ယ့ၫၡုၬအထံၩအဖျဲအဆိၫထုၬလဖၪ.

ကဲဂီၩခိၬလနံၩ စယီဟၫ့ဆၧၫ့ထုၪ့ဒီၭဝ့ၫ လၧအဖျဲနံၫဂၩအၥိၭတၭႇ- ယိယ့ၫၡုၬလ့ၩဆၧတၭႇ စံၭဝ့ၫႇ ယိခွါႇ ယွၩအၥိၪဖိၪဘီၪ.- အဖျဲနံၫဂၩ နါဂၧၫ့ဆၧချဲၩ့နီၪတၭႇ ဖိၬထၪ့ယ့ၫၡုၬအခဲၫ့လီၫ.

ယ့ၫၡုၬကၠၪထဲၩ့အၥၭတၭႇ ဒၪဘၪၦလၧအဖိၬအခဲၫ့နီၪႇ စံၭအဝ့ၫၥံၪႇ မွဲနၥံၪဂဲၫအၪ့ဎၬနီၪလဲၪး တၭအဝ့ၫၥံၪစံၭဆၧၫ့ဝ့ၫႇ ရၭဘံၫဧ့ႇ ဘဲၫၦစံၭဆၧအၥိၭႇ (ဆရၫ) နအီၪနဝ့ၫခီၫခီၫလဲၪ.- တၭအ ဝ့ၫဒၪစံၭဆၧၫ့ဝ့ၫႇ ဂဲၫယိခွါနၥံၪဝ့ၫဘီၪ. အဝ့ၫၥံၪလ့ၩ ယိလၧအအီၪဝ့ၫအလးနီၪႇ မွဲလၧဆံၫနၩရံၩဘူၭထၪ့ တၭႇ အီၪဝ့ၫလၧအၥိၭလနံၩနီၪလီၫ.

ၦလၧအနါဂၧၫ့ဆၧလၧစယီဟၫ့နီၪတၭႇ ဖိၬထၪ့ယ့ၫၡုၬအခဲၫ့နံၫဂၩနီၪႇ အလဂၩနီၪ မွဲစအၫ့ဒူၫထၧၫ့ဖုဝဲလၧ စစဲမၧၫ့ပံတၧၫတၭႇ- အဝ့ၫနီၪအၪ့ဎၬဒၪန့ဆိၫအထၧၫ့ဖုဝဲစစဲမၧၫ့တၭႇ စံၭအဝ့ၫႇ ပဒၪန့ယူၭ မစဲအၫယူၭႇ ဘဲၫၦစံၭဆၧအၥိၭႇ (ဎရံၬ) နီၪလီၫ.- တၭလ့ၩ ၥိၫ့စိၩအဝ့ၫလၧယ့ၫၡုၬအအီၪလီၫ. ယ့ၫၡုၬယိအဝ့ၫနီၪတၭႇ စံၭဝ့ၫႇ နဝ့ၫဒၪယီၩ နမွဲစယိနၫအဖိၪခွၫစစဲမၧၫ့တၭႇ ဆၧမိကိၭထဲၩ့နၧၩ့ လၧစစံဖၭ, ဘဲၫပစံၭဆၧအၥိၭ (လိး) လီၫ.