ၦဘၧၩ့လၩ့ဆၧစယီဟၫ့အဆၧၥံၫ

စဎွၩဟ့ရၧၭနါဂၧၫ့ဆၧႇ အဂဲးဘဲၫယီၩ အမံၩ့ဂၧၫ့ထၪ့ၥၩလၩ့ဝ့ၫတၭႇ စံၭဝ့ၫလၧၦဘၭတံၫဇၫ့ဆၧစယီဟၫ့ ဂဲထုၪ့ထဲၩ့လၧဆၧၥံၫအဖၧၩ့လီၫ. မၩအၥၭဘဲၫနီၪတၭႇ ဆၧလၩ့လၭမၩအၥၭလၧအဖၧၩ့လီၫ.- 
ၦဂူၫဂၩ စံၭဝ့ၫႇ လၧအမွဲစအံၫလဲယၫလီၫ. ၦဂူၫဂၩစံၭဒံၭဝ့ၫႇ လၧအမွဲမီၪႇ အ့ၪလမွဲဘၪ မွဲဘဲၫမီၪလဂၩဂၩအၥိၭနီၪလီၫ.- အ့ၪမွဲထီးစဟ့ရၧၭနါဂၧၫ့နီၪႇ စံၭဝ့ၫႇ အယီၩမွဲစယီဟၫ့လၧယဖ့ၬခွံၬယူၭအခိၬတၭႇ ဂဲထုၪ့ထဲၩ့ဝ့ၫလၧ ဆၧၥံၫအဖၧၩ့ယူၭလီၫ.- အဂဲးဘဲၫယီၩ မွဲလၧအထၧၫ့ဖုဝဲစဖံလံၭအမၫနးဟရိဒအၭ လၧအအီၪဎုၬလိၬအၥၭ လၧအဝ့ၫနီၪအကၠီၩ့တၭႇ စဟ့ရၧၭအၪ့မၧၫ့ ၦလ့ၩဖီၪ့ထၬစယီဟၫ့တၭႇ စၧၩ့ထၬဝ့ၫလၧထီၫ့ဖၧၩ့လီၫ.
 အဂဲးဘဲၫယီၩ စယီဟၫ့စံၭစဟ့ရၧၭႇ မွဲနအီၪဎုၬလၧ နထၧၫ့ဖုဝဲအမၫနီၪတီၩအ့ၬ.- မၩအၥၭဘဲၫနီၪတၭႇ နးဟရိဒအၭၥၭထၪ့စယီဟၫ့တၭႇ မိမၩၥံၫဘၪအၥၭနီၪမၩဝ့ၫၥ့ၪအ့ၬ.- အဂဲးဘဲၫယီၩ စဟ့ရၧၭၥ့ၪယၫဝ့ၫ လၧစယီဟၫ့မွဲၦအတီၩအလီၩ့ႇ ဒဲၦအဆံၫ့အဎံၪနီၪႇ ၥၭမဲၪဝ့ၫတၭႇ ယိထံၫယိဆၭဝ့ၫႇ ထီးအနါဂၧၫ့အလူနီၪ မၩဝ့ၫအၪမံၩ့တၭႇ နါဂၧၫ့ဝ့ၫအလူၡုၪၡုၪ မုၬမုၬလီၫ.
ထီးဘၪအမုနံၩအထီဂ့ၩႇ စဟ့ရၧၭအီၪဖျဲၪဝ့ၫအနံၩဆၧၫ့ထဲၩ့အလးတၭႇ မၩဘိၪ့ဆၧလုအၪ့လုအီၩ အၦဒိၪၦၡါႇ ဒဲၦၥုၭဖိၪလထီၫ့အခိၪလဖၪ ဒဲၦကဲၪဝ့ၫလၧအခိၪ လၧဂၫလလံၫၥံၪတၭႇ- နးဟရိဒအၭအဖိၪမုၪလဂၩ ဂဲၫနုၬဝ့ၫနီၪႇ ဂဲထုၪ့လံတၭႇ ဘၪစဟ့ရၧၭအၥၭ ဒဲၦဆၧၫ့နၩ့ဒံၩ့ခံၫ့ လၧစပွဲထံၭလၧအၥိၭလဖၪနီၪအ ၥၭလီၫ. 
စဎွၩစံၭဖိၪၥၪမုၪနီၪႇ ထီးဒၪနမိအၪ့ကံၩ့ဘၪနၥၭ လၧဆၧလမံၩ့မံၩ့တၭႇ ယမိဖ့ၪလၫ့နၧၩလီၫ.- ဆိၪလၩ့အၥၭလၧအဝ့ၫဒၪတၭႇ စံၭဝ့ၫႇ ထီးဒၪနအၪ့ကံၩ့ ဆၧလမံၩ့မံၩ့လၧယၧၩတၭႇ ယမိဖ့ၪလၫ့နၧၩ လၧယဘၩ့ယမုးယီၩ ထီးအဖိၭဖၫ့လီၫ.- 
ၦဖိၪၥၪမုၪနီၪစဲၪ့ထၪ့ဝ့ၫတၭႇ အၪ့စၪ့အမိႇ မွဲယမိဘၪအၪ့ကံၩ့ဆၧနီၪလမံၩ့လဲၪ. အဝ့ၫဒၪလီၩဘၪဝ့ၫႇ ၦဘၭတံၫဇၫ့ဆၧစယီဟၫ့ အခိၪဎွံၪလီၫ.- အဝ့ၫဒၪထဲၩ့ဝ့ၫ ချဲၫ့ချဲၫ့လ့ၬ လၧစဎွၩအအီၪတၭႇ အၪ့ကံၩ့ဆၧစံၭဝ့ၫႇ ယၥၭအီၪလၧနမိဖ့ၪလၫ့ယၧၩ ၦဘၭတံၫဇၫ့ဆၧ စယီဟၫ့အခိၪဎွံၪ လၧတဲၪလဲၪအဖၧၩ့ချဲၫ့ချံၭလီၫ.
စဎွၩအၥုၪ့အုၭအၥၭအုၭ ဒိၪမၬလါနၫ့တၭႇ မွဲလၧအဆၧဆိၪလၩ့အၥၭႇ ဒဲလၧၦဆၧၫ့နၩ့ဒံၩ့ခံၫ့လၧ အၥိၭလဖၪအကၠီၩ့တၭႇ ဆၧမိဂဲးလိၬဘၪအၥၭလၧအဝ့ၫနီၪအ့ၬ.- စဎွၩအၪ့မၧၫ့ၦခိၭဆၧလဂၩချဲၫ့မၬတၭႇ မၪလူၬဝ့ၫလၧအဘၪဂဲၫထဲၩ့ဆိၬန့ အခိၪဎွံၪလီၫ. အဝ့ၫဒၪလ့ၩဖ့ၬထ့ၬအခိၪလၧထီၫ့ဖၧၩ့. တၭဂဲၫထဲၩ့ဆိၬဝ့ၫ အခိၪဎွံၪလၧတဲၪလဲၪအဖၧၩ့တၭႇ ဖ့ၪလၫ့ဖိၪၥၪမုၪႇ ဒဲဖိၪၥၪမုၪနီၪဖ့ၪလၫ့ဝ့ၫလၧအမိလီၫ.
 အထံၩအဖျဲၥံၪနါဂၧၫ့တၭႇ ဂဲၫမၩန့ထဲၩ့ဝ့ၫအစွၪတၭႇ ထဲၩ့ခုၪ့လၩ့ဘၧၩ့ဝ့ၫ လၧဆၧၥွၪခိၪအဖၧၩ့လီၫ.