ယ့ၫၡုၬမၩဘျၪထဲၩ့ၦၥံၫလခီၫဖၩလဂၩ.

ဆၧမၩအၥၭလၧအနံၩလနံၩႇ လၧအၥီၪ့ထဲၩ့ၥၫ့ထဲၩ့ဆၧအဘိၩ့ဘၭနီၪႇ ၦဖၫရစံၫ ဒဲၦၥ့ၪလံၬလၧအဂဲၫယူၭ လၧကယဲဂၫလလံၫႇ ဒဲခးယုဒၫအတဝၫ့လစီၪ့လါလါႇ ဒဲလၧယရုစလံၫ့နီၪ ဆၧၫ့နၩ့အီၪဝ့ၫတၭႇ ကဆါအစီၩ့အမၩ့အီၪထၪ့ဝ့ၫဘဲၫၥိၭအမိမၩဘျၪထဲၩ့အဝ့ၫၥံၪလီၫ.-

ယိခွါႇ ၦဂဲၫဆိၬၦလၧအၥံၫလခီၫဖၩလဂၩ လၧအလးမံၫဖၧၩ့ႇ အၪ့ဎၬနုၬဝ့ၫ ဘဲၫၥိၭအမိဂဲၫအီၪက့ၪလၩ့ဝ့ၫလၧအမ့ၫယၫလီၫ.- မွဲလၧၦခမျၧးအီၪဝ့ၫအကၠီၩ့တၭႇ မိဂဲၫဆိၬနုၬဝ့ၫလၧအလးခီၫခီၫလဲၪနီၪ အၪ့ဎၬဒၪဘၪဝ့ၫအ့ၬ. လ့ၩထၪ့ဝ့ၫလၧဂံၪ့ခိၪတၭႇ ၦလၧအဘၪဆၧဆၫလဂၩနီၪႇ ၦဆဲၩလၩ့ဝ့ၫလၧအမၩဖိးအလးအီၪလၧအလးမံၫ လၧဆၧအၥၭကျၩ လၧယ့ၫၡုၬအမ့ၬယၫလီၫ.- မွဲအဒၪဘၪအဝ့ၫၥံၪအဆၧနဲၩတၭႇ စံၭဝ့ၫႇ ၦၡၩဧ့ႇ နဆၧဒဲၩဘၭဖျါယူၭ.-

ၦကွ့ၭလံၬၥံၪ ဒဲၦဖၫရစံၫၥံၪ ကၩ့ကၩလိၬအၥၭတၭႇ စံၭဝ့ၫႇ  ၦလၧအချဲၩ့ မၪယွၩလဂၩယီၩႇ မွဲပလၫလဂၩလဲၪ. အ့ၪလမွဲဘၪယွၩနီၪ မွဲပလၫကွဲၪဖျါဆၧဒဲၩဘၭၥ့ၪလဂၩလဲၪ.- ယ့ၫၡုၬၥ့ၪယၫအဆၧကိၪ့ထၪ့ဖၭလၩ့တၭႇ ချဲၩ့ဆၧၫ့ဆၧတၭလီၩဘၪဝ့ၫႇ မွဲဘၪနီၫလၧနၥံၪကၩ့ကၩဆၧ လၧနၥံၪအၥၭခံဖၧၩ့လဲၪ.- မွဲဆၧချဲၩ့ယီၫထံၪထံၪလဲၪ. ၦစံၭလၧ နဆၧဒဲၩဘၭဖျါယူၭနီၪႇ ယီၫလဆံၭဧၪ. ၦစံၭႇ ဂဲထုၪ့စဲၪ့ထၪ့ဆံၭနီၪႇ ယီၫလဆံၭဧၪ.-

 မွဲလါနၫ့ဘိၩႇ ဘဲၫနၥံၪမိၥ့ၪယၫ လၧၦၡၩအဖိၪခွၫယီၩ အီၪလၧအစီၩ့အမၩ့ လၧဂၪ့ခိၪချိၫ့ ဘဲၫၥိၭအမိကွဲၪဖျါဆၧဒဲၩဘၭတၭႇ (စံၭၦလၧအၥံၫလခီၫဖၩလဂၩနီၪႇ) ယစံၭနၧၩဂဲထုၪ့တၭႇ မၩန့နလးမံၫႇ ထဲၩ့ထဲၩ့လၧနဂံၪ့ဆံၭ.- အဝ့ၫဒၪဂဲထုၪ့ဝ့ၫချဲၫ့မၬ လၧအဝ့ၫၥံၪအမ့ၬယၫတၭႇ မၩန့ထဲၩ့အလးမံၫနီၪႇ စံၭထၪ့အၪ့အူၭယွၩတၭႇ ထဲၩ့ထဲၩ့ဝ့ၫလၧအဂံၪ့လီၫ.-

ၦထီးအလူၬထီၫမံၫထီၫမၪဝ့ၫတၭႇ စံၭထၪ့အၪ့အူၭယွၩနီၪႇ ဆၧၥၭမဲၪၥၭဖျဲၩ့အီၪဎွ့ၩအၥၭတၭႇ စံၭဝ့ၫအယီၩလနံၩယီၩႇ ပဒၪဘၪယူၭမၬ ဆၧလၩ့လၭကၨ.