ယ့ၫၡုၬအဆၧၥံၫအဂဲး.

တၭအမိဒဲအမိအထၧၫ့ဖုဝဲမုၪ, စကျံအိၫဖၭအမၫ နးမၫရံၫ,ဒဲၦမၭဂဒၫလံနံၫဖိၪ, နးမၫရံၫၥံၪဆၧၫ့ထုၪ့ဝ့ၫ လၧယ့ၫၡုၬအထုၪ့စူၪယၫအနဲၩ့ထံၭနီၪလီၫ.- မၩအၥၭဘဲၫနီၪတၭ, ယ့ၫၡုၬဒၪဘၪအမိဒဲ အဖျဲလၧအအဲၪဝ့ၫလဂၩ ဆၧၫ့ထုၪ့လၧအနဲၩ့ထံၭတၭ, စံၭအမိနီၪ, ၦမုၪဧ့, ယိခွါ, နဖိၪခွၫဘီၪ.- ထီးနီၪလဖၧၫ့စံၭအဖျဲလဂၩနီၪ, ယိခွါ, နမိဘီၪ. ခီၫလၧနၩရံၫနီၪအလးခဲၫ့တၭ, အဖျဲလဂၩနီၪ ထဲၩ့န့ၦမုၪနီၪလၧအလးဒၪဝ့ၫလီၫ.

လၧဆၧနီၪအလးခဲၫ့တၭ, ယ့ၫၡုၬၥ့ၪယၫလၧဆၧထီးအလူၬ ဂီၩ့ယူၭ, ဘဲၫၥိၭဆၧကွ့ၭအၥၭမိလၧၫ့ထၪ့ ဎွ့ၩထၪ့ဝ့ၫတၭ, စံၭဝ့ၫဒၪ, ဆၧၥၭဝံယၥၭလၧထံၫလီၫ.- ဖၧၩ့လၧအအီၪဎွ့ၩဝ့ၫ လၧဆၧဆဲၪ့ထံၫအီၪဝ့ၫ ထီးနီၪလဖျိၪ့တၭ, ၦလဖၪနီၪစုၪစီၪလၩ့ဎၧၩ့မၫဆမံၭလလီၪ့လၧဆၧဆဲၪ့ထံၫနီၪ, ထၫ့ထၪ့ဝ့ၫလၧဟံစိၭလဘီၩ့အခံၫထိၭဂီၩ့တၭ, ယူၬထၪ့ဝ့ၫလၧအနိၭထံၭလီၫ. မၩအၥၭဘဲၫနီၪတၭ, ထီးယ့ၫၡုၬဒိၭန့ဆၧဆဲၪ့ထံၫနီၪ, စံၭဝ့ၫဒၪ,ဆၧဂီၩ့ယူၭး ဖျၭလၩ့အခိၪတၭ, ဒုၭစဲၪ့ ထၪ့ခွံၬအၥၭလီၫ.

မၩအၥၭဘဲၫနီၪတၭ, ဘဲၫၥိၭအစွၪထီးအီၪလၧထုၪ့ စူၪယၫအလီၩ့ လၧမးၥံၫအနံၩလဂ့ၩ, (အဂဲးဘဲၫယီၩ ဆၧလၧမးၥံၫအနံၩလနံၩနီၪ, မွဲမုနံၩအဒိၪ) တၭ,မွဲမုတဲၩ့ဝဲၩဆၧအနံၩအကၠီၩ့နီၪ, ၦယုဒၫဖိၪၥံၪအၪ့ကံၩ့ စပဲလၭဘဲၫၥိၭဆၧမိမၩခါအခၪ့တၭ, လ့ၩဆိၬခွံၬဝ့ၫဒၪလီၫ.- မၩအၥၭဘဲၫနီၪတၭ, ၦၥုၭဖိၪၥံၪလ့ၩမၩခါ ၦလၧအခၪ့ထံၭလဂၩအခၪ့ ဒဲအဝ့ၫလဂၩလၧအဘၪ ဆၧဖျၩထၪ့ဝ့ၫ လၧထုၪ့စူၪယၫအလီၩ့ လၧအၥိၭနီၪလီၫ.- အ့ၪမွဲထီးအထီၩ့လၧယ့ၫၡုၬအအီၪနီၪ, ဒၪဘၪဝ့ၫလၧအၥံၫယူၭတၭ, မၩခါလၧၩ့ဝ့ၫအခၪ့အ့ၬ.- မွဲလါနၫ့ဘိၩ    ၦၥုၭဖိၪလဂၩဆ့ၭထၪ့ယ့ၫၡုၬ အဂုၬဖၩလၧဖၩ့တၭ, အၥွံၪဒဲအထံၫယွၩလၩ့ဝ့ၫချဲၫ့မၬလီၫ.