ယ့ၫၡူၬဒုၭအၪ့ ၦယဲထီၫ့ဂၩ

ယ့ၫၡုၬစဲၪ့ထၪ့ဝ့ၫနီၪႇ ဒၪဘၪၦခမျၧးဖၭဒိၪတၭႇ အၥၭအီၪဝ့ၫလီၫ. အဂဲးဘဲၫယီၩ မွဲအမၩအၥၭဘဲၫၥိၪလဖၪ လၧဆၧလအီၪယူၬ ဘၪဝ့ၫအၥိၭနီၪႇ တၭအဝ့ၫဒၪၥီၪ့ထဲၩ့ၥၫ့ထဲၩ့ဆိၫဝ့ၫ အၪမံၩ့လီၫ.

ဘိၩ့နဲၪ့ယီၩႇ တဘျႃၭနၩရံၩဖီၩ့ခွံၬတၭႇ အထံၩအဖျဲၥံၪလ့ၩ လၧအအီၪစံၭဝ့ၫဒၪႇ ဆၧအလးထီးယီၩ မွဲမံၩ့လၬကျၩတၭႇ ဘိၩ့နဲၪ့ယီၩ ဖီၩ့ခွံၬတဘျႃၭနၩရံၩယူၭ.- ဘဲၫၥိၭအဝ့ၫၥံၪမိလ့ၩဎွ့ၩအၪ့ဆၧ လၧအနၫ့ဆါဒၪဝ့ၫအဂး လၧတဝၫ့လဖၪအီၪဝၬဖီၩ့ပၧၩအဖၧၩ့တၭႇ ကွဲၪဖျါအဝ့ၫၥံၪဆံၭ. အဂဲးဘဲၫယီၩ အဆၧအၪ့ဆၧအီၩ အီၪနးမံၩ့အ့ၬ.-

 အဝ့ၫဒၪချဲၩ့ဆၧၫ့ဆၧတၭႇ စံၭအဝ့ၫၥံၪႇ ဖ့ၪဒုၭအၪ့နၥံၪဝ့ၫဆံၭ. အဝ့ၫၥံၪ စံၭဆၧၫ့ဝ့ၫႇ  မွဲပမိဘၪလ့ၩဎွ့ၩဆၧအၪ့ လၧစ့ၩဒန့ရံၫနံၫယၩတၭႇ ဖ့ၪဒုၭအၪ့ဝ့ၫဆ့ဧၪ.- အဝ့ၫဒၪစံၭဒီၭဝ့ၫႇ နၥံၪအကိၪ အီၪဎွ့လီၪ့လဲၪႇ ထဲၩ့ယိခွါဆံၭ. ထီးအဝ့ၫၥံၪၥ့ၪယၫဝ့ၫတၭႇ စံၭဝ့ၫႇ ယဲလီၪ့ႇ ဒဲယၪနံၫဘံၪ့ဆ့လီၫ.- တၭအဝ့ၫဒၪစံၭအဝ့ၫၥံၪႇ အၪ့မၧၫ့ၦထီးအလူၬ ဆၧၫ့နၩ့ဒံၩ့ခံၫ့လၧ နၪ့ၥံၫ့ဆ့ၬအဖၫ့ခိၪလဂဲးလဂဲးဘီၪ.- အဝ့ၫၥံၪဆၧၫ့ နၩ့ဒံၩ့ခံၫ့ဝ့ၫ လဂဲးလဂဲးနီၪ လဂဲးဂဲးလယၩ, လဂဲးဂဲးယဲဆံၫလီၫ.- ထီးအမၩန့စိၩကိၪယဲလီၪ့ႇ ဒဲယၪနံၫဘံၪ့တၭႇ ယိထၪ့ဆၧလၧမူၭခိၪတၭႇ ဆိၪဂ့ၩဆၧတၭႇ ကံၪ့ဘျ့ၭကိၪနီၪႇ ဖ့ၪလၫ့အထံၩအဖျဲၥံၪ ဘဲၫၥိၭအမိအီၪက့ၪလၩ့ဝ့ၫလၧ အဝ့ၫၥံၪအမ့ၬယၫလီၫ. ယၪနံၫဘံၪ့နီၪႇ မွဲအအၪ့နၩ့ဖၭဝ့ၫလၧၦထီးအလူၬအဂးလီၫ.- ၦထီးအလူၬအၪ့ဝ့ၫတၭႇ ဘျဲၩအၪ့ဝ့ၫလီၫ.- ကိၪဒဲယၪနီၪ မွဲအအၪ့ထုၫ့ထဲၩ့ဝ့ၫအဘျဲၪအဆဲ ဎွ့ၩဒၩ့ လဆံၫနံၫဖျိၪ့လီၫ.- ၦခွၫလၧအအၪ့ဆၧလဖၪနီၪႇ အီၪဝ့ၫဖိၭဘိၭယဲ ထီၫ့လီၫ.