ယ့ၫၡူၬဖျါလၩ့ၦနွ့ၫဆံၫ-နံၫဂၩလစီၪ့

ဆၧနီၪလဖၪအလးခဲၫ့တၭ, ကဆါအီၪက့ၪလၩ့ၦဂူၫဂၩၥံၪနွ့ၫဆံၫဆ့တၭ, အၪ့မၧၫ့အလ့ၩဝဲၩဝ့ၫ နံၫဂၩလ စီၪ့,နံၫဂၩလစီၪ့, လၧယၫလၧကယဲဒိၩ့,ဒဲကယဲအလး လၧအနၫ့ဆါဒၪဝ့ၫမိလ့ၩနီၪလီၫ.-

မွဲဘဲၫနီၪတၭ,အဝ့ၫဒၪလီၩဘၪအဝ့ၫၥံၪ, ကူၭဆၧအလးအီၪအၪမၬတၭ, အ့ၪမွဲၦမၩဆၧလဖၪနီၪအီၪၡၩခိၬဂၩလီၫ. မၩအၥၭဘဲၫနီၪတၭ, ဘၩဆိၪဖၪအၪ့ကံၩ့ကူၭဆၧအလးအကဆါ ဘဲၫၥိၭအမိအၪ့မၧၫ့လၩ့န့ ၦမၩဆၧလၧကူၭဆၧအ လးအဖၧၩ့နီၪဆံၭ.-

လ့ၩနၥံၪဝ့ၫဘီၪ,ယိခွါ,ယအၪ့မၧၫ့နၥံၪလ့ၩဆၧ ဘဲၫၥိၪဖိၪလၧထွံၪမံၩ့အကျၩအၥိၭနီၪလီၫ.- စ့ၩအထိၪ့မွဲဂ့ၩ, ဆၧအၪ့အထိၪ့မွဲဂ့ၩ, ခၪ့ဖံၭလဖၪမွဲဂ့ၩ, နၥံၪထီးဆိၬလဂ့ၩး ချဲၩ့ဒုၪ့ၦလၧဖၧၩ့ၥၭနးဂၩလဂ့ၩ.- ထီးဒၪနၥံၪလ့ၩနုၬ လၧဂံၪ့လဖျိၪ့ဖျိၪ့အဖၧၩ့နီၪ,စံၭဆိၫနၥံၪဝ့ၫ, မွဲဆၧမုၬဆၧလၩအီၪလၧဂံၪ့ယီၩဆံၭ.- ၦမုၬဖိၪအ့ၪအီၪထီးနီၪတၭ, နၥံၪအဆၧမုၬဆၧလၩ့မိဘၪအဝ့ၫလီၫ. အ့ၪလမွဲဘၪတၭ, မိဂဲၫထဲၩ့ဘၪထဲၩ့နၥံၪလီၫ.- အီၪလၧဂံၪ့လဖျိၪ့ဎးအဖၧၩ့နီၪ တၭ, အၪ့ဆၧအီၩဆၧ ထီးဒၪဆၧလၧၦအီၪက့ၪလၩ့ဝ့ၫဘီၪ. အဂဲးဘဲၫယီၩ ၦမၩဆၧနီၪ ဂ့ၩန့ဘၪအလံၩ့အလဲၫလီၫ. လဂံၪ့ဘၪလဂံၪ့နီၪ နၥံၪထီးလ့ၩလဂ့ၩ.- ထီးဒၪဒိၩ့လဖျိၪ့ဖျိၪ့လၧနၥံၪလ့ၩနုၬနီၪ, ၦအ့ၪထိးဆၧၫ့နၥံၪတၭ, ဆၧလၧအအီၪက့ၪလၩ့လၧနၥံၪအဂးနီၪအၪ့ဘီၪ.-

မၩဘျၪထဲၩ့ၦအဆၫအီၪလၧအဖၧၩ့, လီၩဘၪအဝ့ၫၥံၪ,ယွၩအဘၩ့အမုးနီၪ ဂဲၫဘူၭယူၭလၧနၥံၪယူၭ.- ထီးဒၪဒိၩ့လဖျိၪ့ဖျိၪ့လၧနၥံၪလ့ၩနုၬလၧအဖၧၩ့နီၪ, ၦအ့ၪလထိးဆၧၫ့ဘၪနၥံၪတၭ, လ့ၩထၪ့လၧအဖၧၩ့ၥၭတၭ, စံၭနၥံၪဝ့ၫ,- နၥံၪအဒိၩ့အဂၪ့ခိၪမုၬဘုၭထၬလၧပခၪ့ယၫၥၭယီၩ, ပတရူၩလၩ့ခွံၬထၫ့ဒၩနၥံၪလီၫ. မွဲလါနၫ့ဘိၩၥ့ၪယၫဆၧယီၩတၭ, ယွၩအဘၩ့အမုးနီၪဂဲၫဘူၭယူၭလၧနၥံၪယူၭ. ယလီၩဘၪနၥံၪ, လၧမုနံၩလနံၩအဖၧၩ့နီၪ, ဒိၩ့စီဒၧၫ့ မိဘၪဆၧယီၫနဲၪ့ဒိၩ့နီၪဒံၭလီၫ.

ၦနွ့ၫဆံၫနီၪဂဲၫထဲၩ့ထဲၩ့ဝ့ၫ လၧအၥုၪ့ထိၬအၥၭထိၬတၭ စံၭဝ့ၫ,ကဆါဧ့, မွဲလၧနမံၩ့အဖၧၩ့တၭ, ဆၧနၪလဖၪဒၪလ့ၬ အီၪလၧပဖၫ့လၬလီၫ.- အဝ့ၫဒၪစံၭအဝ့ၫၥံၪ, ဘဲၫလၫ့ဝဲအဒံၭအၥိၭနီၪယဒၪမုၪခီၩလဲးလၩ့ထ့ၬခွံၬလၧမူၭခိၪလီၫ.- ယိခွါ,ယဖ့ၪလၫ့နၥံၪအစီၩ့အမၩ့ ဘဲၫၥိၭနၥံၪမိယဲးဂူၥံၪ, ဒဲဆၧကဲၪ့မ့ၥံၪ, ဒဲလၧဆၧဒုၪဒၩအစီၩ့အမၩ့ ထီးအလူၬအဖၫ့ခိၪလီၫ. ဆၧမၩၡၪ့မၩနၭနၥံၪနးမံၩ့အ့ၬ.- မွဲလါနၩ့ဘိၩ မွဲလၧဆၧနၪအီၪ လၧနၥံၪအဖၫ့လၬတၭ, နၥံၪထီးၥၭထိၬလၧ ဆၧနီၪလမံၩ့အကၠီၩ့လဂ့ၩး အ့ၪမွဲနၥံၪအမံၩ့ဆ့ၭလၩ့အၥၭလၧ မူၭခိၪအဖၧၩ့အကၠီၩ့တၭ, ၥၭထိၬဆံၭ.