ၦမၫကူၭၥံၪလၧမုထၪ့လခီၫ.

ယ့ၫရှူၬအီၪဖျဲၪဝ့ၫ လၧဘ့ၭၥလံၫဟံၫ့ လၧခးယုဒၫ အဖၧၩ့နီၪႇ လၧစဎွၩဟ့ရၧၭအမုနံၩလဖၪတၭႇ ယိခွါႇ ၦမၫကူၭၥံၪအီၪ လၧမုထၪ့လခီၫ ဂဲၫထီၩ့လၧယရုစလံၫ့တၭႇ-စံၭဝ့ၫဒၪႇ ၦအီၪဖျဲၪဝ့ၫႇ ၦယုဒၫဖိၪအစဎွၩလဂၩနီၪႇ မွဲအအီၪခီၫခီၫလဲၪ. အဂဲးဘဲၫယီၩပအီၪလၧမုထၪ့လခီၫနီၪ ပဒၪဘၪယူၭ အၡၪလဖျိၪ့တၭႇ ပဂဲၫယူၭ ဘဲၫပမိဘိၪ့ထၪ့ဘၩထၪ့ဝ့ၫ အၥိၭနီၪလီၫ.-
စဎွၩဟ့ရၧၭနါဂၧၫ့ဝ့ၫတၭႇ အၥုၪ့ခိအၥၭခိ ဒဲၦယရုစလံၫ့ဖိၪထၧၫ့ဒိၩ့ယၫ အၥၭခိဆ့လီၫ.- အဝ့ၫနီၪ ဒုၭအီၪကိၩ့အီၪကီၪ့ ၦလုဆၧအဒိၪ ဒဲၦခမျၧး အၡၩကွ့ၭလံၬၥံၪတၭႇ အၪ့စၪ့ဝ့ၫႇ ဆၧလၧဎရံၬနီၪ မွဲအအီၪဖျဲၪဝ့ၫခီၫခီၫလဲၪ.- အဝ့ၫၥံၪစံၭဆၧၫ့ဝ့ၫႇ လၧဒိၩ့ဘ့ၭၥလံၫဟံၫ့ လၧခးယုဒၫအဖၧၩ့နီၪလီၫ. အဂဲးဘဲၫယီၩဆၧ ကွ့ၭအၥၭလၧမီၪလဂၩဘဲၫယီၩႇ တၭနဝ့ၫဒၪႇ ဘ့ၭၥလံၫဟံၫ့ႇ ခးယုဒၫဧ့ႇ နမွဲလၩလါအဆံၭထုၬ လၧခးယုဒၫအခိၪလဖၪအကျၩနီၪအ့ၬ. အဂဲးဘဲၫယီၩ ဆၧအခိၪႇ လၧအမိယိယၡၩခမျၧး အံၫစရ့လၭနီၪႇ မိဂဲၫထၪ့လၧနဖၧၩ့လီၫ.
ထီးနီၪလဖၧၫ့ စဟ့ရၧၭကိၭၥူၪၦမၫကူၭၥံၪတၭႇ ၡၪနီၪမွဲအအီၪဖျီၪဝ့ၫ ဆံၭယံၬယူၭလဲၪနီၪႇ အၪ့စၪ့ဝ့ၫလၩ့ထံးလၩ့ဆ့ၭတၭႇ- အၪ့မၧၫ့အလ့ၩထီၩ့ လၧဘ့ၭၥလံၫဟံၫ့အဖၧၩ့နီၪႇ စံၭဝ့ၫဒၪႇ လ့ၩအၪ့စၪ့ဆၧလၩ့ထံးလၩ့ ဆ့ၭလၧဖိၪၥၪနီၪအဂဲးဆံၭး နၥံၪအ့ၪဒၪဘၪဝ့ၫနီၪႇ ဘဲၫယမိလ့ၩဆ့ဘိၪ့ထၪ့ဘၩထၪ့ဝ့ၫအၥိၭတၭႇ ဂဲၫထဲၩ့လီၩဘၪယၧၩဆံၭ.-
အဝ့ၫၥံၪနါဂၧၫ့စဎွၩ အလူနီၪႇ စဲၪ့ထၪ့ခွံၬဝ့ၫဒၪလီၫ. ယိခွါႇ ၡၪလၧအဒၪဘၪဝ့ၫ လၧမုထၪ့လခီၫလဖျိၪ့နီၪႇ လ့ၩဝ့ၫလၧအမ့ၬယၫ ထီးအဂဲၫအီၪပထုၬ ထီးဖိၪၥၪအီၪဝ့ၫအလးအဖၫ့ခိၪနီၪလီၫ.- အဝ့ၫ ၥံၪဒၪဘၪၡၪလဖျိၪ့နီၪႇ အၥုၪ့ထိၬအၥၭထိၬ လၧဆၧၥၭထိၬဒိၪဒိၪလ့ၬလီၫ.- အဝ့ၫၥံၪ လ့ၩနုၬဝ့ၫလၧဂံၪ့ဖၧၩ့နီၪႇ ဒၪဘၪဖိၪၥၪဒဲအမိနးမၫရံၫတၭႇ ထွံၩလၩ့ဘၩထၪ့ဖိၪၥၪနီၪႇ ဝဲထၪ့အဆၧလူဒိၪဎွ့ၩဒိၪတၭႇ မၩဘိၪ့ဖိၪၥၪ လၧထီၫ့ ဒဲလီဘၫ့ဒဲမူရၫ့လီၫ.- ဆၧၥီၪ့ထဲၩ့အဝ့ၫၥံၪလၧ ဆၧမံၫမးအဖၧၩ့ ဘဲၫၥိၭအထီးထဲၩ့ကဒၩထဲၩ့လၧ စဟ့ရၧၭအအီၪလဂ့ၩတၭႇ မွဲအထဲၩ့ထဲၩ့ဝ့ၫ လၧအထံၫအခး လၧဖၧၩ့ၥၭအဂူၫဂၩလဘီၩ့လီၫ.