ယ့ၫၡုၬမၩဘျၪထဲၩ့ၦမ့ၬဘျီၪ လၧအအၪ့ကံၩ့အၪ့ဆၧလဂၩ.

တၭထီးအလ့ၩဘူၭ လၧယ့ၫရခိၫနီၪ ၦအမ့ၬဘျီၪ ဆၧၫ့နၩ့အၪ့ကံၩ့ဆၧ လၧဖၧၩ့ၥၭအနဲၩ့ထံၭလီၫ.- အဝ့ၫ လဂၩနါဂၧၫ့ၦခမျၧးဂဲၫဝ့ၫတၭ, အၪ့စၪ့ဝ့ၫ, မွဲဆၧနီၪလဲၪ.-

တၭၦလီၩဘၪဝ့ၫ, မွဲၦနၭဇရ့ၭဖိၪယ့ၫၡုၬဂဲၫဝ့ၫလီၫ.- အဝ့ၫဒၪကိၭၡၭထၪ့တၭ, စံၭဝ့ၫ, စဒၫဝံၭအဖိၪခွၫယ့ၫၡုၬဧ့, ယၫ့ၥုၪ့ယၫ့ၥၭလါယၧၩဆံၭ.- ၦလ့ၩလၧယၫလဖၪနီၪ ဘဲၫၥိၭအဆၧမိအီၪလၩ့မါပံၭတၭ, အၪ့လၬအဝ့ၫလါနၫ့ဘိၩ့, မွဲအကိၭၡၭအၪထၪ့လခီၫနီၪ, စဒၫဝံၭအဖိၪခွၫဧ့, ယၫ့ၥုၪ့ယၫ့ၥၭလါယၧၩဆံၭ.

 ယ့ၫၡုၬအီၪထီတၭ, အၪ့မၧၫ့ၦၡၩကိၭန့အဝ့ၫဒၪလီၫ. ထီးအဂဲၫဘူၭတၭ, ယ့ၫၡုၬအၪ့စၪ့အဝ့ၫ,စံၭ, နၥၭအီၪလၧယမိမၩနၧၩ လၧဆၧနီၪလမံၩ့လဲၪ.- အဝ့ၫဒၪစံၭဝ့ၫ, ကဆါဧ့, မွဲဘဲၫၥိၭယမိဒၪထၪ့ထဲၩ့ဆၧလီၫ.-

ယ့ၫၡုၬ စံၭအဝ့ၫ, မွဲနဒၪထၪ့ထဲၩ့ဆၧဆံၭ. နဆၧနဲၩနီၪ မၩဘျၪထဲၩ့ယူၭနၧၩယူၭ.- အဝ့ၫလဂၩဒၪထၪ့ထဲၩ့ဆၧချဲၫ့မၬ, စံၭထၪ့အၪ့အူၭယွၩတၭ, ဖိၬထၪ့အခဲၫ့လီၫ. ၦထီးအလူၬဒၪဘၪဝ့ၫတၭ, အၪ့အူၭထၪ့ယွၩလီၫ.