ၦဘၧၩ့လၩ့ဆၧစယီဟၫ့ကအီၪဖျဲၪထၪ့နီၪ ဆၧဘိၭဘၪၥ့ၪယၫအဂဲး.

လၧခးယုဒၫအစဎွၩဟ့ရၧၭအဆိၩနီၪႇ ၦလုဆၧလၧ စအဘဲယၫလဒီၪ့အကျၩႇ အမံၩ့မွဲစဇၭခရဲအၫအီၪ ဝ့ၫလဂၩတၭႇ အမၫမွဲၦလၧစအၫရၧၫ့အဖိၪမုၪအကျၩႇ အမံၩ့မွဲနးအလံၭစဘ့ၭလီၫ.- အဝ့ၫၥံၪတီၩဝ့ၫလီၩ့ဝ့ၫ လၧယွၩအမ့ၬယၫနံၫဂၩလူၬတၭႇ  လ့ၩဝ့ၫလၧယွၩအဆၧမၪလူၬႇ ဒဲအဆၧတီၩဆၧလီၩ့ ထီးအလူၬအဖၧၩ့တၭႇ အီၪက့ၪဆၧမၪလၧအလီၩ့အလးအီၪအ့ၬ.- အဖိၪအလံၩအီၪအ့ၬ. အဂဲးဘဲၫယီၩ နးအလံၭစဘ့ၭနီၪ မွဲၦထူၬဖိၪတၭႇ အၥၭၡါက့ၭယူၭနံၫဂၩလူၬလီၫ.

ဆၧမၩအၥၭလၧအမၩ ၦလုဆၧအဆၧမၩလၧယွၩ အမ့ၬယၫႇ လၧအဒီၪ့ဒၪဝ့ၫအကျၩ ဘဲၫၦလုဆၧအထူၫအရူၫအၥိၭနီၪႇ- ဖၭဝ့ၫတၭႇ ထီးအလ့ၩနုၬလၧယွၩအဆၧလုဂံၪ့ဖၧၩ့နီၪႇ ဆူၭခဲၩထၪ့ဆၧနၧၫ့မၧၫ့လီၫ.- ဆူၭခဲၩထၪ့ဆၧနၧၫ့မၧၫ့အနၩရံၩနီၪႇ ၦခမျၧးထီးအလူၬဘၩဆိၪဖၪဆၧလၧခီၫ့လီၫ.- ယွၩအၥီၫ့လဂၩနဲၪဖျီၪ ထၪ့အၥၭလၧအမ့ၬယၫတၭႇ ဆၧၫ့ထုၪ့ဝ့ၫလၧ ဆၧဆူၭခဲၩနၧၫ့မၧၫ့အလးအစူၪထွ့ၪလခီၫနီၪလီၫ.- စဇၭခရဲအၫဒၪဘၪဝ့ၫနီၪႇ အၥုၪ့ခိအၥၭဝီၩတၭႇ ဘၪဆၧၥၭမဲၪၥၭဖျဲၩ့ဝ့ၫလီၫ.-

အၥီၫ့စံၭအဝ့ၫဒၪႇ စဇၭခရဲအၫဧ့ႇ ၥၭမဲၪဆၧလဂ့ၩႇ အဂဲးဘဲၫယီၩ နဆၧဘၩဆိၪဖၪနီၪ ဆၧနါဂၧၫ့ယူၭတၭႇ နမၫနးအလံၭဇဘ့ၭ မိအီၪဖျဲၪန့နဖိၪခွၫတၭႇ နမိဘၪဖျိၬအမံၩ့လၧစယီဟၫ့း- အဝ့ၫ ဒၪမိကဲၪထၪ့ ဆၧၥုၪ့ထိၬၥၭထိၬဒဲ ဆၧၥုၪ့ဎွံၫၥၭယီၫလၧနဂးတၭႇ ၦမိၥုၪ့ထိၬၥၭထိၬလၧ အအီၪဖျဲၪဝ့ၫအဂဲးအၪဂၩလီၫ.- အဂဲးဘဲၫယီၩ မွဲအမိကဲၪထၪ့ဝ့ၫလၧ အဒိၪလၧယွၩအမ့ၬယၫတၭႇ စဘံၭထံၫႇ ဒဲဆၧမၧၩ့ န့ၦနီၪမိအီၩဝ့ၫအ့ၬ. လၧအမိအဒၧၩ့လးဖၧၩ့လံၩလံၩနီၪႇ မိလၧၫ့ထၪ့ဎွ့ၩထၪ့ဝ့ၫလၧၥၭမုဆံၫ့ဎံၪလီၫ.- မိကၠၪထဲၩ့န့ၦအံၫစရ့လၭဖိၪအၪဂၩထီၩ့ လၧကဆါအဝ့ၫၥံၪအယွၩအအီၪနီၪလီၫ.- မိလ့ၩဝ့ၫလၧအမ့ၬယၫ လၧစအံၫလဲယၫအၥုၪ့အၥၭႇ ဒဲအစီၩ့အမၩ့ဘဲၫၥိၭအမိဘိၭထဲၩ့ဖါၥံၪအၥၭလၧဖိၪၥံၪအအီၪႇ ၦလခိၭနၪဘၪ ဆၧနီၪလၧၦတီၩၦလီၩ့အဆၧကိၪ့ၥ့ၪႇ ဘဲၫၥိၭအမိတဲၩ့ဝဲၩ ၦလၧဆၧတဲၩ့ဝဲၩအၥၭလဆၨၩ လၧကဆါအ ဂးလီၫ.

စဇၭခရဲအၫစံၭအၥီၫ့နီၪႇ ဆၧယီၩမွဲယမိၥ့ၪယၫဘဲၫၥ့ၪလဲၪႇ အဂဲးဘဲၫယီၩ ယဝ့ၫဒၪယီၩယၥၭၡါဖီၩႇ ယမၫနီၪအၥၭၡါက့ၭယူၭ.- အၥီၫ့နီၪချဲၩ့ဆၧၫ့ဆၧတၭႇ လီၩဘၪအဝ့ၫနီၪႇ ယဝ့ၫဒၪယီၩ ယမွဲဂၫဘြံလၭလၧ အဆၧၫ့ထုၪ့လၧယွၩအမ့ၬယၫတၭႇ ဆၧအၪ့မၧၫ့ယဂဲၫလီၩဘၪနၧၩ လၧဆၧၥၭထိၬအပရၧၫ့ယီၩလီၫ.

 ယိခွါႇ ယလူလၧအမိလၧၫ့ထၪ့ဎွ့ၩထၪ့ထီးအထီဘၪနီၪ မွဲနလနဲၩဘၪအကၠီၩ့တၭႇ ဘိၩ့အလချႃၭ မၩဒံၭ ဘၪအၥၭနီၪနချဲၩ့ဆၧၥ့ၪအ့ၬႇ နမိအုၭအၭလီၫ.

ၦခမျၧးယိလါ စဇၭခရဲအၫအဖၧၩ့ၥၭနီၪႇ အဝ့ၫဒၪ အီၪလၧဆၧလုအဂံၪ့ဖၧၩ့ ယံၬယံၬတၭႇ အဝ့ၫၥံၪထီၫမံၫထီၫမၪလီၫ.- အဝ့ၫဒၪဂဲၫထဲၩ့ထၪ့ဝ့ၫတၭႇ ချဲၩ့ဆၧလၥ့ၪဘၪတၭႇ အဝ့ၫၥံၪၥ့ၪယၫလၧ အဒၪဆၧလၧယၫလခီၫလၧဆၧလုအဂံၪ့ဖၧၩ့နီၪႇ အဝ့ၫဒၪဖျၭအခိၪတၭႇ အီၪအုၭအၭဝ့ၫလီၫ.

ဆၧမၩအၥၭလၧအနံၩအၥၫ့ လၧအမၩအဆၧမၩ လၧၫ့ထၪ့ဎွ့ၩထၪ့ဝ့ၫတၭႇ ထဲၩ့ထဲၩ့ဝ့ၫလၧအဂံၪ့ဒၪဝ့ၫလီၫ.- ဆၧလၧအနံၩအၥၫ့လဖၪနီၪ ဖီၩ့ခွံၬဝ့ၫတၭႇ အမၫ နးအလံၭစဘ့ၭဒၧၩ့ထၪ့တၭႇ အီၪက့ၪၥူၪအၥၭလၩယဲဘံၪ့ႇ- စံၭဝ့ၫဒၪႇ လၧကဆါမၩယၧၩဘဲၫယီၩလၧမုနံၩ လဖၪ ထီးအယိလၩ့ဝ့ၫလၧယၧၩ ဘဲၫၥိၭအမိမၩဖီၩ့မၩဖျ့ၭယၧၩ လၧဆၧဒုၪဒွ့ၪလၧၦၡၩအကျၩလီၫ.