ယ့ၫၡူၬဒဲဘၫအလၭဇဘၧၭ

ၦအီၪလၧအကျၩလနၩ့နၩ့ စံၭဝ့ၫ မွဲအနၫ့ထၪ့ခွံၬဆၧနၪ လၧဆၧနၪအခိၪ ဘၫအလၭဇဘၧၭလီၫ.- အဂူၫဂၩလနၩ့ ကျဲၩ့ဖစီၩ့ဆၧတၭ အၪ့ကံၩ့ဆၧလၩ့လၭ လၧမူၭခိၪလၧအဝ့ၫဒၪလီၫ.- အဝ့ၫဒၪ ၥ့ၪယၫအဝ့ၫၥံၪ အဆၧကိၪ့ထၪ့ဖၭလၩ့လဖၪတၭ စံၭအဝ့ၫ ကယဲဘၩ့မုး လၧအမၩလၩ့ဖၭလိၬအၥၭနီၪ မိအီၪယူဝ့ၫလီၫ. ဂံၪ့အ့ၪလၩ့ဖၭလိၬအၥၭတၭ မိလၩ့ဎီးဝ့ၫလီၫ.- မုၪခီၩလဲး အ့ၪလၩ့မုလၩ့ဖၭဝ့ၫ လၧအနၫ့ဆါဒၪဝ့ၫတၭ အဘၩ့အမုး မိခၧၫ့ဝ့ၫဘဲၫၥ့ၪလဲၪ.

အဂဲးဘဲၫယီၩ နၥံၪစံၭလၧယနၫ့ထၪ့ခွံၬဆၧနၪ လၧဘၫအလၭဇဘၧၭလီၫ.- ယအ့ၪနၫ့ထၪ့ခွံၬဆၧနၪ လၧဘၫအလၭဇဘၧၭတၭ မွဲနၥံၪအဖိၪခွၫၥံၪ နၫ့ထၪ့ခွံၬဆၧနၪ လၧပလၫလဂၩလဲၪ. မၩအၥၭဘဲၫနီၪတၭ ၦလဖၪနီၪ မိကဲၪထၪ့ဝ့ၫ လၧၦစ့ၩရၫ့နၥံၪလီၫ.- အ့ၪမွဲယၧၩယီၩ ယအ့ၪနၫ့ထၪ့ခွံၬဆၧနၪ လၧယွၩအစူၪနိၩ့တၭ  မွဲမၬ ယွၩအဘၩ့အမုး ဂဲၫထီၩ့ယူၭ လၧနၥံၪအအီၪယူၭ.

ထီးၦၡၩအဆီၪ့အီၪလၧအစူၪဝဲၩနီၪ အ့ၪပၧၩ့ဘၪ အဂံၪ့အဘိၩ့ဘၭတၭ အဆၧဖိၪဆၧလံၩ အီၪခၧၫ့ဝ့ၫလီၫ.- မွဲလါနၫ့ဘိၩ ထီးၦအဂဲးအဘၭ ဆီၪ့နဲၪ့အဝ့ၫနီၪလဂၩ အ့ၪဂဲၫမၩနၧၩ့မၩစၪအဝ့ၫတၭ အဝ့ၫဒၪမိမၩန့ခွံၬအစူၪဝဲၩ လၧအဒိၭနဲၩ့အၥၭလၧအဖၧၩ့တၭ အၪ့နၩ့ဖၭအဆၧဖိၪဆၧလံၩအဆၧၫ့လီၫ.

ၦလၧအလအီၪဘၪဝ့ၫ လၧယၥိၭယီၩ မွဲအထၫ့ဒုၪထၫ့ဒၩယၧၩတၭ ဒဲၦလၧအလအၪ့ထုၫ့ကီၪ့ဘၪဆၧ လၧယၥိၭယီၩ မွဲအမၩပြံၩပြံၩဆၧလီၫ.

ထီးဆၧနၪလဒုၩ စဲၪ့ထၪ့ခွံၬဝ့ၫလၧ ၦၡၩအလီၩ့တၭ အၪ့ဎၬဆၧအီၪပွံၭအလးနီၪ စဲၪ့ဝံၩ့ဝၩ့လၧပွ့ၪခိၪတၭ လဒၪန့ဘၪအလးနီၪ စံၭဝ့ၫ ယမိထဲၩ့ထဲၩ့လၧယဂံၪ့ လၧယစဲၪ့ထၪ့ခွံၬဝ့ၫ လၧအဖၧၩ့လီၫ.- ထဲၩ့ထဲၩ့ဝ့ၫတၭ ဒၪန့ဝ့ၫလၧအအီၪဝ့ၬဆံၫ့အၥၭ ဒဲအီၪဝ့ၫဂ့ၩလ့ၬလီၫ.- ထီးနီၪလဖၧၫ့ လ့ၩမၩန့ဆၧနၪဂူၫဂၩ လၧအအၧၩ့နဲၪ့အနၫ့ဆါနွ့ၫဒုၩတၭ အဝ့ၫၥံၪနုၬအီၪဝ့ၫ ထီးအဖၧၩ့နီၪလီၫ. ၦလဂၩနီၪ အထုၬနၭနဲၪ့လၧအခၪ့ထံၭဒံၭလီၫ.