ယ့ၫၡှုၬအီၪလၧၦဖၫရစံၫစစဲမၧၫ့အဂံၪ့.

တၭၦဖၫရစံၫလဂၩ ကိၭယ့ၫၡုၬဘဲၫၥိၭအမိအၪ့ဆၧလၧအၥိၭလီၫ. အဝ့ၫဒၪလ့ၩနုၬ လၧၦဖၫရစံၫအဂံၪ့ ဖၧၩ့တၭ, ဆၧၫ့နၩ့ဒံၩ့ခံၫ့ဝ့ၫလၧစပွဲထံၭနီၪလီၫ.

ယိခွါ,ၦဆၧဒဲၩဘၭဖိၪၦမုၪအီၪလၧဒိၩ့ဖၧၩ့လဂၩနီၪ, ၥ့ၪယၫလၧအဆၧၫ့နၩ့ဒံၩ့ခံၫ့လၧ စပွဲထံၭလၧၦဖၫ ရစံၫအဂံၪ့ဖၧၩ့တၭ, ဂဲၫဆိၬကီၩ့လိးဘွၩလဖျိၪ့ အီၪလၧဆၧနၧၫ့မၧၫ့တၭ, ဆၧၫ့ထုၪ့ဝ့ၫလၧအခၪ့ထံၭ လၧအချိၫ့လခီၫတၭ,ဂၪ့ဝ့ၫ,- ၥူၫဝၭခွံၬအဝ့ၫအခၪ့လၧအမ့ၬထံၫတၭ,ထူၭခွံၬဝ့ၫလၧအခိၪၥူၪတၭ, အဲၪဂါအခၪ့တၭ,ဂုၪဝ့ၫလၧဆၧနၧၫ့မၧၫ့လီၫ.

ၦဖၫရစံၫလၧအကိၭဝ့ၫလဂၩနီၪဒၪဘၪဝ့ၫတၭ, စံၭဆၧလၧအၥၭခံဖၧၩ့, အဝ့ၫလဂၩယီၩ, အ့ၪမွဲမီၪနီၪ, ၦမုၪလၧအထိၭဘၪဝ့ၫလဂၩယီၩ, မွဲၦဘဲၫၥ့ၪလဲၪဘဲၫၥ့ၪလဲၪနီၪ, မိၥ့ၪယၫဝ့ၫလီၫ. အဂဲးဘဲၫယီၩမွဲၦဆၧဒဲၩဘၭဖိၪလီၫ.

ယ့ၫၡှူၬချဲၩ့ဆၧၫ့ဆၧတၭ, စံၭဝ့ၫ,စစဲမၧၫ့ဧ့, ယမိချဲၩ့ဆၧလၧနၧၩနးထံၪလီၫ. အဝ့ၫဒၪစံၭဝ့ၫ, ချဲၩ့ကဒၪ, ဆရၫဧ့,- စ့ၩကဆါလဂၩအစ့ၩအီၪလၧၦနံၫဂၩအစူၪဖၧၩ့း အလဂၩဒန့ရံၩယဲယၩ, အဝ့ၫလဂၩယဲဆံၫလီၫ. ၦလဖၪနီၪ, စ့ၩလၧအမိလိၭထဲၩ့ဝ့ၫလအီၪဘၪတၭ, အဝ့ၫဒၪကွဲၪဖျါထဲၩ့အဝ့ၫၥံၪနံၫဂၩလူၬလီၫ. အ့ၪမွဲဘဲၫနီၪတၭ, အဝ့ၫၥံၪနံၫဂၩနီၪ, မိအဲၪအဝ့ၫနီၪဒိၪလဂၩဂၩလဲၪ.

စစဲမၧၫ့ချဲၩ့ဆၧၫ့ဆၧတၭ, စံၭဝ့ၫ,ယဆီၫ့မီၪ့ၦလၧအကွဲၪဖျါထဲၩ့အဆၧ လၧအအၪလဂၩနီၪလီၫ. အဝ့ၫဒၪစံၭအဝ့ၫ, နစ့ၩရၫ့ဆၧဂ့ၩဘၪစဲၪလီၫ.- ကၠၪစိၩအၥၭ လၧၦမုၪအီၪတၭ, စံၭစစဲမၧၫ့, ၦမုၪလဂၩယီၩ မွဲနဒၪဘၪဆ့ဧၪ. ယဂဲၫနုၬလၧနဂံၪ့ဖၧၩ့ယီၩ, ထံၫလၧယခၪ့အဂးနီၪ, နဖ့ၪလၫ့ဝ့ၫအ့ၬ. အ့ၪမွဲၦမုၪယီၩၥူၫဝၭခွံၬယခၪ့ လၧအမ့ၬထံၫတၭ, ထူၭခွံၬဝ့ၫလၧအခိၪၥူၪလီၫ. နဝ့ၫဒၪယီၩနအဲၪဂါယၧၩအ့ၬ. အ့ၪမွဲၦမုၪယီၩ, လၧယဂဲၫနုၬၥၫ့ဝ့ၫနီၪ, အဲၪဂါယခၪ့နီၪ အီၪထီဝ့ၫအ့ၬ. နဝ့ၫဒၪယီၩနဂုၪယခိၪလၧၥိၪအ့ၬ. အ့ၪမွဲၦမုၪယီၩ ဂုၪယူၭယခၪ့လၧၥိၪနၧၫ့မၧၫ့ယူၭ.-

မၩအၥၭဘဲၫနီၪတၭ,ယစံၭနၧၩယီၩ အဆၧဒဲၩဘၭအအၪနီၪ, ဆၧဖျါခွံၬယူၭဝ့ၫယူၭ. အဂဲးဘဲၫယီၩ အဲၪဆၧဒိၪမၬလီၫ. အ့ၪမွဲၦလၧဆၧဖျါခွံၬဝ့ၫ လၧအၡၩနီၪ, အဲၪဆၧၡၩလီၫ.- မွဲအလီၩဘၪၦမုၪနီၪ,နဆၧဒဲၩဘၭဖျါယူၭ, ၦဆၧၫ့နၩ့ဒံၩ့ခံၫ့ဝ့ၫ လၧအၥိၭလဖၪနီၪ စံၭဝ့ၫလၧအၥၭခံဖၧၩ့ ၦလၧအကွဲၪဖျါဆၧဒဲၩဘၭလဂၩယီၩ, မွဲပလၫလဂၩလဲၪ.- အဝ့ၫဒၪစံၭၦမုၪ, နဆၧနဲၩနီၪ ထိးထဲၩ့တၩ့ထဲၩ့ယူၭနၧၩယူၭ, ထဲၩ့မုၬမုၬဆံၭ.