အဝ့ၫဒၪမွဲမစဲအၫ(ဎြံၬ) ဧၪႉ

လၧဆၧနီၪလဖၪအလးခဲၫ့တၭ, ယ့ၫၡုၬစဲၪ့ဝံၩ့ဝၩ့ လၧဂၫလလံၫအဖၧၩ့လီၫ. အဂဲးဘဲၫယီၩ မိစဲၪ့ဝံၩ့ဝၩ့ ဘၪအၥၭလၧခးယုဒၫအဖၧၩ့အ့ၬ. အဂဲးဘဲၫယီၩ ၦယုဒၫဖိၪလဖၪအၪ့ဎၬမၩၥံၫအဝ့ၫဒၪလီၫ.- မွဲလါနၫ့ဘိၩ, ထီးအထၧၫ့ဖုဝဲၥံၪ လ့ၩထၪ့ဝ့ၫဂီၩ့, အဝ့ၫဒၪလ့ၩထၪ့ဆ့လၧဘိၪ့ဖၧၩ့နီၪတၭ, အ့ၪမွဲလ့ၩဖျီၪ ဝ့ၫဒၪအ့ၬ, လ့ၩၥူၪဝ့ၫလီၫ.-

မၩအၥၭဘဲၫနီၪတၭ, ၦအီၪလၧယရုစလံၫ့ လနၩ့နၩ့စံၭဝ့ၫ, အယီၩမွဲၦလၧအဝ့ၫၥံၪအၪ့ဎၬမၩၥံၫဝ့ၫနီၪ မွဲအ့ၬဧၪ.- ယိခွါ, မွဲအချဲၩ့လၧအၥၭဒူၩလါနၫ့နီၪ, ၦၡၩၥံၪစံၭဆၧနးမံၩ့အ့ၬ. အယီၩမွဲဎရံၬနီၪ, ၦဒိၪၦၡါ ၥံၪၥ့ၪယၫလၩ့ထံးလၩ့ဆ့ၭဆ့ဧၪ.- မွဲလါနၫ့ဘိၩ့, အယီၩလဂၩအီၪထၪ့ဝ့ၫခီၫခီၫလဲၪနီၪပၥ့ၪယၫ, အ့ၪ မွဲထီးဎရံၬအ့ၪဂဲၫလၩ့ခိၬ, မွဲအမိအီၪထၪ့အထံၭခီၫခီၫ လဲၪနီၪ,ၦၥ့ၪယၫဝ့ၫနးဂၩအ့ၬ. မၩအၥၭဘဲၫနီၪတၭ, ယ့ၫၡုၬၥီၪ့ထဲၩ့ၥၫ့ထဲၩ့ဆၧ လၧဆၧလုအဂံၪ့ဖၧၩ့အဘိၩ့ဘၭတၭ, ကိၭၡၭထၪ့ဆၧ, စံၭဝ့ၫဒၪ, နၥံၪၥ့ၪယၫယၧၩတၭ, ယအီၪထၪ့အထံၭ ခီၫခီၫလဲၪနီၪ, နၥံၪၥ့ၪယၫဆ့လီၫ. ယဂဲၫလၩ့ဒၪယဝ့ၫအ့ၬ, ၦလၧအအၪ့မၧၫ့လၩ့ယၧၩ လၧနၥံၪလၥ့ၪယၫဘၪဝ့ၫလဂၩနီၪ,မွဲအတီၩအလီၩ့လီၫ.- အ့ၪမွဲယဝ့ၫဒၪယီၩ, ယၥ့ၪယၫအဝ့ၫလီၫ. အဂဲးဘဲၫယီၩ ယဂဲၫလၩ့လၧအအီၪတၭ,အဝ့ၫဒၪအၪ့မၧၫ့လၩ့ယၧၩလီၫ.- မၩအၥၭဘဲၫနီၪတၭ, ၦအၪ့ဎၬဖီၪ့ထၬအဝ့ၫနီၪ, ၦအီၪက့ၪအစူၪလၧအလီၩ့နးဂၩအ့ၬ. အဂဲးဘဲၫယီၩအဆၧၫ့အထီ ဘၪဒံၭအ့ၬ.