ယ့ၫၡုၬမၩဘျၪထဲၩ့ၦလဂၩလၧဆၧနၪလဖၪအီၪ.

အဝ့ၫၥံၪလ့ၩထီၩ့ဝ့ၫလၧကွံၩဝါလခီၫ လၧၦဂၧဂစံၫ့ဖိၪအခးလီၫ.- ထီးအစဲၪ့ထၪ့ခွံၬဝ့ၫလၧချံၫဖၧၩ့တၭႇ ၦလၧဆၧနၪအီၪ လၧအလီၩ့လဂၩ ဂဲၫထၪ့ချဲၫ့မၬလၧလီၫ့ဖၧၩ့ အၪ့ဂၬအဝ့ၫဒၪလီၫ.- 
အဝ့ၫနီၪမွဲအအီၪဝ့ၫ လၧလီၫ့ဖၧၩ့တၭႇ ၦစၧၩ့ထၬဝ့ၫ လၧၥွ့ၫထၭဒၪလ့ၬၥ့ၪနးဂၩအ့ၬ.- ၦဖျၪ့ထၬယူၭဝ့ၫအခၪ့လၧၥံၫ့ဖၧၩ့ႇ ဒဲစၧၩ့ထၬယူၭဝ့ၫ လၧၥွ့ၫထၭအၪဘျၩ့တၭႇ မွဲအထုၭထ့ၬၥွ့ၫတၭႇ ဘိၭခါအၥံၫ့နီၪတၭႇ ၦမၩနဲၩဝ့ၫၥ့ၪနးဂၩအ့ၬ. မွဲအကိၭၡၭထၪ့ဆၧလၧလီၫ့ဖၧၩ့ႇ ဒဲလၧခိၪလီၩ့အလီၩ့ ကိၭမုနံၩမုနၩဒ့ၭတၭႇ ဂ့ၬနုၬလၩ့အၥၭလၧလိးလီၫ.
ဒၪစိၩယ့ၫၡုၬလၧအယဲၩ့တၭႇ လ့ၩစဲၪ့တလဲးဝ့ၫ လၧအအီၪနီၪ ထွံၩလၩ့အၥၭတၭႇ- ကိၭၡၭထၪ့ဆၧလၧအလူဖၭဒိၪႇ စံၭဝ့ၫဒၪႇ ဆၧထီၫထုၬယွၩအဖိၪခွၫယ့ၫၡုၬဧ့ႇ နၧၩဒဲယၧၩယီၩႇ မွဲပဘၪဆဲၫ့လိၬပၥၭ လၧဆၧနီၪလမံၩ့လဲၪ. ယဒုၭဆိၪလၩ့နၥၭ လၧယွၩအမ့ၬယၫ ဘဲၫၥိၭနထီးမၩၡၪ့မၩနၭယၧၩလဂ့ၩ.- အဂဲးဘဲၫယီၩ မွဲအစံၭယူၭအဝ့ၫႇ ဆၧနၪဧ့ႇ စဲၪ့ထၪ့ခွံၬလၧ ၦလဂၩနီၪအလီၩ့ဆံၭ.- 
အဝ့ၫဒၪအၪ့စၪ့ဝ့ၫႇ နမံၩ့မွဲဘဲၫၥ့ၪလဲၪ. အဝ့ၫဒၪလီၩဘၪဝ့ၫႇ ယမံၩ့မွဲလံဇၧၫ့လီၫ. အဂဲးဘဲၫယီၩ ပမွဲအၪဒုၩလီၫ.- အဝ့ၫအၪ့ကံၩ့အၪ့ယၫ ဆၧဆီၪ့ဆီၪ့လ့ၬ ဘဲၫၥိၭအထီးနၫ့ထၪ့ခွံၬဝ့ၫ လၧခးဖၧၩ့နီၪလဂ့ၩလီၫ.- ထိၭအဒီၪ့ဖၭဒိၪလဒီၪ့ အၪ့ဆၧလၧခိၪလီၩ့အလီၩ့တၭႇ- ဆၧနၪထီးအလူၬအၪ့ယၫဝ့ၫႇ စံၭဝ့ၫဒၪႇ အၪ့မၧၫ့ပလ့ၩလၧထိၭလဖၪအအီၪ ဘဲၫၥိၭပမိနုၬလၧအဖၧၩ့ဆံၭ.
ယ့ၫၡုၬဒုၭလ့ၩအဝ့ၫၥံၪချဲၫ့မၬလီၫ. ဆၧနၪလဖၪစဲၪ့ထၪ့ခွံၬတၭႇ လ့ၩနုၬဝ့ၫလၧထိၭအဖၧၩ့တၭႇ ထိၭလဒီၪ့နီၪ စဲၪ့ဖုၫလၩ့ဝ့ၫ လၧၡၭမ့ၬထုးဖၭထီၫ လၧကွံၩဖၧၩ့ အီၪဝ့ၫဖိၭဘိၭနံၫထီၫ့တၭႇ လၩ့အုၭၥံၫခွံၬဝ့ၫလၧကွံၩဖၧၩ့လီၫ.- 
ၦယူၬဝ့ၫလဖၪထဲၩ့စဲၪ့တၭႇ လီၩဘၪဆၧလၧဒိၩ့ဖၧၩ့ႇ ဒဲလၧခီၫ့ဆ့လီၫ. ဆၧမၩအၥၭဘဲၫၥ့ၪလဲၪဘဲၫၥ့ၪလဲၪနီၪႇ ၦလဖၪဂဲၫယိဝ့ၫလီၫ. အဝ့ၫၥံၪဂဲၫထီၩ့ လၧယ့ၫၡုၬအအီၪတၭႇ ဒၪဘၪၦလၧဆၧနၪလံဇၧၫ့ အီၪယူၭဝ့ၫ လၧအလီၩ့လဂၩနီၪ ဆၧၫ့နၩ့ဝ့ၫတၭႇ ကီၩ့ဆၧၥိၭဆၧဒဲအၥၭ လၩ့ထံးလၩ့ဆ့ၭအီၪထၪ့ထဲၩ့တၭး အဝ့ၫၥံၪ ၥၭမဲၪၥၭဖျဲၩ့ဝ့ၫဒၪလီၫ.
ဆၧမၩအၥၭဘၪဆဲၫ့လၧ ၦလၧဆၧနၪအီၪလၧအလီၩ့ႇ ဒဲထိၭလဖၪအဂဲးအကၠီၪ့နီၪႇ ၦလၧအဒၪဘၪဝ့ၫလဖၪ လီၩဘၪအဝ့ၫၥံၪလီၫ.- အဝ့ၫၥံၪအၪ့ကံၩ့အၪ့ယၫဝ့ၫႇ ဘဲၫၥိၭအမိစဲၪ့ထၪ့ခွံၬဝ့ၫ လၧအဝ့ၫၥံၪအထံၫအခးလီၫ.
 ထီးအလ့ၩနုၬလၧချံၫဖၧၩ့တၭႇ ၦလၧဆၧနၪအီၪယူၭဝ့ၫ လၧအလီၩ့လဂၩနီၪႇ အၪ့ကံၩ့အၪ့ယၫအဝ့ၫ ဘဲၫအမိအီၪလၧအၥိၭလီၫ.- အဝ့ၫဒၪလဖ့ၪလၫ့ဘၪတၭႇ လီၩဘၪဝ့ၫႇ ထဲၩ့လၧနဂံၪ့တၭႇ ထီးဒၪ ကဆါမၩနၧၩႇ ဒဲယၫ့ၥၭနၧၩနီၪ လီၩဘၪနဘူၭနထံးဆံၭ.- 
အဝ့ၫနီၪထဲၩ့ဝ့ၫတၭႇ ထီးဒၪယ့ၫၡုၬမၩဝ့ၫ ဆံၭဒိၪလဲၪနီၪတၭႇ မွဲအလီၩဘၪဝ့ၫ လၧဒကၭပိၫလံၭအဖၧၩ့တၭႇ ၦထီးအလူၬထီၫမံၫထီၫမၪဝ့ၫလီၫ.