ယ့ၫၡုၬအခံးအဂၩ့အၪ့လဲၩအၥၭ

လၧခဲၫ့ထဲၩ့ဎူၫနံၩတၭ, ယ့ၫၡုၬကိၭန့စပံတၧၫ, ဒဲစယ့မံၭဒဲစယီဟၫ့တၭ, လ့ၩၥိၫ့ထၪ့ဝ့ၫလၧခိၪလီၩ့ဖၭ ထီၫလဖျိၪ့အလီၩ့, လၧဆၧကဒုၩအလးလီၫ. အခံးအဂၩ့ဘၪဆၧအၪ့လဲၩခွံၬအၥၭ လၧအဝ့ၫၥံၪအမ့ၬယၫတၭ,- အကီၩ့အၥိၭယုၩ့ယဲဒိၪမၬတၭ,ဘွၩထၪ့ဒိၪမၬ ဘဲၫမူၭခိၪဖီၫအၥိၭ ထီးၦအၪ့ဆူၫဝၭဆၧလၧဂၪ့ခိၪချိၫ့ မၩဘွၩထၪ့လၥ့ၪဘၪလီၫ.- စအံၫလဲယၫ,ဒဲစမိစ့ၭနဲၪဖျီၪထၪ့အၥၭလၧအဝ့ၫၥံၪတၭ, ချဲၩ့ဒုၪ့လိၬအၥၭလၧ ယ့ၫၡုၬလီၫ.-

စပံတၧၫချဲၩ့ထၪ့ဝ့ၫတၭ, စံၭယ့ၫၡုၬ, ရၭဘံၫဧ့, ပအီၪထီးယီၩမုၬကၨ. ပမိမၩတဲၩနးၥၧၫ့ ဖျိၪ့,လၧနဂးနးဖျိၪ့,လၧစမိစ့ၭအဂးနးဖျိၪ့, လၧစအံၫလဲယၫအဂးနးဖျိၪ့လီၫ.- အဂဲးဘဲၫယီၩချဲၩ့ဆၧဘဲၫၥ့ၪ လဲၪဘဲၫၥ့ၪလဲၪနီၪ, ၥ့ၪယၫလၩ့အၥၭအ့ၬ. မွဲအဝ့ၫၥံၪ ၥၭမဲၪၥၭဖျဲၩ့ဆၧဒိၪမၬအဂဲးလီၫ.- ဆၧအုၪ့လၩ့ကဒုၩ အဝ့ၫၥံၪတၭ, ဆၧအလူၥီၫလၩ့လၧဆၧအုၪ့အကျၩစံၭ ဝ့ၫဒၪ, အယီၩမွဲယဖိၪခွၫၥၭဘီၩ့လဂၩတၭ, ခိၭနၪအ လူဆံၭ.- အဝ့ၫၥံၪယိဝၬဝၬချဲၫ့မၬတၭ, အ့ၪလမွဲဘၪ န့ၫယ့ၫၡုၬ ဒဲအဝ့ၫၥံၪအနၫ့ဆါလဖၪနီၪဒၪဘၪၦနးဂၩအ့ၬ.

အဝ့ၫၥံၪဂဲၫထဲၩ့လၩ့ဝ့ၫ လၧခိၪလီၩ့ခိၪအဘိၩ့ဘၭတၭ, ယ့ၫၡုၬမၪလူၬဝ့ၫ ဘဲၫၥိၭၦၡၩအဖိၪခွၫယီၩလ ချႃၭဂဲထုၪ့ထဲၩ့ဒံၭဘၪ လၧဆၧၥံၫအဖၧၩ့နီၪ, ထီးလီၩဘၪဆၧလၧအဒၪဘၪနီၪ လၧၦနးဂၩလဂ့ၩ,- ဆၧချဲၩ့ လထံၪနီၪ, အဝ့ၫၥံၪထီးန့ဝ့ၫတၭ,စံၭလိၬအၥၭ,ဆၧဂဲထုၪ့ထဲၩ့လၧဆၧၥံၫနီၪ,မွဲဆၧနီၪလဲၪ.-

အဝ့ၫၥံၪအၪ့ စၪ့ဝ့ၫတၭ, စံၭဝ့ၫ, မွဲဘၪနီၫလၧၦကွ့ၭလံၬၥံၪ, စံၭဝ့ၫ, စအံၫလဲယၫဘၪဂဲၫဆိၫလဲၪ.- အဝ့ၫဒၪချဲၩ့ဆၧၫ့အဝ့ၫၥံၪတၭ, လီၩဘၪဝ့ၫ, စအံၫလဲယၫဂဲၫဆိၫတၡါဝ့ၫတၭ, မၩထဲၩ့ဆၧထီးအလူၬလီၫ. ဘဲၫဆၧကွ့ၭအၥၭအၥိၭနီၪ, ၦၡၩအဖိၪခွၫမိဘၪထိးဆၧအၪ လၧၦမၩကြၩ့ထမးဝ့ၫလီၫ.- အ့ၪမွဲယၧၩယီၩ, ယလီၩဘၪနၥံၪ စအံၫလဲယၫဂဲၫထီၩ့ယူၭဝ့ၫယူၭ, ဘဲၫဆၧကွ့ၭအၥၭအဂဲးအၥိၭနီၪ, ထီးဒၪၦၡၩအၥၭအီၪဝ့ၫလမံၩ့ လါလါနီၪ,မၩယူၭအဝ့ၫယူၭ.