၭထဲၩ့ယကဆါနီၪ, မွဲအဆံၭအၪလဲၪ.- အဝ့ၫဒၪစံၭဝ့ၫ, ၥိၪအဘၭၥၫလယၩလီၫ. အဝ့ၫဒၪစံၭ, မၩန့နလံၬတၭ, ဆၧၫ့နၩ့ကွ့ၭလၩ့ယဲဆံၫချဲၫ့ချဲၫ့ဘီၪ.- ထီးနီၪလဖၧၫ့စံၭအဂူၫဂၩလဂၩ နဒ့ၪ နမါဆံၭအၪလဲၪ. တၭအဝ့ၫဒၪစံၭ ဘုၪကၠိၩ့အကိရၫလယၩလီၫ. တၭစံၭအဝ့ၫဒၪ, မၩန့နလံၬနီၪကွ့ၭလၩ့ဎိၭဆံၫဘီၪ.-

အကဆါအၪ့အူၭထၪ့ ၦယိဆၧလၧအလတီၩလလီၩ့ဘၪလဂၩလီၫ. အဂဲးဘဲၫယီၩမွဲအမၩဆၧ လၧဆၧကိၪ့ၥ့ၪကိၪ့ဘၪလီၫ. အဂဲးဘဲၫယီၩ ၦလဆိၩလကၠၪယီၩ အဖိၪအီၪလၧအဆိၩဒၪဝ့ၫအကျၩနီၪ, အ ကိၪ့ၥ့ၪကိၪ့ဘၪဂ့ၩနဲၪ့ၦဆၧဖၩ့ဖိၪဒံၭလီၫ.- ယစံၭနၥံၪ, ဒုၭကဲၪထၪ့နၥံၪအထံၩအၥိၭလဖၪလၧမၫမၧၫ့လ တီၩဘၪအကၠီၩ့နီၪ, ဘဲၫၥိၭထီးဆၧနီၪအ့ၪလူၬတၭ, အဝ့ၫၥံၪမိထိးဆၧၫ့နၥံၪလၧဂံၪ့ၥံၪ လၩ့ဆိၩလၩ့ကၠၪနီၪဆံၭ.-

 ၦလၧအမၩတီၩဝ့ၫလၧဆၧအၡၩထုၬနီၪ, မိမၩတီၩဝ့ၫလၧဆၧအအၪဆ့လီၫ. ၦလၧအမၩလတီၩ ဘၪလၧဆၧအၡၩထုၬနီၪ, မိမၩဝ့ၫလၧအလတီၩဘၪ လၧဆၧအအၪဆ့လီၫ.- မၩအၥၭဘဲၫနီၪတၭ, မၫမၧၫ့ လတီၩဘၪနီၪး နၥံၪအ့ၪလမၩဘၪလၧအတီၩတၭ, မွဲပလၫမိဖ့ၪလၫ့နၥံၪ အဎၧၩ့အဎီ လၧအတီၩအလီၩ့လဂၩလဲၪ.- ၦဂူၫဂၩအဆၧနီၪ, နၥံၪအ့ၪလမၩဘၪလၧအတီၩတၭ, မွဲပလၫမိဖ့ၪလၫ့နၥံၪလၧ နၥံၪအဆၧဒၪနၥံၪဝ့ၫလဂၩလဲၪ.- ဆၧလၧအဎီးအၡၩယီၩ, ကဆါနံၫဂၩအဆၧမၩနီၪ, မၩဝ့ၫဎွ့ၩထၪ့နးဂၩအ့ၬ. မိမ့ၬလဲၩဝ့ၫနးဂၩတၭ, မိအဲၪဝ့ၫနးဂၩလီၫ. အ့ၪလမွဲဘၪတၭ, မိမၩဆၧၩ့ဝ့ၫနးဂၩ,မိမၩကြၩ့ထမးဝ့ၫနးဂၩလီၫ. ယွၩအဆၧမၩ, ဒဲမၫမၧၫ့အဆၧမၩနီၪ, နၥံၪမၩၥ့ၪအ့ၬ.