ယ့ၫၡူၬအခံးအဂၩ့အၪ့လဲၩအၥၭ

လၧခဲၫ့ထဲၩ့ဎူၫနံၩတၭ, ယ့ၫၡုၬကိၭန့စပံတၧၫ, ဒဲစယ့မံၭဒဲစယီဟၫ့တၭ, လ့ၩၥိၫ့ထၪ့ဝ့ၫလၧခိၪလီၩ့ဖၭထီၫလဖျိၪ့အလီၩ့, လၧဆၧကဒုၩအလးလီၫ. အခံးအဂၩ့ဘၪဆၧအၪ့လဲၩခွံၬအၥၭ လၧအဝ့ၫၥံၪအမ့ၬယၫတၭ,- အကီၩ့အၥိၭယုၩ့ယဲဒိၪမၬတၭ, ဘွၩထၪ့ဒိၪမၬ ဘဲၫမူၭခိၪဖီၫအၥိၭ ထီးၦအၪ့ဆူၫဝၭဆၧ လၧဂၪ့ခိၪချိၫ့ မၩဘွၩထၪ့လၥ့ၪဘၪလီၫ.-

စအံၫလဲယၫ, ဒဲစမိစ့ၭနဲၪဖျီၪထၪ့အၥၭလၧအဝ့ၫၥံၪတၭ, ချဲၩ့ဒုၪ့လိၬအၥၭလၧယ့ၫၡုၬလီၫ.- စပံတၧၫချဲၩ့ထၪ့ဝ့ၫတၭ, စံၭယ့ၫၡုၬ, ရၭဘံၫဧ့,ပအီၪထီးယီၩမုၬကၨ. ပမိမၩတဲၩနးၥၧၫ့ဖျိၪ့,လၧနဂးနးဖျိၪ့,လၧစမိစ့ၭအဂးနးဖျိၪ့, လၧစအံၫ လဲယၫအဂးနးဖျိၪ့လီၫ.- အဂဲးဘဲၫယီၩချဲၩ့ဆၧ ဘဲၫၥ့ၪလဲၪဘဲၫၥ့ၪလဲၪနီၪ, ၥ့ၪယၫလၩ့အၥၭအ့ၬ. မွဲအဝ့ၫၥံၪ ၥၭမဲၪၥၭဖျဲၩ့ ဆၧဒိၪမၬအဂဲးလီၫ.-

ဆၧအုၪ့လၩ့ကဒုၩအဝ့ၫၥံၪတၭ, ဆၧအလူၥီၫလၩ့လၧဆၧအုၪ့အကျၩစံၭဝ့ၫဒၪ, အယီၩမွဲယဖိၪခွၫၥၭဘီၩ့လဂၩတၭ, ခိၭနၪအလူဆံၭ.- အဝ့ၫၥံၪယိဝၬဝၬချဲၫ့မၬတၭ, အ့ၪလမွဲဘၪန့ၫယ့ၫၡုၬ ဒဲအဝ့ၫၥံၪအနၫ့ဆါလဖၪနီၪ ဒၪဘၪၦနးဂၩ အ့ၬ.

အဝ့ၫၥံၪဂဲၫထဲၩ့လၩ့ဝ့ၫ လၧခိၪလီၩ့ခိၪအဘိၩ့ဘၭတၭ, ယ့ၫၡုၬမၪလူၬဝ့ၫ ဘဲၫၥိၭၦၡၩအဖိၪခွၫယီၩလ ချႃၭဂဲထုၪ့ထဲၩ့ဒံၭဘၪ လၧဆၧၥံၫအဖၧၩ့နီၪ, ထီးလီၩဘၪဆၧလၧအဒၪဘၪနီၪ လၧၦနးဂၩလဂ့ၩ,- ဆၧချဲၩ့လထံၪနီၪ, အဝ့ၫၥံၪထီးန့ဝ့ၫတၭ, စံၭလိၬအၥၭ, ဆၧဂဲထုၪ့ထဲၩ့လၧဆၧၥံၫနီၪ,မွဲဆၧနီၪလဲၪ.-