ယ့ၫၡုၬမၩဘျၪထဲၩ့ၦၥံၫလခီၫဖၩလဂၩ

အဝ့ၫဒၪလ့ၩနုၬလၧချံၫဖၧၩ့နီၪ, ခၫ့စိၩဝ့ၫတၭ, ဂဲၫနုၬလၧအဒိၩ့ဒၪဝ့ၫအဖၧၩ့လီၫ.- တၭယိခွါ,ၦၥံၫလခီၫဖၩ လဂၩမံၫနၩ့လၧလးမံၫအဖၧၩ့တၭ, ၦဂဲၫဆိၬဝ့ၫလၧအအီၪလီၫ. ယ့ၫရှူၬဒၪဘၪအဝ့ၫၥံၪ အဆၧနဲၩတၭ, စံၭၦၥံၫလခီၫဖၩလဂၩနီၪ,ဖိၪခွၫဧ့, မွဲနၥၭဎွံၫထၪ့ဘီၪး နဆၧဒဲၭဘၭဖျါယူၭ.-

ယိခွါ,ၦကွ့ၭလံၬလနၩ့နၩ့စံၭလၧအၥၭဖၧၩ့း ၦလဂၩယီၩချဲၩ့မၪယွၩလီၫ.- ယ့ၫရှူၬၥ့ၪယၫအဆၧဆီၫ့မီၪ့လဖၪတၭ, စံၭဝ့ၫဒၪး မွဲဘၪနီၫ လၧနၥံၪဆီၫ့မီၪ့ဆၧအၧၩ့ လၧနၥံၪအၥၭဖၧၩ့နီၪလဲၪ. အဂဲးဘဲၫယီၩ, မွဲအယီၫထံၪထံၪလဲၪ. ၦစံၭလၧနဆၧဒဲၭဘၭဖျါယူၭနီၪ, မိယီၫလဆံၭဧၪ. ၦစံၭ,ဂဲထုၪ့စဲၪ့ထၪ့ဆံၭနီၪမိယီၫလဆံၭဧၪ.-

 မွဲလါနၫ့ဘိၩ, ဘဲၫၥိၭနၥံၪမိၥ့ၪယၫ လၧၦၡၩအဖိၪခွၫလဂၩယီၩအီၪလၧအစီၩ့အမၩ့လၧဂၪ့ခိၪချိၫ့ယီၩ, ထီးအကွဲၪဖျါဆၧဒဲၩဘၭ မိၥ့ၪတၭ, (ယ့ၫရှူၬစံၭၦၥံၫလခီၫဖၩလဂၩနီၪ,) ယစံၭနၧၩ,ဂဲထုၪ့ဆိၬထၪ့နလးမံၫတၭ, ထဲၩ့ထဲၩ့လၧနဂံၪ့ဆံၭ.- အဝ့ၫဒၪဂဲထုၪ့တၭ, ထဲၩ့ထဲၩ့ဝ့ၫလၧအဂံၪ့လီၫ. ၦခမျၧးဒၪဘၪဝ့ၫနီၪ, ထီၫမံၫထီၫမၪတၭ, စံၭထၪ့အၪ့ အူၭယွၩလၧအဖ့ၪလၫ့ၦၡၩအစီၩ့အမၩ့ဒိၪန့ၫနီၪလီၫ.