ၦဘၭတံၫဇၫ့ဆၧ စယီဟၫ့အလီၩလၩ့လၬလၩ့

ၦခမျၧးနီၪအၪ့စၪ့ဝ့ၫတၭ, စံၭဝ့ၫ,အ့ၪမွဲဘဲၫနီၪတၭ,ပဘၪမၩပဝ့ၫဘဲၫၥ့ၪလဲၪ.- အဝ့ၫဒၪချဲၩ့ဆၧၫ့ဆၧ တၭစံၭအဝ့ၫၥံၪ, ၦလၧအဆဲၫ့အီၪဝ့ၫနံၫဘံၪ့နီၪ,မွဲအအၪ့နၩ့ဖၭဖ့ၪလၫ့ ၦလၧအဆဲၫ့လအီၪဘၪဆံၭ. ၦလၧအဆၧအၪ့အီၪဝ့ၫနီၪ, မွဲအမၩဘဲၫနီၪၥိၭဆ့ဆံၭ.-

ၦလၧအအၪ့ကံၩ့အခီၫ့လဖၪနီၪ, ဘဲၫၥိၭအမိဒိၭဘၭတံၫဇၫ့ဘၪအၥၭတၭ, ဂဲၫဝ့ၫလၧအအီၪနီၪ, စံၭဝ့ၫ, ဆရၫဧ့, ပဝ့ၫဒၪယီၩမွဲပဘၪမၩဘဲၫၥ့ၪလဲၪ.- အဝ့ၫဒၪစံၭ အဝ့ၫၥံၪ, ဆၧလၧဆၧမၪလူၬနၥံၪနီၪ, နၥံၪထီးမၩန့ အၪနဲၪ့အနီၪလဂ့ၩ.- ၦၥုၭဖိၪလဖၪအၪ့စၪ့ဝ့ၫတၭ, စံၭဝ့ၫ, ပဝ့ၫဒၪယီၩမွဲပဘၪမၩဘဲၫၥ့ၪလဲၪ. အဝ့ၫဒၪစံၭ အ ဝ့ၫၥံၪ,နၥံၪထီးမၩနၧၩ့ဆီၪ့ၦနးဂၩလဂ့ၩ, နၥံၪထီးအၪ့ဘျံၭအၪ့ဘျၪဆၧလဂ့ၩ. ထီးဒၪနၥံၪန့ဘၪနၥံၪအလံၩ့နီၪ, ၥုၪ့မံၫ့ၥၭမံၫ့ဆံၭ.- ၦခမျၧးယိလါဆၧအဖၧၩ့ၥၭတၭ,ၦထီးအလူၬကၩ့ကၩလိၬအၥၭ လၧစယီ ဟၫ့အဂဲးနီၪလၧအမွဲဎရံၬဧၪ, လမွဲဘၪဎရံၬနီၪဧၪ.-

စယီဟၫ့ချဲၩ့ဆၧၫ့ၦထီးအလူၬတၭစံၭဝ့ၫ, ယဝ့ၫဒၪယီၩ, ယဘၭတံၫဇၫ့နၥံၪလၧထံၫကျၩလီၫ. မွဲလါနၫ့တၭၦမိဂဲၫဝ့ၫလဂၩ ၥ့ၪနဲၪ့ဒံၭယၧၩဒံၭလီၫ. ထီးယကွဲၪလၩ့ အခၪ့ဖံၭဖျံၩနီၪ ယကြၨၭအ့ၬ. အဝ့ၫနီၪမိဘၭတံၫဇၫ့နၥံၪလၧၥၭမုဆံၫ့ဎံၪ,ဒဲလၧမ့ၪအဖၧၩ့လီၫ.- အချဲၩအီၪဝ့ၫလၧအစူၪဖၧၩ့တၭ, မိမၩဆံၫ့ခွံၬအခရဲးဂ့ၩဘၪစဲၪနီၪ, မိအီၪက့ၪကီၪ့ထဲၩ့ အဘုၪၥံၪဂူၫၥံၪလၧအဖၫ့ဖၧၩ့တၭ, အ့ၪမွဲလီခၫ့နီၪ, မိဆူၭထၪ့ခွံၬဝ့ၫလၧမ့ၪလၧ အလၩ့ဖံၬလၥ့ၪဘၪလီၫ. အဝ့ၫဒၪၦဂၨၪထၪ့ၦၡၩလၧ အဆၧချဲၩ့ဂူၫဂၩအၪထံၪတၭ, လီၩလၩ့လၬလၩ့ဆၧၥၭထိၬအပရၧၫ့ လၧၦခမျၧးလီၫ.