ၦဂြံစၭဖိၪလနၩ့အၪ့ဎၬယ့ၫၡုၬ

ၦဂြံစၭဖိၪၥံၪလနၩ့နၩ့ အီၪလၧၦဂဲၫဘၩဆၧလၧ ဆၧဘိၪ့ဖၧၩ့လဖၪအကျၩလီၫ. မၩအၥၭဘဲၫနီၪတၭႇ အဝ့ၫၥံၪဂဲၫလၧစဖံလံၭ ၦဘ့ၭၥစ့ဒၫဖိၪလၧဂၫလလံၫအဖၧၩ့ အအီၪတၭႇ အၪ့စၪ့အဝ့ၫႇ စံၭဝ့ၫကဆါဧ့ႇ ဆၧမိဒၪဘၪပၥၭလၧယ့ၫၡုၬနီၪလီၫ.-

တၭစဖံလံၭလီၩဘၪ စအၪ့ဒူၫနီၪ စအၫ့ဒူၫ ဒဲစဖံလံၭ လ့ၩလီၩဘၪထဲၩ့ ယ့ၫၡုၬ လီၫ.

ယ့ၫၡုၬချဲၩ့ဆၧၫ့အဝ့ၫၥံၪတၭႇ စံၭဝ့ၫႇ အမုအလၩ လၧၦၡၩအဖိၪခွၫအလၩအဖၩ့မိဖျီၪထၪ့နီၪ ဘၪယူၭဝ့ၫယူၭ.- ယလီၩဘၪနၥံၪတီၩတီၩလီၩ့လီၩ့ႇ ဘုၪချံၫလဖျိၪ့လၩ့ထ့ၬလၧဂၪ့ခိၪအဖၧၩ့နီၪႇ အ့ၪလအုၪၥံၫဘၪတၭႇ အီၪဒၪအဆၧလဖျိၪ့ဎးလီၫ. မွဲလါနၫ့အ့ၪအုၪၥံၫနီၪ ၥၪထၪ့ဝ့ၫအၪဖျိၪ့လီၫ.- ၦလၧအအဲၪအၥၭမၧၫ့ဒၪဝ့ၫနီၪႇ အၥၭမၧၫ့မိလၩ့မါခွံၬဝ့ၫလီၫ. ၦလၧအမ့ၬလဲၩ အၥၭမၧၫ့ဒၪဝ့ၫ လၧဂၪ့ခိၪချိၫ့ယီၩႇ မိန့ဘၪထဲၩ့အၥၭမၧၫ့အဆိၩဆိၩအကၠၪကၠၪလီၫ.-

ၦလဂၩဂၩအ့ၪမၩယဆၧမၩနီၪ မွဲအဖိၬဒၪဝ့ၫယခဲၫ့ဆံၭ. ထီးယအီၪ အလးနီၪယခ့ၫယၡၩ မိအီၪဝ့ၫထီးနီၪဆ့လီၫ. ၦလဂၩဂၩအ့ၪမၩယဆၧမၩတၭႇ ယဖါမိဒုၭလၩဖၩ့ အဝ့ၫနီၪလီၫ.

ဘိၩ့နဲၪ့ယီၩ ယၥုၪ့ခိယၥၭဝီၩတၭႇ မွဲယမိစံၭဘဲၫၥ့ၪလဲၪ. မွဲယမိစံၭႇ ဖါဧ့ႇ ထိးထဲၩ့တၩ့ထဲၩ့ယၧၩ လၧအဆၧၫ့အထီယီၩဧၪ. မွဲလါနၫ့ဘဲၫၥိၭယမိထိးဆၧအဆၧၫ့ အထီယီၩတၭႇ  ယဂဲၫလၩ့ယဝ့ၫလီၫ. ဖါဧ့ႇ ဒုၭလၩဖၩ့နမံၩ့ဆံၭ. မၩအၥၭဘဲၫနီၪတၭႇ ဆၧအလူၥီၫလၩ့လၧမူၭခိၪႇ ယဒုၭလၩဖၩ့ယူၭ. တၭယမိဒုၭလၩဖၩ့ဒီၭလီၫ.- မၩ အၥၭဘဲၫနီၪတၭႇ ၦခမျၧးလၧအဆၧၫ့ထုၪ့နါဂၧၫ့ဆၧ နီၪတၭႇ စံၭဝ့ၫလၧအမွဲလၫ့အလူၥီၫလီၫ. အဂူၫဂၩလနၩ့ႇ စံၭဝ့ၫႇ မွဲအၥီၫ့လဂၩ ချဲၩ့ဆၧလၧအဝ့ၫနီၪလီၫ.

 ယ့ၫၡုၬချဲၩ့ဆၧၫ့ဆၧတၭႇ  စံၭဝ့ၫႇ ဆၧအလူၥီၫနီၪ မွဲလၧယဂးအ့ၬႇ မွဲလၧနၥံၪအဂးလီၫ.- ဘိၩ့နဲၪ့ယီၩဂၪ့ခိၪဘၪဆၧစ့ၩရၫ့လီၫ. ဘိၩ့နဲၪ့ယီၩဂၪ့ခိၪအခိၪနီၪ ဘၪဆၧနၫ့ထၪ့ခွံၬဝ့ၫလီၫ.- ယဝ့ၫဒၪယီၩ ယအ့ၪဘၪဆၧ ဘီၩ့ထၪ့ယၧၩလၧဂၪ့ခိၪချိၫ့ယီၩတၭႇ ယမိမီၩ့ထဲၩ့ ၦကိၭဂၩဒ့ၭလၧယအီၪလီၫ. မွဲအမိၥံၫဘဲၫအံၩဘဲၫအိၩအဂဲးအကၠီၪ့နီၪႇ ဒုၭနဲၪဝ့ၫလၧအဆၧချဲၩ့နီၪလီၫ.